18
Gaad dischrai Babilan
1 Afta dat Ah si wahn nada aynjel di kohn dong fahn owta hevn. Ih mi ga lata powa, ahn di lait weh mi-di shain fahn ahn, lait op di hoal ert.
2 Ih hala haad-wan seh,
“Babilan di grayt siti don dischrai!
Ih da now di hoam fi deeman,
ahn fi aal kaina eevl spirit weh kohn fahn Saytan,
fi aal kaina doti berd weh eet ded meet,
ahn fi aal kaina animal weh fraitnin.
3 Kaaz aal di nayshan dehn mi jrink ih wain.
Da wain da di loos laif weh dehn mi-di liv wid ahn.
Di king dehn a di werl mi sleep wid ahn.
Di bizniz peepl dehn geh richa kaaz shee mi soh grabalishos.”
4 Den Ah yehr wahn nada vais di taak fahn hevn seh,
“Mi peepl, unu kom owta da siti Babilan!
Noh tek no paat eena ih sin dehn,
er els unu wahn sofa di sayhn ponishment.
5 Gaad noh faget di bad ting dehn weh dehn du;
dehn pail op hai til dehn reech way op tu hevn.
6 Mek di bad tingz weh ih mi du ton pan ahn.
Mek ih sofa too taim moa dan di sofarin weh ih mek ada peepl sofa.
Da kop weh ih mi tek wen ih gi peepl ih wain fi jrink,
mek ih ful op da kop wid wain weh too taim moa bita dan ih oan wain,
ahn mek ih jrink it.
7 Shee mi injai richiz ahn pleja;
wel now mek ih injai sofarin ahn payn.
Ih boas eena ih haat seh, ‘Ai da kween pahn mi chroan!
Ai da noh no wido;
Ai noh wahn noa weh ih meen fi bee sad.’
8 Bikaaz a dat, eena wan day lata bad tingz wahn hapm tu ahn.
Shee wahn feel di payn a sofarin, staavayshan ahn det.
Faiya wahn bon op ih ded badi
bikaaz di Laad Gaad weh di joj ahn da wahn powaful Gaad.”
9 Dehn king a dis werl weh mi sleep wid ahn weh mi injai ih loos laif ahn ih los, dehn wahn moan. Dehn wahn baal wen dehn si di smoak fahn weh ih geh bon op.
10 Dehn king wahn reeli frayd fi chroo, wen dehn si how di peepl a da siti di sofa. Dehn wahn stan op fahn faar ahn dehn wahn baal owt seh,
“Chrobl! Chrobl! Da wahn terabl taim fi chroo
fi da powaful siti, Babilan.
Eena jos wan owa Gaad jojment kohn pan ahn!”
11 Dehn wan weh di du chrayd eena di werl wahn baal ahn baal ahn dehn haat wahn hevi bikaaz di siti mi dischrai, ahn nobadi neva deh fi bai dehn gudz agen.
12 Da mi gudz laik goal ahn silva, ahn juwelz, ahn perl beed; dehn fansi klaat, perpl ahn brait red, linin ahn silk; ahn dehn wud weh ga perfyoom sent, ahn aal kaina ting weh dehn mek fahn owta aivri, ahn ekspensiv wud ahn dehn ting weh dehn mek fahn owta braas ahn aiyan ahn maabl.
13 Ahn nobadi mi deh fi bai aala dehn ting weh smel sweet laik siniman ahn aintment, insens, mer ahn frankinsens; dehn wain ahn aliv ail, ahn dehn fain flowa ahn weet; dehn kow ahn sheep, dehn haas ahn kehrij, ahn slayv—yes, eevn ada hyooman.
14 Dehn wan weh di chrayd wahn tel Babilan seh,
“Aal dehn ting weh yu mi set yu haat pan, dehn don gaan.
Aal di fansi laif weh yu mi lov, gaan.
Dehn fansi ting weh mek yu luk priti, aala dehn gaan.
Yu wahn neva si dehn agen!”
15 Dehn wan weh mi chrayd dehn gudz wid ahn, ahn geh rich, dehn wahn frayd ahn dehn wahn stan op fahn faar di baal ahn moan wen dehn si how di peepl a da siti di sofa.
16 Dehn wahn baal owt seh,
“Ih terabl fi chroo fi da siti weh mi soh grayt ahn powaful.
Ih yoostu jres op eena fansi linin, ahn perpl ahn brait red kloaz.
Ih mi jres op wid goal, ahn juwelri, ahn perlz.
17 Bot now eena jos wan owa aal ih richiz dehn jos gaan!”
Aal dehn kyaptin ahn aala dehn wan weh chravl pahn dehn ship, wid aala dehn seeman, ahn aala dehn wan weh du bizniz bai see, aala dehn wahn stan fahn faar.
18 Wen dehn si di smoak weh di kohn fahn di faiya weh di bon op da siti, dehn wahn baal owt seh, “Dis da-mi di graytis siti!”
19 Den dehn wahn chroa di dos pahn tap a dehn hed kaa dehn haat hevi. Dehn di baal ahn wayl ahn krai owt seh,
“Wai-ya-yaiy! Ih terabl, kaa da siti mi grayt ahn powaful.
Evribadi weh mi du bizniz bai see
mi geh rich fahn fi shee chreja dehn.
Bot luk how eena wan singl owa evriting gaan.
20 Soh den, mek aala hevn rijais.
Mek Gaad peepl dehn, ih apasl dehn, ahn ih prafit dehn rijais tu!
Gaad don joj Babilan fi di bad ting dehn weh ih mi du.”
21 Afta dat, wahn aynjel weh ga lata powa pik op wahn big big stoan. Ih chroa di stoan eena di see, ahn ih seh,
“Sayhn way soh, dehn wahn chroa dong da grayt siti Babilan
fi brok ahn op.
Ahn nobadi noh wahn si da siti agen.
22 Nobadi noh wahn yehr no myoozik agen di play eena yu schreet dehn.
Dehn noh wahn yehr no haap, no floot, no chrompit, ahn nobadi di sing.
No chraydzman noh wahn di mek notn.
Yu noh eevn wahn yehr grayn di grain.
Di plays wahn sailent.
23 Nohmoh lamp lait wahn di shain deh agen.
Nohmoh man ahn uman wahn geh marid deh agen.
Yu bizniz peepl dehn weh da-mi di graytis eena di werl,
fool op di nayshan dehn wid yu oabya.
24 Eena Babilan, di blod a Gaad prafit dehn
ahn di blod a Gaad peepl dehn mi-di ron eena ih schreet.
Di blod a aal dehn peepl pahn ert weh dehn don kil mi-di ron tu.”