15
Lo que erer ubꞌoni inteꞌ winic
Marcos 7:1-23
1 Pues entonces ayan cora fariseobꞌ taca cora ajcanseyajobꞌ tama uley e Moisés xeꞌ tariobꞌ tama e chinam Jerusalem xeꞌ cꞌotoyobꞌ tuyejtzꞌer e Jesús tuaꞌ uyubꞌiobꞌ tuaꞌ y chenobꞌ:
2 —¿Tucꞌa tuaꞌ war ucꞌocchiobꞌ e onian canseyaj tuaꞌ catata viejobꞌirobꞌ awajcanuarobꞌ que machi war uchiobꞌ e rito tama ucꞌabꞌobꞌ conda cꞌanix awiobꞌ? che e nuquir winicobꞌ era.
3 Pero e Jesús sutpa uyubꞌi tuobꞌ e winicobꞌ era y che:
—¿Y coxto nox war icꞌocchi ubꞌan lo que arobꞌnon umen Catata Dios tuaꞌ taca icꞌupse e onian bꞌijnusiaj tuaꞌ catata viejobꞌirobꞌ?
4 Porque che e Dios que: “Cꞌupsen atata y atuꞌ.” Y che ubꞌan que: “Tin e ubꞌaxe ut utata o ut utuꞌ ucꞌani tuaꞌ achamesna.”
5 ¿Pero ma ca jax bꞌan war iche nox conda ixixin iware itata o ituꞌ que: “Machi uyubꞌien intacriet porque tunor lo que ayan tanibꞌa ajcꞌubꞌirix e Dios nimener?”
6 Y nox war inata que jay bꞌan uche inteꞌ entonces machito tuaꞌ utacre utata o utuꞌ. Y tamar era chequer que war ichoqui lo que e Dios war uyareox. Pero nox war inata que más ayan ucꞌampibꞌir e onian bꞌijnusiaj tuaꞌ catata viejobꞌirobꞌ que lo que arobꞌnon umen Catata Dios.
7 Ajqꞌuecranerox, chequer que jax nox xeꞌ war ixpejcna umen e profeta Isaías conda utzꞌijbꞌa que:
8 E winicobꞌ era war utattzꞌienobꞌ tamar uyejobꞌ taca,
pero tama uyalmobꞌ najtir turobꞌ taniut.
9 Pero matucꞌa ucꞌampibꞌir que war uyujtzꞌiobꞌ niut
porque lo que war ucansiobꞌ e gente jax taca lo que ubꞌijnuobꞌ e winicobꞌ. Bꞌan chꞌar tzꞌijbꞌabꞌir umen e Isaías,
che e Jesús.
10 Y de allí e Jesús upejca e gente y che:
—Ubꞌinic lo que cꞌani inwareox era y natanic tunor era porque
11 lo que oꞌchoy tama uyej inteꞌ winic machi tuaꞌ ubꞌoni uyalma, pero e ojroner lo que ulocse tama uyej jax lo que tuaꞌ ubꞌoni e winic, che e Jesús.
12 Entonces uyajcanuarobꞌ cꞌotoyobꞌ tuyejtzꞌer e Jesús y chenobꞌ:
—¿War ca anata que aqꞌuijnesobꞌ e fariseobꞌ tamar lo que awareobꞌ sajmix? che uyajcanuarobꞌ.
13 Pero che e Jesús:
—E winicobꞌ era bꞌanobꞌ cocha e teꞌ. Y tunor e teꞌ xeꞌ majax pacbꞌir umen Nitata xeꞌ turu tichan cꞌani abꞌojca alocꞌoy taca tunor uwir. Y bꞌan tuaꞌ uche Nitata taca e winicobꞌ era ubꞌan.
14 Actanic e winicobꞌ era porque larobꞌ tacar inteꞌ ajbꞌijresiaj xeꞌ tajpem unacꞌut xeꞌ war uchuqui ucꞌabꞌ otronteꞌ xeꞌ tajpem unacꞌut ubꞌan. Porque jay inteꞌ xeꞌ tajpem unacꞌut axin ubꞌijres otronteꞌ xeꞌ tajpem unacꞌut ubꞌan chatertiobꞌ axin oꞌjriobꞌ tama inteꞌ chꞌen, che e Jesús.
15 Entonces ojron e Pedro y che:
—Checsun ticoit tucꞌa war che e ojroner era, che e Pedro.
16 Y che e Jesús:
—¿Machi ca war inata tucꞌa war che e ojroner era?
17 ¿Machi ca inata que tunor lo que oꞌchoy tama uyej inteꞌ winic axin oꞌchoy macuir unac y de allí alocꞌoy otronyajr tama ucuerpo?
18 Pero e ojroner xeꞌ mabꞌambꞌan lo que inteꞌ winic ulocse tama uyej xeꞌ alocꞌoy tama uyalma jax lo que abꞌonon.
19 Porque tama uyalma inteꞌ winic alocꞌoy tunor e mabꞌambꞌan bꞌijnusiaj xeꞌ jax e bꞌijnusiaj tuaꞌ axin achamsan, y tuaꞌ axin taca inteꞌ ajnajtir ixic, y tunor e bꞌijnusiaj cocha era, y e mabꞌambꞌan bꞌijnusiaj tuaꞌ axin axujchꞌian, y tuaꞌ axin amajresian, y tuaꞌ axin uqꞌuijnes otronteꞌ. Tunor era alocꞌoy tama uyalma inteꞌ.
20 Pues jax era lo que uche abꞌontzꞌa inteꞌ winic, pero conda axin aweꞌ inteꞌ, motor que machi acꞌapa uche e rito tama ucꞌabꞌobꞌ lo que ucꞌaniobꞌ catata viejobꞌirobꞌ, ma cocha erer abꞌontzꞌa inteꞌ tamar era, che e Jesús.
Conda inteꞌ ixic xeꞌ ajnajtir lugar cꞌupseyan
tama e Jesús
Marcos 7:24-30
21 Entonces locꞌoy e Jesús tama e lugar era y ixin esto tama e chinam Tiro y esto tama e chinam Sidón.
22 Y ayan inteꞌ ixic tama e lugar era xeꞌ tuaꞌ e lugar Canaán xeꞌ majax tuaꞌ e lugar Israel. Entonces e ixic cꞌotoy tut e Jesús y cay ojron taca inteꞌ nuxi nuc y che:
—Niwinquiraret, uyunenet e rey David, yajtan niut. Chucur uyalma yar niwijchꞌoc umen inteꞌ mabꞌambꞌan mein y meyra war unumse ubꞌa umener, che e ixic.
23 Pero xanato e Jesús y matucꞌa uyare e ixic. Cꞌani unata cobꞌa war acꞌupseyan e ixic era tamar. Pero cꞌotoyobꞌ uyajcanuarobꞌ tuyejtzꞌer e Jesús y che:
—Aren e ixic yax que chic porque calapir war aꞌru watar ticapat, che uyajcanuarobꞌ.
24 Y che e Jesús:
—Nen ebꞌetbꞌir tarien tuaꞌ taca intacre tin e turobꞌ tama e lugar Israel xeꞌ larobꞌ taca cora oveja xeꞌ satrem, che e Jesús.
25 Entonces cꞌotoy cotuan e ixic tut e Jesús y che:
—Niwinquiraret, tacrenen, che e ixic.
26 Y che e Jesús:
—Mabꞌambꞌan tuaꞌ calocse e comida tuaꞌ e maxtac tuaꞌ cawajcꞌu inteꞌ tzꞌiꞌ, che e Jesús.
27 Pero ojronto e ixic y che:
—Pues erach awojroner, Niwinquiraret. Pero yebꞌar e mesa tiaꞌ war aweꞌ e ajyum ayan tiaꞌ ojri uchꞌeir e pan y e tzꞌiꞌ war ucꞌopi ucꞌuxi, che e ixic.
28 Y che e Jesús:
—Ixic, nojta war icꞌupseyan tamaren, y tamar era cꞌani achena tacaret bꞌan taca cocha war acꞌajti era, che e Jesús.
Y wacchetaca locꞌoy e mabꞌambꞌan mein tama uwijchꞌoc y tzꞌacpa.
Conda e Jesús cay utzꞌacpes meyra tin e ajmuac
29 Entonces locꞌoy e Jesús tama e lugar era y ixin xana tutiꞌ e nuxi jaꞌ Galilea. Y de allí tꞌabꞌay ixin tama inteꞌ witzir y turuan.
30 Y meyra gente cay cꞌotoyobꞌ tut. Y war uqꞌuechiobꞌ watar meyra tin e ajmuac. Y ayan tin e tzꞌej inteꞌ uyoc, y ayan tin e tajpem ut, y ayan tin e machi uyubꞌi oꞌjron, y ayan tin e matucꞌa inteꞌ ucꞌabꞌ, y ayan tin e war ucojco otronteꞌ muaquir. Y war utaresobꞌ tunor e ajmuacobꞌ era y war uturbꞌobꞌ tut e Jesús y jaxir war utzꞌacpes tunorobꞌ.
31 Y tamar era tunor e sian gente era bꞌactobꞌ conda uwirobꞌ que war oꞌjronobꞌ tin e machi ani uyubꞌi oꞌjronobꞌ, y que tin e matucꞌa ani ut ucꞌabꞌ y era ayan ucꞌabꞌ, y que tin e tzꞌej ani uyoc y era war axanobꞌ, y que tin e tajpem ani unacꞌut y era war eꞌronobꞌ. Y cay utattzꞌiobꞌ ucꞌabꞌa e Dios tuaꞌ e Israel.
Conda e Jesús uwese 4,000 winicobꞌ
Marcos 8:1-10
32 Entonces e Jesús upejca uyajcanuarobꞌ y che:
—Nen inyajta ut e sian gente era porque uxiꞌ era turobꞌ tacaron y matucꞌa ayan tuobꞌ tuaꞌ ucꞌuxiobꞌ. Y machi incꞌani inwareobꞌ tuaꞌ axiobꞌ tama uyototobꞌ bꞌan taca porque bꞌajcꞌat acucremobꞌ tama e bꞌir umen e winar, che e Jesús.
33 Pero uyajcanuarobꞌ che:
—¿Y tiaꞌ tuaꞌ catajwi e sian comida tuaꞌ cawese tunor e sian gente era tama inteꞌ choquem lugar cocha era? che uyajcanuarobꞌ.
34 Entonces e Jesús uyubꞌi tuobꞌ y che:
—¿Y jaygojr pan ayan tibꞌa? che e Jesús.
Y jaxirobꞌ chenobꞌ:
—Ayan siete ut pan y cora yarobꞌ chay, che uyajcanuarobꞌ.
35 Entonces e Jesús uyare e gente tuaꞌ aturuanobꞌ tor e cꞌopot.
36 Y de allí uchꞌami e siete ut pan y uchꞌami yar e chayobꞌ ubꞌan tama ucꞌabꞌ y cay utattzꞌi ucꞌabꞌa e Dios tamar. Y de allí cay uxere ixin taca uyajcanuarobꞌ y jaxirobꞌ upuquiobꞌ ixin taca tunor e gente.
37 Y tunorobꞌ wiobꞌ y chuanobꞌ. Y conda cꞌapa wiobꞌ cay umorojsiobꞌ lo que quetpa tama e pan y ubꞌutꞌiobꞌ siete chiquiꞌ tamar.
38 Y tin e wiobꞌ cocha era ayanobꞌ 4,000 winicobꞌ. Y ayan e ixictac y e bꞌiqꞌuit maxtac xeꞌ wiobꞌ ubꞌan.
39 Entonces e Jesús uyare e gente tuaꞌ axiobꞌ tama uyototobꞌ, y conda cꞌapa locoyobꞌ tunorobꞌ e Jesús ixin tꞌabꞌay tama inteꞌ barco taca uyajcanuarobꞌ y ixiobꞌ tor e jaꞌ esto tama inteꞌ lugar xeꞌ ucꞌabꞌa Magdala.