6
Conda e Jesús canseyan tama e ofrenda
1 Entonces che e Jesús:
—Inwiranic conda war iche lo que imbꞌutz tut e Dios que machi war iche tunor era tuaꞌ taca ixerna umen e gente. Porque jay bꞌan iche, Catata Dios xeꞌ turu tichan machi ixto tuaꞌ uyajcꞌox ituanibꞌir.
2 Y conda war iwajcꞌu inteꞌ tacarsiaj inteꞌ xeꞌ tzajtaca ut ira ixlajbꞌa tama icorneta tuaꞌ eꞌrna lo que war iche umen e gente, porque bꞌan uche tin e unatobꞌ amajresian tuaꞌ taca atajttzꞌobꞌ umen e gente. Bꞌan uchiobꞌ tama e sinagoga y bꞌan uchiobꞌ tama e calle. Pero cꞌani inwareox era que tunor tin e axin uchiobꞌ cocha era cꞌapa uchꞌamiobꞌ tunor utuanibꞌirobꞌ cocha cꞌapix tajttzꞌobꞌ umen e gente.
3 Pero nox conda iwajcꞌu inteꞌ tacarsiaj inteꞌ xeꞌ tzajtaca ut ira iware otronteꞌ tucꞌa war iche era, bꞌan cocha jay atzꞌejcꞌabꞌ machi war unata lo que war uche anojcꞌabꞌ.
4 Pero ajcꞌunic iwofrenda tzꞌustaca. Y tamar era Catata Dios xeꞌ turu tichan axin uwira lo que war iche tzꞌustaca y axin uyajcꞌox ituanibꞌir tama tunor era, che e Jesús.
Conda e Jesús ucanse uyajcanuarobꞌ cocha tuaꞌ ucꞌajtiobꞌ taca e Dios
Lucas 11:2-4
5 Entonces che e Jesús:
—Conda ixixin icꞌajti taca e Dios, ira iche cocha uchiobꞌ e ajmajresiajobꞌ, porque jaxirobꞌ achpa awawanobꞌ tama inteꞌ sinagoga tuaꞌ ucꞌajtiobꞌ taca e Dios taca inteꞌ nuxi nuc, pero uchiobꞌ cocha era tuaꞌ taca atajttzꞌobꞌ umen e gente. Y bꞌan uchiobꞌ tama inteꞌ calle tama e chinam ubꞌan. Pero cꞌani iwareox era que tamar taca era cꞌapix uchꞌamiobꞌ tunor utuanibꞌirobꞌ.
6 Pero net conda abꞌijnu tuaꞌ acꞌajti taca e Dios ira ache cocha uchiobꞌ e inmojr era, sino que ochen macuir oꞌtot y amaqui e puerta y abꞌajner cꞌajtin taca e Dios xeꞌ turu tacaret iraj iraj. Y tamar era Cadiosir xeꞌ war uwira lo que war ache tzꞌustaca cꞌani uyajqꞌuet atuanibꞌir.
7 Entonces conda war acꞌajti taca e Dios ira isutpa aware inteꞌ ojroner iraj iraj bꞌan cocha uchiobꞌ tin e machi unatobꞌ chi Cadiosir. Porque jaxirobꞌ uchebꞌiobꞌ que más tuaꞌ oꞌbꞌnobꞌ umen e Dios umen e sian ojroner xeꞌ war uchiobꞌ cocha era.
8 Ira iche ibꞌa cocha jaxirobꞌ, porque Catata Dios warix unata tunor lo que icꞌani conda ne mato icꞌajti tacar.
9 Y tamar era nox ucꞌani tuaꞌ icꞌajti taca e Dios cocha era y che:
Catata Dios xeꞌ turet tichan,
catattzꞌi acꞌabꞌa xeꞌ erach.
10 Lar tuaꞌ icꞌotori tara tor e rum wacchetaca.
Y chen lo que acꞌani tara tor e rum bꞌan cocha war ache tichan tut e qꞌuin.
11 Ajcꞌunon lo que ucꞌani tuaꞌ cacꞌuxi tama inteꞌ inteꞌ día.
12 Cꞌumpen tacaron tamar camabꞌambꞌanir lo que cay cache toit net, bꞌan cocha war cacꞌumpa taca tin e cay uchiobꞌ e mabꞌambꞌanir capater ubꞌan.
13 Ira awacton tuaꞌ capijchna sino que corpeson tama tunor ucꞌotorer e diablo. Porque net jax Careyet, y net ayan meyra acꞌotorer, y net ayan meyra atawarer xeꞌ machi tuaꞌ acꞌapa. Amén.
14 ’Porque jay nox war ixcꞌumpa taca tin e war uche e mabꞌambꞌanir ipater, entonces Catata Dios xeꞌ turu tichan axin acꞌumpa tacarox ubꞌan.
15 Pero jay machi cꞌani ixcꞌumpa taca tin e war uchiobꞌ e mabꞌambꞌanir ipater, entonces Catata Dios machix tuaꞌ acꞌumpa tacarox tama e mabꞌambꞌanir lo que cay iche nox ubꞌan, che e Jesús.
Conda e Jesús canseyan tamar e día conda machi caweꞌ tuaꞌ cacꞌajti taca e Dios
16 Entonces che e Jesús:
—Y conda machi war ixweꞌ tuaꞌ icꞌajti taca e Dios ira iche iwirnar que tzajtaquix iut, porque bꞌan uchiobꞌ e ajmajresiajobꞌ. Pues jaxirobꞌ uchiobꞌ cocha era tuaꞌ anatanwa umen e gente que machi war awiobꞌ tuaꞌ atajttzꞌobꞌ umenerobꞌ. Pero nen cꞌani inwareox era que jaxirobꞌ cꞌapix uchꞌamiobꞌ tunor utuanibꞌirobꞌ umen que tajttzꞌobꞌix umen e gente.
17 Pero net conda machi war iweꞌ tuaꞌ acꞌajti taca e Dios ucꞌani tuaꞌ uꞌstes ajor y ucꞌani tuaꞌ apoqui oit.
18 Bꞌan tuaꞌ ache tuaꞌ machi aquetpa chequer tut e gente que machi war iweꞌ tuaꞌ acꞌajti taca e Dios. Jax taca Catata Dios xeꞌ turu tacaret xeꞌ tuaꞌ unata lo que war ache era, y tamar era jax jaxir xeꞌ tuaꞌ uyajqꞌuet atuanibꞌir, che e Jesús.
Tiaꞌ tuaꞌ axin aturuan uyalma inteꞌ
Lucas 12:33-34
19 Entonces che e Jesús:
—Ira iturbꞌa ibꞌa tuaꞌ imorojse iturbꞌa meyra lo que ayan tara tor e rum xeꞌ atujri. Porque tunor era erer acꞌapa umen e max o erer axombꞌran ut o erer axujchna axin.
20 Sino que turbꞌanic ibꞌa tuaꞌ itꞌabꞌse iturbꞌa meyra lo que atujri tut e qꞌuin tichan tiaꞌ machi uyubꞌi oꞌchoy e max y nien machi axombꞌran ut y nien machi uyubꞌi tuaꞌ axujchna.
21 Y bꞌan tuaꞌ iche porque tiaꞌ turu tunor lo que ayan tibꞌa, yajaꞌ ubꞌan tuaꞌ aquetpa iwalma, che e Jesús.
Unacꞌut inteꞌ jax e janchꞌaquenar tuaꞌ ucuerpo
Lucas 11:34-36
22 Entonces che e Jesús:
—Unacꞌut inteꞌ aquetpa bꞌan cocha inteꞌ janchꞌaquenar tama ucuerpo, y jay imbꞌutz unacꞌut inteꞌ erer abꞌutcꞌa tunor ucuerpo taca e janchꞌaquenar. Y tamar era tin e axin uchꞌami niwojroner cꞌani aquetpa chequer tunor nicanseyaj tut ubꞌan.
23 Pero tin e ajmuac unacꞌut machi eꞌron, y bꞌan ubꞌan inteꞌ xeꞌ machi uchꞌami niwojroner porque cꞌani aquetpa mucur tunor nicanseyaj tut. Pues inteꞌ cocha era machi tuaꞌ uwira lo que erach sino que cꞌani aquetpa incsibꞌan tunor era tut, che e Jesús.
Tin e uturbꞌa ubꞌa tama e Dios y tin e uturbꞌa ubꞌa tama e tumin
Lucas 16:13
24 Entonces che e Jesús:
—Inteꞌ man machi uyubꞌi apatna tut chateꞌ upatron, porque jay bꞌan uche entonces e man axin uxejbꞌe ut inteꞌ upatron y axin uyajta ut otronteꞌ. Mamajchi chi erer uturbꞌa ubꞌa tama e Dios y tama e tumin ubꞌan, che e Jesús.
E Dios ucojco umaxtac
Lucas 12:22-31
25 Entonces che e Jesús:
—Cꞌani inwareox era que ira iturbꞌa ibꞌa tuaꞌ ibꞌijnu y che: ¿Tucꞌa tuaꞌ incꞌuxi? y ¿tucꞌa tuaꞌ unchꞌi? Y nien machi tuaꞌ ibꞌijnu y che: ¿Tucꞌa tuaꞌ inlapi? Porque más atujri icuxtar que lo que war icꞌuxi, y más atujri icuerpo que lo que war ilapi.
26 Bꞌijnunic tama e oror porque jaxir machi apatna, y matucꞌa umorojse tuaꞌ ucꞌuxi, y matucꞌa ugranero tiaꞌ macar ucosecha tamar, pero machi war aytzꞌa porque war awesena umen Catata Dios. ¿Y machi ca ixtujri más nox tut e Dios que incojt mut?
27 ¿Y chi tijam nox umen taca ubꞌijnusiaj tama ujor erer abꞌitzꞌa uyoc más nojta nien imbꞌijc tuaꞌ aquetpa más nojta?
28 ’¿Y tucꞌa tuaꞌ war ibꞌijnu cocha era y che: “Matucꞌa tuaꞌ inlapi?” Bꞌijnunic iwira tama unichir e cꞌopot xeꞌ machi apatna y nien machi aꞌrma.
29 Pero cꞌani inwareox era que nien e rey Salomón xeꞌ meyra usati utumin tama ubꞌujc xeꞌ galan uwirnar, pero nien jaxir machi ubꞌujcse ubꞌa bꞌan cocha inteꞌ unichir cꞌopot xeꞌ más galan uwirnar porque bꞌujcsebꞌir umen e Dios.
30 Y jay e Dios war ubꞌujcse unichir e cꞌopot cocha era xeꞌ coner chꞌur y xeꞌ ejcꞌar ayajra tama e cꞌajc, ¿machi ca uyubꞌi ubꞌujcsiox nox ubꞌan Catata Dios motor que imbꞌijc taca war ixcꞌupseyan tamar?
31 Y tamar era war inwareox que ira ibꞌijnu cocha era y che: “¿Tucꞌa tuaꞌ incꞌuxi?” y “¿tucꞌa tuaꞌ unchꞌi?” y “¿tucꞌa tuaꞌ inlapi?”
32 Porque bꞌan war ubꞌijnuobꞌ tunor e gente xeꞌ machi unatobꞌ chi Cadiosir, pero non ayan Catata Dios xeꞌ turu tichan xeꞌ war unata tunor lo que war cacꞌani.
33 Y tamar era inwareox que turbꞌanic ibꞌa tuaꞌ ixochoy tama uchinam e Dios y tuaꞌ ixquetpa erach bꞌan cocha jaxir, y tunor era cꞌani ixajcꞌuna.
34 Y ira ibꞌijnu tamar lo que cꞌani anumuy ejcꞌar, porque axin achecta ejcꞌar lo que tuaꞌ anumuy ejcꞌar. Pues tzꞌacar lo que war unumse ubꞌa inteꞌ tama inteꞌ día tuaꞌ machi ubꞌijnu tamar lo que cꞌani anumuy tama otronteꞌ día, che e Jesús.