5
Ix c'och ix Ester d'a yichan̈ vin̈ rey
1 Axo yic ix lajviec' oxe' c'ual chi', ix sb'oan sb'a ix Ester chi', ix yac'anoch spichul ix yic sreinail. Ix lajvi chi' ix c'och ix d'a jun amac' ay d'a sti' jun yed'tal vin̈ rey chi', b'aj c'ojanem vin̈ d'a sc'ojnub' yic sreyal.
2 Ayic ix yilanelta vin̈ to ayec' ix d'a stielta chi', ix sch'oxan vin̈ to stzalaj vin̈ yed' ix, ix yac'anelta sc'ococh vin̈ nab'a oro. Ix ochc'och ix, ix och yub'yub' ix d'a sn̈i' q'uen c'ococh chi'.
3 Ix sc'anb'an vin̈ d'a ix icha tic:
—¿Tas tzach ic'an reina Ester? ¿Tas tza nib'ej? Tato tza nib'ej tza c'an nan̈aloc in macb'en tic, syal vac'an d'ayach, xchi vin̈ d'a ix. Ix tac'vi ix icha tic:
4 —Mamin rey, tato syal a c'ool, ay jun nivan vael ix vac' b'ochajoc to tzach cot vael ticnaic yed' vin̈aj Amán, yujto nivan elc'och d'a yol in sat, xchi ix. Ix yalan vin̈ icha tic:
5 —Avtejeccot vin̈aj Amán d'a elan̈chamel to sc'anab'ajaj masanil tas snib'ej ix reina Ester tic, xchi vin̈.
Yuj chi' ix b'at vin̈ rey yed' vin̈aj Amán d'a jun nivan vael ix sb'o ix Ester chi'.
6 Ayic van yuc'an vino eb', ix yalan vin̈ rey chi' d'a ix icha tic:
—C'an masanil tas tza nib'ej d'ayin, ol vac' d'ayach, vach'chom tza c'an nan̈aloc in macb'en tic, syal vac'an d'ayach, xchi vin̈.
7 Ix yalan ix d'a vin̈ icha tic:
—Mamin rey, a val tas tzin nib'ej tzin c'an d'ayach aton tic:
8 Tato yel xajan in uuj, tato b'ecan a c'ol ac'an tas tzin c'ana', schaocab' a c'ol a cotxi vael q'uic'an yed' vin̈aj Amán tic. Ol in chec b'ochaj junocxo vael, yujto te nivan elc'och d'a yol in sat. Ato q'uic'an chi' sval d'ayach tas tzin nib'ej, xchi ix.
Snib'ej vin̈aj Amán smilcham‘R’vin̈aj Mardoqueo
9 Ix te tzalaj vin̈aj Amán ayic ix elta vin̈ b'aj ix och vael chi', palta ayic ix yilan vin̈ to ayec' vin̈aj Mardoqueo d'a sti' spalacio vin̈ rey chi', ix te cot yoval vin̈ yujto ayic ix ec' vin̈ ta', maj q'uelaj lin̈an vin̈aj Mardoqueo chi', maj empax n̈ojan vin̈.
10 A d'a jun rato chi' maj sch'oxel-laj schichonc'olal vin̈ chi'. Axo yic ix c'och vin̈ d'a spat, ix yavtancot juntzan̈ eb' yamigo vin̈, ix yavtanpaxcot ix yetb'eyum vin̈, aton ix Zeres.
11 Ix och ijan vin̈ yic'anchaan̈ sb'a, ix yalan jantac sb'eyumal vin̈ d'a eb', tzijtum pax yuninal vin̈. Ix yalanpax vin̈ to ix sic'chajelta vin̈ yuj vin̈ rey d'a scal juntzan̈xo eb' vin̈ ayoch yajalil yed'oc, ix ac'chajoch vin̈ yajaliloc juntzan̈ eb' vin̈ chi'.
12 Ix yalanxi vin̈ icha tic:
—An̈ejtona' a inn̈ej ix in avtajb'at vael yed' vin̈ rey d'a jun nivan vael yuj ix reina Ester. Avtab'il in pax vael yed' vin̈ rey chi' q'uic'an d'a junxo nivan vael syac' ix d'a vin̈ rey chi'.
13 Palta ayic svilanoch jun vin̈ israel scuchan Mardoqueo c'ojanem d'a sti' spalacio vin̈ rey chi', masanil juntzan̈ tas ay d'ayin tic, man̈xa jab'oc yelc'och d'a yol in sat, xchi vin̈.
14 Yuj chi' ix yal ix yetb'eyum vin̈ chi' yed' eb' yamigo vin̈ chi' icha tic:
—Ac' b'ochajem junoc te te' jun ch'an̈il tz'ajq'ue steel. Tza c'anan d'a vin̈ rey chi', axo q'uic'an q'uin̈ib'al sq'ue d'un̈an vin̈aj Mardoqueo chi' d'a te', yic vach' tzalajc'olal tzach b'at d'a jun nivan vael yed' vin̈ rey chi', man̈xa jab'oc tas tza na'a, xchi eb'.
A jun pensar chi' ix scha sc'ol vin̈aj Amán chi', ix schecan vin̈ b'ojoc jun te te' chi'.