25
Ix yalanxi vin̈aj Bildad aj Súa icha tic:
A Dios ay spoder, xivub'tac, a tz'ac'anoch junc'olal d'a scal eb' ay d'a satchaan̈.
Man̈xo b'ischajb'enoc jantac q'uen c'anal b'ob'il yuuj, ¿tom ay junoc mach b'aj max c'och saquilq'uinal yuuj?
¿Tocval ay junoc anima malaj smul d'a yichan̈ Dios? ¿Tocval ay junoc mach te vach'?
A q'uen uj malaj yoc q'uen d'a yichan̈. Axo q'uen c'anal man̈ vach'oc q'uen d'a yol sat.
Ocxo val on̈ anima on̈ tic, lajan on̈ icha noc' a'ay, xchi vin̈aj Bildad chi'.