8
Sizi k'an 'et náwhulnuk degha nus dézti unli hoh dude 'ut'en k'ah huwaghúna
1 'Aw 'et njan daja uzdani, soo ts'ah'un na'a t'ewhunoohzeh nuhts'u húkwa 'uzninzun, nuwheni neba náwhulnuk degha nus dezti ts'it'i, ndun yak'uz k'us úncha, 'en bukw'usúda cho dézti, 'i nalhnih ts'ih yughu nátl'adeda.
2 Ndi ndai bun cho neMoodihti nené'ai, 'i ts'ah'un na'a 'uhoont'ah. 'I 'aw dune ilah neni'ai. 'Et huwa 'udéni bun bet whubez, 'et degha nus whudézti ts'ih, 'et chah Sizi Gri neba ne'ut'en.
3 'Et ndunnah náwhulnuk degha nus dézti hinli, 'en Yak'usda bukw'uzdai k'ut 'udelhk'un 'ink'ez hoonliyaz Yak'usda bugha hóo'alh huba' hoont'ah. 'Et whuz na'a ndun dune bughu yats'ulhtuk, 'en chah hoonli huwa óo'alh huba' hoont'ah.
4 'Et lhanah nawhulnuk ndi yun k'ut, 'en nts'e na'a Moses bughunek k'una'a, 'et whuz na'a 'et nduhút'en. 'Et huwa Sizi Gri 'awhuz ndi yun k'ut usda t'eh, 'aw da náwhulnuk chailah wule.
5 Ndunnah bun cho t'ah ts'ih dune huba ne'hut'en t'eh, 'et ndi bun cho 'et yak'uz whuz'ai, 'et whunduhúl'en ho' hut'en. 'I yak'uz dahoont'ah 'et whunduhúl'en li'hut'en. Hoh da Moses bun cho nité'alh hoh, Yak'usda yudáni, “Nts'e dzulh k'ut bun cho nitélts'ulh whunyunelhtan, 'et wheni bughá ne'tant'en, 'i mba 'usdla, 'i k'una'a 'onleh. 'Et nts'e na'a whúnyunelhtan, nduhóolcho hoh whuz na'a 'onleh!”
6 'Et whunts'ih Sizi Gri ndunnah 'o nus soo huba ne'út'en suli. Ndi degha nus hoonzoo khunek nets'u lhaídinla, 'i, 'et huwa Sizi Gri 'en hubéguz unli. Yak'usda 'o nus hoonzoo k'una'a nets'ú hoozi, 'et whuz na'a neba 'uhóonla.
K'andit khunek nets'u lhaídinla
7 'Et njan khunek 'udechoo khunek hubuts'u lhaídinla, 'i huba hoolhtus, 'aw hik'unecha'ít'il. 'Et huwa 'i bugha dune Yak'usda nalh ts'ah'un cha'hit'ah. 'Et huwa doo chah whulh nat nets'u nahezya.
8 'Ink'ez Yak'usda, 'en ts'iyawh hukwa' hubudáni. 'Et whuz na'a bughunek 'uk'e'edúguz hoh njan ndutni,
“Sih soo zélhts'ai, 'ilhudzin whuz de whélts'ulh,
'et whusawhélts'ut t'eh,
'et Israel hubuyun k'ut húdelhts'i,
'ink'ez Judah hubuyun k'ut húdelhts'i, 'en chah
njan k'andit khunek huba lhaídutesdlilh.
9 Hoh da dunnah 'udechoo khunek huba lhaídusdla,
'et whulh nat 'aw hukw'u na'a cha'whutést'il.
'Et hoh da hubula ílhchoot
'ink'ez Egypt yun k'ut hukw'u nabutéla.
'Et whunts'ih sughunek 'aw chahiyílhchulh,
'et huwa hubula desnik.
10 Et hukw'elh'az Israel buzkehkah soo k'andit,
'i khunek huba lhaídutesdlilh.
Ndez na'a ndótet'ilh, suk'ah ts'ih 'et hubeni taóodutesdlelh,
'ink'ez hubudzi k'ut chah 'uk'e'tesgus.
'Ink'ez si hubuYak'usda tesdleh,
'ink'ez 'en sudune hutele.
11 Hoh t'eh ts'iyawh 'ilhunuh hinli hoh 'uskehyaz
'ink'ez ye 'un hudedoh bulh 'ilho, Si t'esontezeh.
'Et datést'ilh,
'et huwa hubéghah whut'i,
k'us dudulhutsinkah 'aw 'ilhunuh whunts'i,
doo chah zeh ‘neMoodihti bugha hoodulh'eh!’ hudooni huba cha'hoot'ah.
12 'Et dáhoont'ah 'aw ts'ah'un cha'hust'en t'eh,
'et huwa bugha té'unteszeh.
'Ink'ez hubulubeshi 'ink'ez sk'unúcha'ust'en,
'et 'i ts'iyawh 'o 'un 'aw huba whunaoolhunih ghait'ah.”
13 'Et huwa Yak'usda ndi soo k'andit khunek neba lhaídinla, 'i howu yailhtuk, 'et dája ni hoh ndutni, 'i bugha njan 'udechoo khunek huba lhaídinla, 'i 'aw hoh cha'hoot'ah suli, 'et huwa Yak'usda neba lhk'enaooda'ai, 'ink'ez 'udechoo khunek huba lhaídinla 'aw 'o 'un buk'une' ts'oot'en ghait'ah.