3
John dune too be 'ulh'en ts'iyannah, “NeMoodihti buti buba lhaoodahleh” ndo búlhni
'Aw 'et Caesar Tiberius, 'en yun k'ut ndulhcho hoh hubudayi cho inle. Lanezi 'o 'at skwunlai naoodezulh (15) ant'e. 'Et Pontius Pilate, 'en Judea yun k'ut whumoodih unli. Herod, 'en Galilee yun k'ut whumoodih unli. Bulhutsin Philip, 'en Iturea 'ink'ez Trachonitis yun k'ut whumoodih unli. 'Ink'ez Lysanius, 'en Abilene yun k'ut whumoodih unli. Annas 'ink'ez Caiaphas, 'en nawhulnuk degha nus dézti 'uhint'ah. 'Et whughah whudézulh whutah 'et John, 'en Zacharias buye', 'en dune chahóot'ih ts'ih usda hoh Yak'usda bughunek buk'édilts'ut. 'Et Jordan koh 'et whunat nuya hoh dune hubulh yalhtuk too be' hooneh ka hukwa. 'Et whebunulhtun dulubeshi ch'a bubeni náhubudunoolelh ka. 'Et hoh lubeshi buba hoolah yutelhtsilh. 'Et whuz na'a Isaiah bughunek 'uk'e'eduguz 'et njan ndutni,
“Dune chahóot'ih ts'ih dune yiz dusduts'ai, 'et 'ultus hahuyih hoh njan ndutni,
‘NeMoodihti buti lhaoodahleh!
Buti soo lhk'e oodez'a buba whulhtsi!
Too k'oh totsuk naoodutebun.
Dzulh 'ink'ez dzulhyaz bulh ts'iyawh lhgha yuk na'tetnilh.
Whudélyah 'et chah lhk'enaoodutedukih.
Yun nudest'ai 'i chah lhgha na'whutétnilh.
'Ink'ez nts'e na'a Yak'usda dune ulhyis, 'et ts'iyannah hontelh'ilh.”
John dune too be 'ulh'en, 'en dune hubulubeshi hubugha khunek ulhtus 'i be ndo búlhni
Dune lhanah yughu nindel too be' hutenilh hukwa' huninzun. 'Et ndo búlhni, “Nuhwheni poison tl'ughus buzkehkah li'aht'ah. Yak'usda lubeshi 'ulh'en hubulh húntelch'oh 'et whuz de whélts'ulh, ndan 'un whúlhni whuch'a lhúwus? Nuhwhulubeshi ch'a nuwheni náhundunehla t'eh, nuhwhe 'ut'en be ts'iyannah whebunoolhtun nuhwhulubeshi buladehtnik. 'Ink'ez khun lhts'un njan dudoohtni gunih wheni Abraham hits'uh hats'ánde 'uts'int'ah. 'Alha ts'ah'un na'a 'un whudusni, Yak'usda soo 'ultus ho' 'int'ah, ndi tse 'i whunts'ih 'i be Abraham buts'uh hahánde hubutelhtsilh. Njan soo cho whunulh'en, nuhwheni duchun lí'aht'ah. 'Aw 'et tsetsilh ba lhadínt'ah. 'Et nuhwheni bulunah duchun bumai hoolah, 'et ndaht'ah. K'an whunts'ih ndai bumai hoolah, 'i tsetsilh be bughih tubulh tahídantsel 'ink'ez hidutélhk'un.” 10 'Ink'ez dune ts'iyawh hiyoodulhkut, “Ink'ez nts'e na'a simba dats'óoneh.” 11 'Et ndo búlhni, “Ndan dzoozt'an nankoh 'ut'i, ndan dzoozt'an chait'ih, 'en 'ilhuk'i yugha óolhchoos. 'Ink'ez ndan ts'uyi 'ut'i, 'en chah whuz na'a zeh ndóneh.” 12 Ndunnah sooneya 'ilhunanowes'aih, 'en chah too be' hutenilh ka hits'uh whusaindel 'et hiyoodulhkut, “Whuneodulh'eh nts'e na'a daztenilh?” 13 'Et ndo búlhni, “Ndet ndanéltsuk hutni télhcholh huba' hoont'ah, 'et 'aw 'o 'un chawhuzóolhchoot.” 14 Nehughan, 'en chah hiyoodulhkut, “Nuwheni do daztenilh.” 'Et ndo búlhni, “Khun nuhwheni dune sooneya nuhgha hóo'alh huboolhtsilh gunih! Khun dune whuts'it be buk'éhoh'alh gunih! 'Ink'ez ndet daneltsuk nuhwhuba k'elha whútele, 'aw 'et hóht'i huba' hoont'ah!” 15 Ts'iyannah hoonliyaz hukwa tsi huholi. 'Et budzi be dahoont'ah simba John 'en bugha, ndun Christ ts'utni, 'en tulih 'int'ah k'us 'awundooh. 16 John ts'iyawh 'et ndo búlhni, “Too zeh 'i be too bé' nuhwhulh'en. 'Et whunts'ih sk'elh'az whusateyalh, 'en sughanus dezti ho' 'int'ah. 'Aw buke tl'oolh buba lhk'unadutes'uk 'et whunts'ih huba soo cha'ust'ah. Ndun 'en Ndoni 'ink'ez kwun bulh 'i be too be' 'un whutelilh. 17 Be tl'o nuldzeh tl'o mai be tahawhúlts'it, 'i lhaídilhdzun. 'Ink'ez ndi tl'o mai yuk'ut tahawhúlhts'it, 'i chah yuk'ut lhadút'ih t'eh, 'ink'ez yuna'ulhdoh. 'Ink'ez ndi mai lhaduja, 'i ts'iyawh denúdzih 'ink'ez mai bakoo ts'ih wheyúlih. 'Et whunts'ih ndi kwun 'aw nachanusneh, ndi but'ooz 'i be duték'un,” hubúlhni. 18 Ndi Khunek 'ink'ez 'uyoo khunek 'i bulh 'et whuz na'a khunek ulhtus, 'i be hubudáni. 19 'Aw 'et ndi yun k'ut whumoodih Herod, 'en 'ilhunuh 'int'ah. 'En dulhutsin Philip bu'at 'en yuzih usda. John 'uyúlhni, “Lubeshi 'ilh'en.” 'Udun tink'us na'a chah 'ut'en. 'Et chah ts'iyawh lubeshi 'uhoont'ah yulhni. 20 'Et ndi lubeshi 'uyulh'en, 'i 'uyoo chah yuts'u na'whuleh hoh John 'en tsak'eya'ai.
Sizi too be 'úlya
21 'Aw 'et ts'iyannah dune too be 'úlya. Sizi 'en chah too be 'uyínla. Tenawhéndunidli 'i bulh yat'ah dá'dutezkez, 22 'ink'ez Ndoni dut'aiyaz, dove hiyulhni, 'i k'una'a ndus de hát'o 'ink'ez yuk'eít'o. 'Et nduk yak'uz khunek huduzts'ai, 'i ndutni, “Nyun suYe' nk'esi' 'unint'ah. Tube nyulh hoonúst'i.”
Sizi hubuts'u haiyanzut
23 'Et Sizi tat lanezi naoodezut bat'en suli (30), 'aw 'et whe'dít'en. Ts'iyannah 'en Joseph buye' huninzun.
'Ink'ez 'en Heli buye'.
24 'En Matthat yuts'uh hainzut,
'en Levi yuts'uh hainzut,
'en Melchi yuts'uh hainzut,
'en Janna yuts'uh hainzut,
'en Joseph yuts'uh hainzut.
25 'En Mattathiah yuts'uh hainzut
'en Amos yuts'uh hainzut,
'en Nahum yuts'uh hainzut,
'en Esdli yuts'uh hainzut,
'en Naggai yuts'uh hainzut.
26 'En Maath yuts'uh hainzut,
'en Mattathiah yuts'uh hainzut,
'en Semei yuts'uh hainzut,
'en Joseph yuts'uh hainzut,
'en Judah yuts'uh hainzut.
27 'En Joannas yuts'uh hainzut,
'en Rhesa yuts'uh hainzut,
'en Zerubbabel yuts'uh hainzut,
'en Shealtiel yuts'uh hainzut,
'en Neri yuts'uh hainzut.
28 'En Melchi yuts'uh hainzut,
'en Addi yuts'uh hainzut,
'en Cosam yuts'uh hainzut,
'en Elmodam yuts'uh hainzut,
'en Er yuts'uh hainzut.
29 'En Jose yuts'uh hainzut,
'en Eliezer yuts'uh hainzut,
'en Jorim yuts'uh hainzut,
'en Matthat yuts'uh hainzut,
'en Levi yuts'uh hainzut,
30 'En Simeon yuts'uh hainzut,
'en Judah yuts'uh hainzut,
'en Joseph yuts'uh hainzut,
'en Jonan yuts'uh hainzut,
'en Eliakim yuts'uh hainzut,
31 'En Melea yuts'uh hainzut,
'en Menan yuts'uh hainzut,
'en Mattatha yuts'uh hainzut,
'en Nathan yuts'uh hainzut,
'en David yuts'uh hainzut,
32 'En Jesse yuts'uh hainzut,
'en Obed yuts'uh hainzut,
'en Boaz yuts'uh hainzut,
'en Salmon yuts'uh hainzut,
'en Nahshon yuts'uh hainzut,
33 'En Amminadab yuts'uh hainzut,
'en Ram yuts'uh hainzut,
'en Hezron, yuts'uh hainzut,
'en Pharez yuts'uh hainzut,
'en Judah yuts'uh hainzut,
34 'En Jacob yuts'uh hainzut,
'en Isaac yuts'uh hainzut,
'en Abraham yuts'uh hainzut,
'en Terah yuts'uh hainzut,
'en Nahor yuts'uh hainzut,
35 'En Serug, yuts'uh hainzut,
'en Reu yuts'uh hainzut,
'en Peleg yuts'uh hainzut,
'en Eber yuts'uh hainzut,
'en Salah yuts'uh hainzut,
36 'En Cainan yuts'uh hainzut,
'en Arphaxad yuts'uh hainzut,
'en Sem yuts'uh hainzut,
'en Noah yuts'uh hainzut,
'en Lamech yuts'uh hainzut,
37 'En Methuselah yuts'uh hainzut,
'en Enoch yuts'uh hainzut,
'en Jared yuts'uh hainzut,
'en Mahalaleel yuts'uh hainzut,
'en Cainan yuts'uh hainzut,
38 'En Enos yuts'uh hainzut,
'en Seth yuts'uh hainzut,
'en Adam yuts'uh hainzut,
'ink'ez 'en Yak'usda yuts'uh hainzut.