3
Ri ruch'abel ri Dios can ta xtiyo'ox ruk'ij
Vacami c'a, rix ri junan kaniman ri Jesucristo iviq'uin, tibana' orar koma, richin quiri' cha'anin ni'e rutzijol y niyo'ox ruk'ij ruch'abel ri Ajaf, achel xbanataj chi'icojol rix. Tic'utuj che ri Dios chi roj man nkuka pa quik'a' itzel tak achi'a' ri mana-ta ri utz uc'uayon quichin, roma man conojel ta quiyo'on cánima riq'uin ri utzulaj ch'abel ri nikatzijoj.* Jac'a ri Ajaf can nu'on-vi ri ru'in. Rija' can xtuya' ivuchuk'a' y xquixruchajij* chuvech ri itzel. Y roj cukul kac'u'x chi rix, riq'uin chi xa jun ibanon riq'uin ri Ajaf, yixtajin riq'uin ri xka'ij can chive, y man xtiya' ta can rubanic. Xtu'on ta c'a ri Dios chi xtijo' rija' achel yixrojo'* rix, y chi yixcoch'on achel xcoch'on ri Jesucristo.
Nic'atzin chi nkusamaj y mani nkuk'oran
Pero pa rubi' ri Kajaf Jesucristo yixkapaxa'aj rix ri junan kaniman ri Jesucristo iviq'uin, chi man chic quixbin* riq'uin xa achique na jun ri runiman ri Jesucristo, pero xa man jun ruchojmil ri ruc'aslen ruc'uan, jun c'aslen ri man achel ta ruchojmil ri c'aslen kac'utun can chivech. Roma rix mismo iveteman chi can utz vi chi ni'en pan ic'aslen achel ri xka'an roj tok xojc'uje' chi'icojol. Mana-ta jun c'aslen ri man jun ruchojmil ri xkac'uaj chivech.* Nis-ta man jun achok che xka'ij-vi chi xe quiri' kurutzuku'. Chi chak'a' chi pak'ij xkatij kak'ij xojsamaj,* richin quiri' nis-ta jun chive xkaya' eka'n chirij. Quiri' xka'an, man roma ta chi manak kak'a'* chi xkac'utuj kato'ic chive, xa richin chi ja ri kac'aslen roj mismo nic'utu chivech ri achique chi c'aslen nic'atzin nic'uaj.* 10 Roma tok xojc'uje' iviq'uin, xka'ij chive chi xa achique na jun ri man nrojo' ta nisamaj,* man c'a tiva'. 11 Roma kac'axan chi ec'o jujun chi'icojol ri quic'uan jun c'aslen ri man jun ruchojmil, man jun samaj niqui'en, xaxe niquik'ok'ola-qui' pa tak tzij ri manak qui-cuenta che. 12 Ri yebano quiri', yekapaxa'aj y nika'ij chique pa rubi' ri Ajaf Jesucristo, chi ekal tiquibana' ri quisamaj* richin niquich'ec ri niquitij. 13 Y rix ri junan kaniman ri Jesucristo iviq'uin, man quixcos ni'en ri utz. 14 Jac'a si c'o jun man nrojo' ta nunimaj ri ka'in-e chupan ri vuj re', tic'utu' ri jun ri' chiquivech conojel, y man chic tic'uje'* chi'icojol, richin quiri' tiq'uix. 15 Pero man itzel titz'et. Xa tipaxa'aj,* achel jun chique ri junan iniman ri Jesucristo quiq'uin.
Ri ruq'uisbel tak ch'abel che ri vuj re'
16 Ri Ajaf ri mismo rajaf ri uxlanen, can ta jumul xtuya' uxlanen pan ivánima rix, chupan xa achique na ri nik'asaj pan ic'aslen. Ri Ajaf xtic'uje' ta c'a iviq'uin chi'ivonojel.*
17 Ri saludo re', riq'uin nuk'a' yin Pablo nin-en-vi-e,* y jari' retal chi ja yin ri yitakon-e ri vuj re' chive, roma yin can quire' vi yitz'iban, y ronojel ri vuj yentak, quire' nin-en-e chique. 18 Ri ru-favor ri Kajaf Jesucristo xtic'uje' ta c'a iviq'uin chi'ivonojel. Amén.
* 3:2 Ro. 10:16. * 3:3 Jn. 17:15; 2 P. 2:9. * 3:5 1 Jn. 4:16. * 3:6 Ro. 16:17; 1 Co. 5:11; 2 Jn. 10. * 3:7 1 Ts. 1:5. * 3:8 Hch. 18:3; 20:34; 1 Co. 4:12. * 3:9 Mt. 10:10; 1 Co. 9:6. * 3:9 1 P. 5:3. * 3:10 Gn. 3:19; Pr. 13:4; 1 Ts. 4:11. * 3:12 Ro. 12:11; Ef. 4:28. * 3:14 1 Co. 5:1, 2. * 3:15 Lv. 19:17; Gá. 6:1; 1 Ts. 5:14. * 3:16 Ro. 15:33. * 3:17 1 Co. 16:21.