4
Roma c'a ri', tikaxi'ij-ki', utz ri c'a quiri' na nisuj chike chi c'o che'el nkujoc chupan ri uxlanen ri nusuj ri Dios. Man xa tibanataj chi c'o jun chive ri xa man ntoc ta chupan ri uxlanen ri'.* Quiri' nin-ij chive, roma achel xtzijos chike roj ri utzulaj ch'abel ri nu'ij achique ruchojmil nikil ri uxlanen, quiri' mismo ri ojer, xtzijos ruchojmil ri uxlanen chique. Pero man jun utz xuq'uen-pe chique chi xquic'axaj ri ch'abel, roma man xcuke' ta quic'u'x* riq'uin ri xquic'axaj. Jac'a roj ri cukul kac'u'x riq'uin ri rutzijol, can nkujoc-vi chupan ri uxlanen ri nusuj ri Dios, achel xuc'uxlaj rija' tok quire' xu'ij:
Ja tok catajnak voyoval chiri', xin-en jurar y xin-ij:
Man jun bey xtinya' lugar chique chi xque'oc pan uxlanen viq'uin.*
Quiri' xu'ij ri Dios, masque rija' xe tok xuq'uis can rubanic ri roch'ulef, ruchojmirisan can ronojel. Roma chupan ri tz'iban can, quire' nu'ij pa ruvi' ri séptimo k'ij: Ri Dios tok xuq'uis can rubanic ronojel ri xrojo' chi xtz'ucutaj can, xuxlan che ri samaj ri' chupan ri séptimo k'ij.* Y achel ri xin-ij yan ka, ri Dios quire' xu'ij chiquij ri man xeniman ta: Man jun bey xtinya' lugar chique chi xque'oc pan uxlanen viq'uin, xcha'. Y roma k'alaj chi c'a c'o na che'el ye'oc chic ch'aka' chupan ri uxlanen ri sujun, y roma xa man xe'oc ta ri israelitas ri achok chique xyo'ox-vi na'ey ri utzulaj rutzijol ri uxlanen ri' roma man xeniman ta;* romari' tok xk'ax q'uiy tiempo, ri Dios xusuj chic jun bey ri uxlanen. Roma ri Dios xuya' pa ránima ri David chi xu'ij ri ch'abel ri xin-ij yan ka ri quire' nu'ij:
Si vacami niya' ixiquin che ri nu'ij ri Dios chive,
Man ticovirisaj ri ivánima.*
Quiri' xuya' ri Dios pa ránima ri David.
Roma xa ta ri Josué* xuya' ri kitzij uxlanen chique rutinamit ri Dios pa roch'ulef Canaán, ri Dios man ta chic xucha' jun k'ij pa ru-tiempo ri David richin xusuj chic jun bey ri uxlanen. Y romari', roj ri roj rutinamit ri Dios, c'a c'o na jun uxlanen kichin, achel xuxlan rija' chupan ri séptimo k'ij. 10 Roma ri ocunak chic pan uxlanen riq'uin ri Dios, ja jun rija' uxlanak chuvech samaj, achel xuxlan ri Dios chuvech ri rusamaj.
11 Roma c'a ri', tikatija' kak'ij chi nkujoc pan uxlanen riq'uin ri Dios, richin quiri' nis-ta jun xtuxutuj-e-ri' riq'uin xa roma man niniman ta,* achel xquixutuj-e-qui' ri kati't-kamama' ojer can. 12 Roma ri ch'abel ri nu'ij ri Dios, can q'ues, y c'o ruchuk'a'* richin nu'on samaj, y más c'o rey que chuvech jun ch'ich'* ri ca'i' c'o-vi rey. Roma ri ch'abel ri' nitiquer nujak ri ivánima* y ri i-espíritu, y ri achique lugar quiyukulu'n-vi-qui' ri ibakil, y ri rupan ri ibakil, y nrelesaj-pe pa sakil* ronojel ri nik'ax pan ivánima y ronojel ri ninojij chi ni'en. 13 Y man jun achique ruq'uiytisan ri Dios ri man ta k'alaj chuvech, xa k'alaj rij-ruvech ronojel chuvech ri Jun achok chuvech xteka'ij-vi ronojel ri xka'an-e pa kac'aslen.
Ri Jesús, jari' ri Nimalaj Sacerdote
14 Vacami c'a, roj ja ri Jesús ri Ruc'ajol ri Dios ri ocunak Nimalaj ka-Sacerdote* chuvech ri Dios chila' chicaj. Roma c'a ri', cof kuc'uje' chupan ri utzulaj ch'abel ri kaniman y nikatzijoj. 15 Roma ri Nimalaj ka-Sacerdote reteman achique nikana' tok manak kuchuk'a',* y nupokonaj kavech, roma achel ri jalajoj rubeyal ri nicanox chikij richin nkuka pa mac,* quiri' mismo xucusaj ri itzel richin can ta xrojo' xutakchi'ij pa mac rija', pero rija' man jun bey xu'on jun mac.* 16 Roma c'a ri', cukul kac'u'x kujel-apu* riq'uin ri Dios ri tz'uyul pa nimalaj tz'uyubel ri nilitaj-vi favor, richin quiri' nikil rupokonaxic kavech riq'uin, y nikil ri kato'ic ri nic'atzin.
* 4:1 He. 12:15. * 4:2 He. 3:18. * 4:3 He. 3:18. * 4:4 Gn. 2:2; Ex. 20:11. * 4:6 He. 3:19. * 4:7 Sal. 95:7, 8. * 4:8 Hch. 7:45. * 4:11 He. 3:12, 18, 19. * 4:12 Jer. 23:29. * 4:12 Ap. 1:16; 2:16. * 4:12 1 Co. 14:24, 25. * 4:12 Ef. 5:13. * 4:14 He. 3:1; 7:26. * 4:15 Is. 53:3. * 4:15 Lc. 22:28. * 4:15 2 Co. 5:21; 1 P. 2:22. * 4:16 He. 10:19, 22.