Ri xek'alajrises chuvech ri apóstol San Juan
1
Ri Jesucristo nuk'alajrisaj ri achique xquebanataj
Jare' ri xuk'alajrisaj* ri Dios chuvech ri Jesucristo, richin chi rija' tuk'alajrisaj chiquivech ri rusamajela' ri achique nuc'un chic chi quitzeklelo'n-qui' xquebanataj. Romari' ri Jesucristo xutak jun ru-ángel* richin xuk'alajrisaj chuvech ri Juan ri rusamajinel. Y ri Juan nuk'alajrisaj chupan ri vuj re' chi can kitzij ri nu'ij ri Dios, chi can kitzij ri xu'ij ri Jesucristo, y chi can kitzij ronojel ri xutz'et.* Utzulaj tzij ri' ri nibano leer, y ri ye'ac'axan* ri ch'abel ri ruk'alajrisan ri Dios chupan ri vuj re' richin yerunimaj* ri etz'iban chupan, roma nakaj chic c'o-vi ri k'ij chi xquebanataj.
Ri Juan c'o nu'ij-e chique ri vuku' iglesias pa roch'ulef Asia
Yin Juan nintz'ibaj-e ri vuj re' chive rix ri rix vuku' iglesias ri iniman ri Jesucristo y nimol-ivi' richin niya' ruk'ij chupan tak tinamit richin ri roch'ulef Asia. Can ta xticochij favor y uxlanen che ri Dios ri can c'o-vi-pe,* c'o vacami y xtic'uje' ri más chikavech apu, xticochij chique ri vuku' espíritu ri ec'o-apu chuvech ri nimalaj rutz'uyubal, y xticochij che ri Jesucristo, ri man jun bey nujal rutzij riq'uin ri ruk'alajrisan. Ja rija' ri na'ey xc'asos-e chiquicojol ri anima'i'* richin xc'uje' ruc'aslen richin jumul, y c'o pa quivi' ri reyes richin ri roch'ulef. Rija' can nkurojo',* xojruch'ajch'ojij chuvech ri kamac riq'uin ri xbin ri ruquiq'uel,* y xu'on chike chi junan nika'an gobernar riq'uin,* y chi roj sacerdotes richin nika'an ri rusamaj ri Dios ri Rutata'. Ja rija' tiyo'ox ruk'ij, y jumul-jumul tic'uje' pa ruvi' ronojel. Amén.
Titz'eta' na pe', ri Jesucristo xtipe pa tak sutz'.*
Conojel xquetz'eto ruvech, ja jun ri xesoco* richin.
Conojel quivech vinak choch'ulef xque'ok' tok xtiquitz'et.
Ja', can quiri' vi xtibanataj.
Ri Ajaf Dios, ri c'o ronojel uchuk'a' pa ruk'a' y can c'o-vi-pe, c'o vacami y xtic'uje' ri más chikavech apu, quire' nu'ij: Yin, yin achel ri A y ri Z, roma ja yin ri na'ey y ri ruq'uisbel che ronojel.*
Ri Jesucristo nuk'alajrisaj-ri' chuvech ri Juan
Yin, yin Juan, ri junan kaniman ri Jesucristo iviq'uin, ri nuk'asan k'axomal achel ik'asan rix,* ri junan rojc'o pa ru-gobierno ri Dios, y junan nikacoch' ri nikak'asaj roma xa jun kabanon riq'uin ri Jesús. Yin xic'uje' pa jun ch'uti roch'ulef rubinan Patmos ri c'o pa mar. Chiri' xiyo'ox-vi roma ruch'abel ri Dios y roma nink'alajrisaj ri Jesucristo. 10 Y chupan ri k'ij richin ri Ajaf, yin xic'uje' pa ruk'a' ri Lok'olaj Espíritu y achel pa jun achic'* xinvac'axaj chi chuvij c'o jun kulaj cof nich'o-pe ri achel navac'axaj jun trompeta, 11 ri quire' xu'ij-pe chuve: Yin, yin achel ri A y ri Z, roma ja yin ri na'ey y ri ruq'uisbel che ronojel.* Tatz'ibaj c'a chuvech vuj ronojel ri natz'et, y chique vuku' iglesias pa roch'ulef Asia tataka-vi-e: chique ri aj-Efeso, ri aj-Esmirna, ri aj-Pérgamo, ri aj-Tiatira, ri aj-Sardis, ri aj-Filadelfia y ri aj-Laodicea. Quiri' ri xu'ij chuve.
12 Jac'ari' xitzu'un can chuvij richin nintz'et achok kulaj ri nich'o-pe chuve. Y tok yitzu'un chic apu riq'uin, xintz'et vuku' candeleros* banon riq'uin oro. 13 Pa quinic'ajal ri vuku' candeleros pa'el jun achel ri Jun ri xtak-pe richin xalex chikacojol,* rucusan jun tziek ri neka c'a chirakan ka, y ruximon roruc'u'x che jun ximibel banon riq'uin oro.* 14 Ri (rujolon, ruvi') y ri rusumal tak ruvi' me'x-me'x* achel jun sakilaj rusumal oveja, y achel rusakil ri tef ri nika, y ri runak'-ruvech, achel ruxak-k'ak'.* 15 Ri rakan yetz'intz'ot achel ri ch'ich' bronce tok jabel jukun ruvech,* (nic'a'on, nic'o') achel rachak-k'ak'. Y ri ruch'abel nivujuj, achel nivujuj jun nimalaj rakan-ya'.* 16 Pa ruk'a' derecha ruc'uan vuku' ch'umil. Jac'a ri pa ruchi' ntel-pe jun espada* ri can sima'j rutza'n, y ca'i' c'o-vi rey. Y ri nitzu'un, can achel ri k'ij tok nich'ich'an riq'uin ruchuk'a'.
17 Y tok yin xintz'et, achel jun caminak xitzak-ka chirakan.* Jac'ari' tok rija' xuya' ri ruk'a' derecha pa nuvi' y xu'ij chuve: Man taxi'ij-avi'; ja yin ri na'ey y ri ruq'uisbel che ronojel.* 18 Ja yin ri c'o nuc'aslen, y xik'ax chupan ri camic, pero vacami c'o nuc'aslen jumul-jumul. Amén. Yin c'o nuk'a' che ri camic y c'o nuk'a' che ri lugar ri c'o-vi ri cánima ri anima'i'. 19 Tatz'ibaj ri xatz'et, tatz'ibaj ri achique najin vacami, y tatz'ibaj ri xquebanataj chirij ronojel re'. 20 Ri vuku' ch'umil ri xe'atz'et pa nuk'a' derecha, y ri vuku' candeleros ri banon riq'uin oro, jare' ri ruchojmil: Ri vuku' ch'umil, ja ri vuku' nusamajela' ri ec'o pa quivi' chiquijununal ri vuku' iglesias, y ri vuku' candeleros, ja ri vuku' iglesias ri'.
* 1:1 Jn. 12:49. * 1:1 Ap. 22:6, 16. * 1:2 1 Jn. 1:1-3. * 1:3 Pr. 8:34; Lc. 11:28. * 1:3 Ap. 22:7. * 1:4 Ex. 3:14; Jn. 1:1. * 1:5 Ef. 1:20; Col. 1:18. * 1:5 Jn. 13:34. * 1:5 He. 9:14. * 1:6 Ap. 5:10; 20:4, 6. * 1:7 Dn. 7:13. * 1:7 Zac. 12:10; Jn. 19:37. * 1:8 Is. 41:4; 43:10. * 1:9 Ro. 8:17. * 1:10 Hch. 10:10. * 1:11 Ap. 1:17; 2:8; 22:13. * 1:12 Ex. 25:37; Zac. 4:2. * 1:13 Dn. 7:13; Fil. 2:7, 8; He. 2:14; Ap. 14:14. * 1:13 Dn. 10:5. * 1:14 Dn. 7:9. * 1:14 Ap. 2:18. * 1:15 Ez. 1:7. * 1:15 Ez. 43:2. * 1:16 Is. 49:2. * 1:17 Ez. 1:28; Dn. 8:18. * 1:17 Is. 41:4; 44:6.