14
Ri quibix ri 144,000
Tok nutz'eton chic ronojel re', yin Juan xintz'et ri Alaj Oveja* pa'el pa ruvi' ri juyu' Sion, y riq'uin rija' ec'o ciento cuarenta y cuatro mil* ri tz'iban rubi' rija' y ri rubi' ri Rutata' nic'aj-quivech. Jari' tok c'o jun kulaj xinvac'axaj ri petenak chicaj, ri achel nivujuj jun nimalaj rakan-ya',* y achel rukul jun nimalaj rayo. Ri kulaj ri xinvac'axaj can achel tok yek'ojoman ri niquik'ojomaj arpas.* Conojel rije' niquibixaj jun c'ac'ac' bix* chuvech apu ri nimalaj tz'uyubel y chiquivech ri nima'k quijuna' achi'a', y chiquivech ri (caji', quiji') c'o quic'aslen ri nojnak quij-quivech riq'uin runak' tak quivech. Ri bix ri niquibixaj, man jun chic nitiquer neteman, xaxe ri ciento cuarenta y cuatro mil ri xelok'otaj chic chiquicojol ri vinak choch'ulef. Ri ciento cuarenta y cuatro mil re', jare' ri man xeka ta pa mac quiq'uin ixoki'; xa can ch'ajch'oj ri quic'aslen.* Ja rije' ri etzekleyon ri Alaj Oveja xa achique na lugar ni'e-vi. Ja rije' ri xelok' chic chiquicojol ri vinak, richin ye'oc na'ey tak ruvech tico'n* chuvech ri Dios y chuvech ri Alaj Oveja. Rije' xe'ilitaj chi man jun tz'ucun tzij elenak pa quichi',* can ech'ajch'oj* ec'o-apu chuvech ri nimalaj rutz'uyubal ri Dios.
Ri nik'alajrises coma oxi' ángeles
Jac'ari' xintz'et chic jun ángel ri niropop petenak pa runic'ajal ri caj, y ruc'amon-pe ri utzulaj ch'abel ri nu'ij achique ruchojmil yecolotaj ri vinak, ri ch'abel ri richin jumul c'o.* Y jari' ri nuya' rutzijol ri ángel chique ri vinak choch'ulef,* ri jalajoj quivech, jalajoj cati't-quimama', jalajoj quich'abel, y jalajoj quitinamit. Ri ángel riq'uin ruchuk'a' nu'ij: Tixi'ij-ivi' chuvech ri Dios, y tiya' ruk'ij, roma ri k'ij richin nunic'oj ronojel ch'utik-nima'k xuka yan. Tiya' c'a ruk'ij ri banayon ri caj* y ri roch'ulef,* ri mar* y ri alaxbel tak ya', nicha'.
Jac'ari' tzekle'en-pe roma jun ruca'n ángel ri quire' nu'ij: Xq'uis yan ruk'ij, xq'uis yan ruk'ij ri siq'uisel tinamit Babilonia,* roma rubanon chique conojel quivech vinak choch'ulef chi ja jun rije' quitijon-ka royoval ri Dios ri catajnak pa quivi' junan quiq'uin ri aj-Babilonia ri niquicusaj ri qui-cuerpo richin yec'uje' xa achok riq'uin na, nicha'.
Jac'ari' etzekle'en-pe roma jun rox ángel ri riq'uin ruchuk'a' nu'ij: Si c'o jun xtiyo'on ruk'ij ri na'ey chicop y ri ruvachibel, y si niyo'ox retal nic'aj-ruvech o chirij ruk'a',* 10 ri xtibano quiri', ja jun rija' xtika royoval ri Dios* pa ruvi'; c'aslic ri royoval ri Dios xtika pa ruvi'. Xtuk'asaj k'axomal chupan ri k'ak' y azufre chiquivech ri lok'olaj ángeles y chuvech ri Alaj Oveja. 11 Y ri rusibel ri k'ak' ri achok chupan ec'o-vi ri niquik'asaj k'axomal, jumul-jumul nibukuk chicaj.* Romari' ri yeyo'on ruk'ij ri na'ey chicop y ri ruvachibel, y xa achique na ri niyo'on lugar chi niyo'ox retal riq'uin rubi' ri chicop, manak uxlanen richin, xa chi chak'a' chi pak'ij c'o pa k'axomal, nicha'.
12 Vave' nikatz'et-vi chi nic'atzin yecoch'on* ri erichin ri lok'olaj rutinamit ri Dios, conojel ri yeniman ri ru-mandamiento,* y quiyo'on-apu cánima riq'uin ri Jesús.
13 Jac'ari' yin Juan xinvac'axaj jun kulaj petenak chicaj ri quire' nu'ij-pe chuve: Tatz'ibaj ri xtin-ij: Vacami nitiquer-e chi utzulaj tzij nu'on ri Dios chique conojel ri xa jun quibanon riq'uin ri Ajaf tok (yecom, yequen),* xcha'. Y ri Lok'olaj Espíritu xu'ij: Ja', can kitzij chi quiri', xcha'. Roma xque'uxlan* chuvech ri quisamaj y xtiyo'ox rajil-ruq'uexel chique ronojel ri xquibanala'.
Ri tico'n ri xk'at-e chuvech ri roch'ulef
14 Tok yin xitzu'un chic apu, xintz'et jun sutz' sak ri achok pa ruvi' tz'uyul-vi jun ri achel ri Jun ri xtak-pe richin xalex chikacojol,* rucusan jun corona banon riq'uin oro, y pa ruk'a' ruc'uan jun vósa ri can c'o rey. 15 Xel chic c'a pe jun ángel pa racho ri Dios ri riq'uin ruchuk'a' quire' nu'ij-apu che ri tz'uyul pa ruvi' ri sutz': Tak'ok'oj ri vósa chuxe' ri tico'n,* roma ja xuka ri hora richin ri k'atoj roma ri tico'n richin ri roch'ulef xa k'an chic, nicha'. 16 Jac'ari' tok ri tz'uyul pa ruvi' ri sutz' can quiri' vi xu'on, xucusaj ri ruvósa chuvech ri roch'ulef, richin xuk'at-e ri tico'n.
17 Jac'ari' xel chic pe jun ángel pa racho ri Dios chicaj. Ri ángel re' ruc'amon-pe jun chic vósa ri can c'o rey. 18 Quiri' mismo riq'uin ri altar xel chic pe jun ángel ri c'o ruk'a' che ri k'ak'. Ri ángel re' riq'uin ruchuk'a' xch'o-apu che ri ángel ri uc'uayon ri vósa ri can c'o rey, y xu'ij: Tacusaj ri avósa* c'o rey, richin ye'amol ri tzekaj tak uva chuvech ri roch'ulef, roma ri uva echak' chic, xcha'. 19 Y ri ángel ri uc'uayon ri vósa, can quiri' vi xu'on. Xucusaj ri vósa chuvech ri roch'ulef, xerumol ri vinak achel yemol ri tzekaj tak uva, y xeruya' chupan ri nimalaj yitz'el richin ri royoval ri Dios.* 20 C'a tzanjay e che ri tinamit* x-an-vi ri yitz'oj, y ri najin-vi ri yitz'oj,* xel c'a pe quic' ri jani na xcheme' y xjote' c'a achique lugar c'o-vi ri ch'ich' pa quichi' ri quiej, y xbin más oxi' ciento kilómetros rakan.
* 14:1 Jn. 1:29. * 14:1 Ap. 7:3, 4. * 14:2 Ap. 1:15. * 14:2 Ap. 5:8. * 14:3 Ap. 5:9. * 14:4 2 Co. 11:2. * 14:4 Stg. 1:18. * 14:5 Sof. 3:13. * 14:5 Sal. 32:2; Jud. 24. * 14:6 Tit. 1:2. * 14:6 Mt. 28:19; Ef. 3:9. * 14:7 Sal. 33:6. * 14:7 Sal. 95:5; 124:8. * 14:7 Ex. 20:11; Neh. 9:6; Hch. 14:15. * 14:8 Is. 21:9; Jer. 51:8; Ap. 16:19; 17:5; 18:2. * 14:9 Ap. 13:15, 16. * 14:10 Sal. 75:8; Jer. 25:15. * 14:11 Is. 34:10. * 14:12 Ap. 13:10. * 14:12 Ap. 12:17. * 14:13 Ec. 4:1, 2; 1 Co. 15:17, 18; 1 Ts. 4:16; Ap. 20:6. * 14:13 Is. 57:2; 2 Ts. 1:7; He. 4:9. * 14:14 Ez. 1:26; Dn. 7:13. * 14:15 Jer. 51:33; Jl. 3:13; Mt. 13:39. * 14:18 Jl. 3:13. * 14:19 Ap. 19:15. * 14:20 He. 13:12. * 14:20 Is. 63:3; Lm. 1:15.