☰ Apocalipsis 4
4
Ri Dios niyo'ox ruk'ij chila' chicaj
1 Tok nutz'eton chic ronojel re', jari' xitzu'un-apu y xintz'et jun puerta jakal ri chila' chicaj, y ri na'ey kulaj ri xinvac'axaj ri achel rukul jun trompeta,* quire' chic xu'ij-pe chuve: Quire' cajote-pe, y yin xtinc'ut chavech ri can xquebanataj na vi chirij re c'a ja xatz'et.* 2 Jac'ari' xic'uje' pa ruk'a' ri Lok'olaj Espíritu,* y achel pa jun achic' xintz'et jun nimalaj tz'uyubel banon rubanic chicaj, y c'o Jun tz'uyul chupan.* 3 Ri tz'uyul chupan, can achel nitzu'un ri abaj jaspe y ri abaj cornalina, y ri nimalaj tz'uyubel siriren rij roma jun arco iris* rex-rex nitzu'un achel ri abaj esmeralda ni'ix che. 4 Ri nimalaj tz'uyubel ri' pa quinic'ajal veinticuatro chic utzulaj tz'uyubel c'o-vi, y xentz'et veinticuatro* nima'k quijuna' achi'a' quicusalo'n sakilaj tak tziek y coronas ebanon riq'uin oro, chi rije' chi jujun etz'uyul chupan ri utzulaj tak tz'uyubel.* 5 Chupan ri lugar c'o-vi ri nimalaj tz'uyubel, yek'alajin-pe coyopa',* yec'axataj rayos y kulaj, y ri chuvech apu, yec'at vuku' antorchas,* y ri' ja ri vuku' espíritu richin ri Dios.
6 Chuvech ri nimalaj tz'uyubel c'o jun achel mar* chay-chay nitzu'un y nitz'intz'ot. Y xe tak ruxiquin ri nimalaj tz'uyubel, ec'o (caji', yaquiji') ri c'o quic'aslen* ri nojnak quij-quivech riq'uin runak' tak quivech. 7 Ri na'ey, achel jun león, ri ruca'n achel jun alaj váquix, ri rox achel (ruvech, rupalaj) jun vinak, y ri rucaj, achel jun xic tok benak chicaj.* 8 Chiquijununal, ri c'o quic'aslen re', c'o vakitak quixic', y nojnak rij-ruxe' ri quixic' riq'uin runak' tak quivech, y chi chak'a' chi pak'ij quire' niqui'ij:
Lok'olaj, lok'olaj, lok'olaj ri Ajaf Dios,
Ri c'o ronojel uchuk'a' pa ruk'a',*
Ri can c'o-vi-pe, c'o vacami y xtic'uje' richin jumul,*
yecha'.
9 Y jun bey jun bey, tok ri c'o quic'aslen quiri' niquibila' richin niquinimirisaj rubi', y niquiya' ruk'ij y niquimatioxij che ri Jun ri c'o ruc'aslen jumul-jumul,* y tz'uyul pa nimalaj tz'uyubel,* 10 jari' tok ri veinticuatro nima'k quijuna' achi'a', yexuque-ka chuvech* ri tz'uyul pa nimalaj tz'uyubel, y niquiya' ruk'ij ri can jumul-jumul c'o ruc'aslen. Niquiyala-apu ri qui-coronas chuvech ri nimalaj tz'uyubel, y quire' niqui'ij:
11 Kajaf Dios, rat can nuc'ul-vi
Chi nac'ul nimalaj ak'ij, chi can c'o-vi avakale'n y chi can c'o-vi uchuk'a'* pan ak'a'.
Roma ja rat xabano ronojel,
Y roma xanojij chi quec'uje',* romari' xebanalo'x.
* 4:1 Ap. 1:10. * 4:1 Ap. 1:1, 19. * 4:2 Ez. 3:12; Ap. 17:3; 21:10. * 4:2 Is. 6:1; Jer. 17:12; Ez. 10:1; Dn. 7:9. * 4:3 Ez. 1:28. * 4:4 Ap. 5:8, 14. * 4:4 Ap. 11:16. * 4:5 Ez. 1:13. * 4:5 Ex. 37:23; 2 Cr. 4:20; Zac. 4:2. * 4:6 1 R. 7:23; Ap. 15:2. * 4:6 Ez. 1:5-14. * 4:7 Ez. 1:10; 10:14. * 4:8 Is. 6:2, 3. * 4:8 Ap. 1:4, 8. * 4:9 Ap. 10:6; 15:7. * 4:9 Sal. 47:8. * 4:10 Ap. 5:8, 14. * 4:11 Ap. 5:9, 12. * 4:11 Ap. 10:6; 14:7.
☰