6
Riyoj ri can junan c'a yojsamej* riq'ui ri Dios chubanic ri samaj chicojol riyix, can nikachilabej c'a chiwe chi can tik'alajin pan ic'aslen ri rutzil ri Dios ri ic'ulun y ma tiben ta chare chi xa majun rejkalen. Ruma ri Dios rubin chupan ri ruch'abel ri tz'ibatal ca:
Tek xberila' ri ruk'ijul riche (rixin) chi nben ri utzil, xatinwac'axaj.
Y tek xberila' ri ruk'ijul ri colotajic, xatinto'.
Queri' ri tz'ibatal ca.
Wacami c'a ri' ruk'ijul riche (rixin) chi nuben ri utzil ri'. Y wacami c'a ri' ruk'ijul ri colotajic.
Riyoj can nikatij wi c'a kak'ij riche (rixin) chi majun etzelal ri nitz'etetej ta chikij; ma nikajo' ta c'a chi kuma ta riyoj yetzak ri winek y ma niquinimaj ta ri ruch'abel ri Dios. Riyoj ma nikajo' ta c'a chi queri' nibanatej, riche (rixin) chi ma tiyok'otej ta chuka' ri samaj ri yojtajin chubanic.§ Riyoj can nikac'ut wi c'a ki' chi yoj rusamajel* ri Dios, y yari' ri nibin chi can utz wi chi yojc'ul ri acuchi (achique) yojapon wi. Can nik'alajin wi chi yoj rusamajel ri Dios ruma sibilaj kacoch'on kawech chupan ri rusamaj, kak'axan tijoj pokonal, kacoch'on tek c'o q'uiy rajawaxic chake, kacoch'on tek c'o k'axon ri yepe chikij. Riyoj yoj ch'ayon cuma ri winek, yoj ya'on pa tak cárcel, ye yacatajnek winek chikij, sibilaj samaj kabanon, kacoch'on waran, kacoch'on wayjal. Kac'uan chuka' jun c'aslen ch'ajch'oj, ketaman ri ruch'abel ri Dios, nikacoch' ronojel ri pokon ri niquiben ri winek chake, utz kana'oj nikaben quiq'ui ri winek, yekajo' quinojel ri winek y ma riq'ui ta ca'i' kapalej, y c'o chuka' ri Lok'olaj Espíritu kiq'ui. Riyoj can ya ri kitzij nikatzijoj, y c'o chuka' ri ruchuk'a' ri Dios kiq'ui. Can choj chuka' ri kac'aslen ri kac'uan, yac'ari' ri nito'o kiche (kixin) tek yec'o yeyacatej pe chikij. Xabacuchi (xabachique) yebeyacatej wi pe, wi yepe pa kajquik'a' o yepe pa kajxocon. Riyoj yec'o chuka' winek ri yeya'o kak'ij, pero chuka' can ye q'uiy ri majun kak'ij chiquiwech. Yec'o ri jabel yetzijon chikij, pero can yec'o chuka' ri xa itzel yetzijon chikij. Y yec'o chuka' ri yebin chi riyoj xa ma ya ta ri kitzij ri nikabij, astape' riyoj can ya ri kitzij ri nikabij. Yec'o ri niquiben chake chi achi'el xa ma quetaman ta kawech, pero xa jabel etaman kawech.§ Can yoj rutzekelben ri camic,* pero xa c'a yoj q'ues na. Yoj ya'on pa tijoj pokonal, pero ma yoj caminek ta. 10 Y astape' c'o bis, xa can yojquicot chuka'. Riyoj yojc'o pa meba'il,§ pero c'o nikaya' chique nic'aj chic, riche (rixin) chi yebeyomer. Y astape' chuka' chi xa majun c'o kiq'ui, xa can yojcowin nikabij chi can ronojel c'o kiq'ui. Y ronojel c'a re' nuc'ut chi can yoj rusamajel wi ri Dios.
11 Riyoj can ronojel c'a ri c'o pa kánima ri nikabij chiwe riyix kach'alal ri yixc'o chiri' pa Corinto. Y kas kitzij wi c'a chi yixkajo' riq'ui ronojel kánima. 12 Riyix can yixkajo' wi riq'ui ronojel kánima, yac'a riyix xa ma que ta ri' ri iwánima* kiq'ui riyoj, ruma ma can ta yojiwajo'. 13 Riyin yich'o c'a iwuq'ui achi'el nuben jun tata'aj quiq'ui ri ralc'ual, y nbij c'a chiwe chi can kojiwajo' chuka' riyoj, achi'el ri nikaben riyoj iwuq'ui riyix, riche (rixin) chi queri' junan nikajo' ki'.
Riyoj ri kaniman ri Jesucristo can yoj rachoch c'a ri c'aslic Dios
14 Riyix man c'a titun ta iwi' quiq'ui ri winek ri xa ma quiniman ta ri Cristo, ruma ma junan ta ic'aslen quiq'ui. Ruma, ¿la can jabel cami nuc'uaj ri' jun c'aslen choj riq'ui jun c'aslen ri xa ma choj ta? ¿La can junan ta cami c'a ri sakil riq'ui ri k'eku'm riche (rixin) chi niquic'uaj qui'? 15 ¿La can niquic'uaj cami qui' ri Cristo riq'ui ri Belial ri nibix chuka' Satanás chare? ¿O can majun cami rucojol jun ri runiman ri Cristo riq'ui jun ri xa ma runiman ta? 16 ¿La can jabel cami nuc'uaj ri' ri rachoch ri Dios quiq'ui ri dios ri xa ye banon cuma winek? Ruma riyix can yix rachoch wi ri c'aslic Dios. Ri Dios can queri' wi c'a rubin:
Xquic'oje' y xquibiyin c'a quiq'ui.
Riye' can xque'oc wi c'a nutinamit
y riyin xquinoc qui-Dios.§
17 Rumac'ari' riyix can nich'o wi c'a chuka' ri Ajaf chiwe y nubij c'a:
Quixel c'a pe chiquicojol ri ma ye wuche (wixin) ta riyin.
Ma tic'uaj ta iwi' quiq'ui y ma tichop ta apo ri c'aslen ri xa tz'il,*
riche (rixin) chi queri' riyin yixinc'ul.
18 Riyin xquinoc c'a Tata'aj iwuche (iwixin) riyix
y riyix xquixoc numi'al walc'ual.
Quec'ari' nubij ri Ajaf ri nicowin nuben ronojel.
* 6:1 1 Co. 3.9. 6:1 He. 12.15. 6:2 Is. 49.8. § 6:3 1 Co. 9.12. * 6:4 1 Co. 4.1. 6:5 2 Co. 11.23, 24. 6:7 Mr. 16.20; Hch. 11.21; 1 Co. 2.4; Ef. 1.19, 20; He. 2.4. § 6:9 2 Co. 5.11. * 6:9 1 Co. 4.9. 6:9 Sal. 118.18. 6:10 2 Co. 7.4. § 6:10 2 Co. 8.9. * 6:12 2 Co. 12.15. 6:13 1 Co. 4.14. 6:14 Dt. 7.2, 3; Ef. 5.7. § 6:16 Lv. 26.12; Jer. 31.33; 32.38; Ez. 11.20; 36.28; 37.27; Zac. 8.8; 13.9; 1 P. 2.5. * 6:17 Is. 52.11; Ap. 18.4. 6:18 Jer. 31.1, 9; Ap. 21.7.