15
Re je vuku' ángeles re xque'yi'o re tijoj-pokonal pa rue' re ruch'ulef
Y c'are' xintz'at che jec'o je vuku' ángeles re xe'k'alajin chicaj y can man jun bey chuka' je'tz'eton-ta. Re vuku' ángeles re' yi'on ja'jun tijoj-pokonal pa quik'a' chin che ye'bequik'aja-pa tak xtapon re k'ij. Y ja ruq'uisibal tak tijoj-pokonal re' re nuya' re Dios pa rue' re ruch'ulef. Roma jare' re ruyoval re Dios re xtujamak'ij pa quive' re man xe'niman-ta richin.
Y chuka' yen xintz'at che c'o jun ancha'l mar re ancha'l vidrio titzu'un, xalon riq'uin k'ak'. Y jec'o je'pa'al pa rue'. Conojel re je'pa'al pa rue' re ancha'l mar, ja re man xe'ka-ta pa ruk'a' re nabey itzel chicop y re ru-imagen, y chuka' man xquijo-ta che xya' qui-seña o re ru-número re rube' re itzel chicop nic'aj-quivach o chij quik'a'. Y conojel re' je'pa'al pa rue' re ancha'l mar, je'quic'ualon arpas, y re arpas re' chin re Dios. Y niquibixaj re rubix re Moisés re rusamajel re Dios y re rubix re Jesucristo re ancha'l oveja. Y ja quire' niquibij:
Kajaf Dios, rat can jac'a re nima'k tak cosas re man jun bey je'tz'eton re ya'ban,
y c'o ronojel poder pan ak'a'.
Can katzij y choj re abey,
y ja rat re yat qui-Rey conojel re can je avajc'ual chic.
Can conojel niquixibij-qui' chavach,
y conojel chuka' niquiya' ak'ij rat re yat Kajaf.
Y xaxe c'a rat re ac'uan jun ch'ajch'oj c'aslen.
Y mare' can che jun ruch'ulef xtipa chuyi'ic ak'ij,
roma xquitz'at y xk'alajin-yan chiquivach che can pa rubiyal naban juzgar.
Quire' niquibij.
Y tak ntz'eton chic-ka ronojel re', xintz'at che chicaj xjakataj re jay re anche' nuc'ut-va-ri' re Dios. Y chire' xe'be'el-va-pa re je vuku' ángeles re yi'on ja'jun tijoj-pokonal pa quik'a'. Y re quitziak re je'quicusalon, ja re tziak re nibex lino cha, jun tziak camas sak y chuka' can niyiq'uiloj. Y chiquic'o'x k'axnak jun cinturón re banon cha k'anapuak. Y jare' tak jun chique re je caje' re camas q'uiy quinak'avach c'o, can cada jun chique re vuku' ángeles xuyala-a ja'jun copa re banon cha k'anapuak chique, y re copas re' can je'nojnak-a riq'uin re andex rubanic re tijoj-pokonal re nuya' re Dios. Ja Dios re' re nojel tiempo c'o.
Re rachoch re Dios chila' chicaj can xnoj riq'uin jun ancha'l sib, ja seña re' chin nik'alajin re ruk'ij y re ru-poder re Dios. Y can man jun nitiquir ndoc-apo chire' pa rachoch. Xa can c'aja tak c'achojnak chic can ruyi'ic re vuku' tijoj-pokonal coma re ángeles.
15:1 Ap 14.10; 16.1; 21.9. 15:2 Ap 4.6. 15:2 Ap 13.15. 15:3 Ex 15.1. 15:3 Dt 32.4; Os 14.9. 15:4 Ex 15.14. 15:5 Ap 11.19. 15:5 Nm 1.50. 15:6 Ex 28.6; Ez 44.17. 15:7 Ap 4.6. 15:8 Ex 40.34; 1 R 8.10; 2 Cr 5.14. 15:8 Is 6.4. 15:8 2 Ts 1.9.