☰ APOCALIPSIS 9
9
1 Y jare' tak re ro' ángel xuxipuj re ru-trompeta, y xintz'at che c'o jun ancha'l ch'umil re xbetzak-pa chila' chicaj y xka chach re ruch'ulef. Y pa ruk'a' reja' xya-va re llave chin re moma' sivan re rion k'oko'm rupan.✡ 2 Re jun ancha'l ch'umil re', xbo'rjaka-pa ruchi' re moma' sivan rion k'oko'm rupan. Y chupan re moma' sivan re' camas sib xbe'el-pa, can ancha'l re sib ndel chupan jun moma' horno. Re sib re xbe'el-pa chupan re moma' sivan re camas k'oko'm rupan, xutz'apij rach re k'ij✡ y chuka' xunojsaj rach re rocaj. 3 Y chupan re sib re' xe'be'el-pa sac',✡ y xe'ba pa rue' re ruch'ulef. Y xban chique re sac' re' che xe'oc ancha'l alacranes, roma can niquiban ch'a'oj ancha'l niquiban re alacranes. 4 Y xbex chique che man tiban✡ ch'a'oj chique re che', re tico'n y re k'ayis.✡ Xa can xe chique re vinak re manak qui-seña nic'aj-quivach✡ tibana-va ch'a'oj, roma xa can man je richin-ta re Dios. 5 Pero man chin-ta che ye'quiquimisaj re vinak, xaxe chin che ye'quiya' pa k'axomal vo'o' ic'. Y re k'axomal re', can ancha'l re k'axomal re niquiya' re alacranes tak niquich'op can jun vinak. 6 Y jac'a k'ij re' tak re vinak xtiquicanola' quicamic roma re k'axomal niquik'asaj, pero xa can man jun andex xtiquic'alvachij. Camas-va xtiquirayila' re quicamic,✡ pero re camic xa xtinumaj chiquivach.
7 Y re sac' re', ancha'l qui-forma re quiej✡ re banon chic quibanic chin ye'ba pa guerra. Re pa quijalom c'o jun ancha'l corona re banon cha k'anapuak, y re quipalaj can ancha'l quipalaj vinak. 8 C'o chuka' rusumal quive' can ancha'l re rusumal quive' re ixoki'. Re rocay ancha'l rocay re león.✡ 9 Re quic'o'x can ancha'l ch'ich'. Re quixic' camas ye'k'ajan, can ancha'l che camas je q'uiy carruajes je'kararen coma quiej, y jonanin je'binak chin ye'ba pa guerra.✡ 10 Re quijay ancha'l quijay re alacranes, y chutza'n c'o-va re quich'ut. Y riq'uin re quich'ut re' ye'tiquir ye'quiya' pa k'axomal re vinak, vo'o' ic'. 11 Y re qui-Rey✡ re sac' re', ja re ángel re rujoval re moma' sivan k'oko'm rupan. Re qui-Rey re sac' re' Abadón nibex cha re pa kach'abal yoj re yoj israelitas, y Apolión nibex cha re pa quich'abal re vinak aj-Grecia.
12 Xk'ax re jun tijoj-pokonal re',✡ pero c'a nuban falta ca'e' chic.
13 Y tak re ruvakak ángel xuxipuj re ru-trompeta, xinc'axaj jun ch'abal re xel-pa chiquicojol re caje' ec'ua' re jec'o chach re altar re banon cha k'anapuak,✡ re altar re' ja re c'o-apo chach re Dios. 14 Y re ch'abal re' xubij cha re ruvakak ángel re xipun re trompeta: Ca'sola' c'a-a re je caje' ángeles re je'ximon can chuchi' re namalaj rakan-ya' rubini'an Eufrates,✡ xcho'x.
15 Y can xe'besol-va can re je caje' ángeles, chin che ye'quiquimisaj re vinak. Roma re je caje' ángeles re' can je preparados-va chin re hora, re k'ij, re ic' y re juna' re'. Y can xque'quiquimisaj jun tercera parte re vinak re jec'o chach re ruch'ulef. 16 Y re soldados camas je q'uiy y quire' chuka' re quiej.✡ Y c'are' yen Juan xinc'axaj che re soldados jec'o je doscientos millones. Y quire' chuka' re quiej.
17 Y tak yintajin chubanic re ancha'l achic' re', ja chire' tak xe'ntz'at re quiej.✡ Y re je'ch'ocolbeyon quichin re quiej re', je'quiyalon ch'ich' chutak quic'o'x chin niquiban defender-qui', y re qui-color re ch'ich' re' quiak, k'an y azul. Y re quiquiej re je'quich'ocolben man choj-ta rujalom quiej, xa ancha'l quijalom re leones,✡ y re pa quichi' ndel-pa k'ak', sib y azufre. 18 Y ja re k'ak', re sib y re azufre re ye'el-pa pa tak quichi' re quiej, jare' re xbano che xe'com jun tercera parte chique re vinak re jec'o chach re ruch'ulef. 19 Re quiej re', ja riq'uin re quichi' y riq'uin re quijay✡ niquiban-va ch'a'oj, roma pa quichi' ndel-va-pa k'ak', sib y azufre. Y re quijay ancha'l cumatz, mare' can ja chuka' riq'uin re quijay ye'ch'apon-va.
20 Jac'a re vinak re c'a xe'c'ase-na can re man xka-ta re tijoj-pokonal re' pa quive', cama-va xtzolaj-ta-pa quic'o'x riq'uin re Dios. Xa can c'a xe'quibanala' re itzel tak banabal.✡ C'a xe'quiyala' quik'ij re itzel tak espíritu,✡ xe'quiyala' quik'ij re imágenes re je'quibanon✡ cha k'anapuak, cha sakapuak, cha aboj, cha che' y cha re jun ch'ich' nibex bronce cha. Jare' re xe'quiyala' quik'ij re vinak re', y re ye'quiyala' quik'ij reje', xa man ye'tzu'un-ta, man niquic'axaj-ta y chuka' man ye'biyin-ta. 21 Y re vinak re' cama-va xtzolaj-ta-pa quic'o'x riq'uin re Dios, chin che man-ta chic ye'quimisan, chin che man-ta chic xe'quiban re itz y re elak', y chin chuka' che re achi'a' y re ixoki' man-ta chic xquicanola-qui' chin ye'macun, pero xa man quire-ta xquiban, can man jun bey xquiya-ta can rubanic re itzel tak banabal.
✡ 9:1 Ap 17.8; 20.1. ✡ 9:2 Jl 2.2, 10. ✡ 9:3 Ex 10.4. ✡ 9:4 Ap 6.6; 7.3. ✡ 9:4 Ap 8.7. ✡ 9:4 Ez 9.4; Ap 14.1. ✡ 9:6 Job 3.20-22; 7.15; Is 2.19; Os 10.8; Ap 6.16. ✡ 9:7 Jl 2.4. ✡ 9:8 Sal 57.4; Jl 1.6. ✡ 9:9 Jl 2.5. ✡ 9:11 Jn 8.44; 12.31; 14.30; Ef 2.2; 2 Ts 2.3-10. ✡ 9:12 Ap 8.13. ✡ 9:13 Ex 30.3; Ap 8.3. ✡ 9:14 Gn 2.14; 2 S 8.3; Jer 51.63; Ap 16.12. ✡ 9:16 Ez 38.4. ✡ 9:17 Is 5.28. ✡ 9:17 1 Cr 12.8. ✡ 9:19 Is 9.15. ✡ 9:20 Dt 31.29; 2 Cr 28.22; Jer 5.3. ✡ 9:20 Dt 32.17; Sal 106.37. ✡ 9:20 Sal 115.4; Is 2.8; Jer 44.8; Dn 5.23; Hch 17.29.
☰