13
A pipwoééhe
Hemepie é cihe
he ni pwooti te ni apulie
ke ni *âcélo,
ke me tieden dong a pipwoééhe,
ke é te ju pwohewii
a kiloon na taii,
ai a mekapwa na tanahi*.
+Hemepie etong
me é cihe ne he nii Padué,
ke me é temehi
nina e ha aduwo,
ke me etong
ati a bwo temehinaado,
ke me etong ati a céihi,
beme é pitaatééhi
ni amu ne ni juwole,
ke hemepie time uce
eânimung de ni béén,
ke te ju piticenaado ne kong.
Hemepie é patihi ni dong
ne te nina menelé,
ke me é ne a ééng
beme cini,
ke hemepie time uce
eânimung de ni béén,
ke te ju piticenaado ne kong.
He ade a pipwoééhe?
A pipwoééhe,
ke e ucéihi,
ke e picani te ni béén,
ke time e uce pitaaba,
ke time e uce pipii den,
ke time uce upwonimen.
A pipwoééhe,
ke time e uce pwo celi tanim,
ke time e uce pihane den,
ke time e uce okéé,
ke time e uce cile ni ta
na lé pwo ne kon ne ni béén.
+Time e uce pituume ko a ta,
kehe e pituume ko a juuju.
+A pipwoééhe,
ke e pineuhi ati,
ke e cile a céihi
na ati he ni bwomunen,
ke e mu ucéihi ati,
ke e pé ne kon ati.
E te mu dieli mwo
Ke time e uce mele
a pipwoééhe.
Ke o tieden ni pwooti
na pii ne he nii Padué.
Ke o tieden ni pwooti
na te pi-ité.
Ke o tieden
a bwo temehinaado.
Ke genye te ju temehi
a céiu duaan.
Ke genye te ju pii
a céiu duaan
ne he nii Padué.
10 Ke hemepie e bo âbé
ana ju wâé,
ke bo tieden
ana time uce hején.
 
11 He mwo woéo
pa cuwo nahi ewa,
ke é cihe pwohewii
pa cuwo nahi ewa,
ke é niimihi pwohewii
pa cuwo nahi ewa,
ke é pitautinaado pwohewii
pa cuwo nahi ewa.
Ke he é caa apulie,
ke caa nebwén na é pwohewii
ni bwomu te pa cuwo nahi ewa.
 
12 Be é jenaa,
ke time genye uce alihi ehi,
ke nye alihi pwohewiin
ne ha apiocile na caa au.
Kehe é alecehen,
ke genye bo ju alihi gaale.
Ke é jenaa,
ke é te ju temehi a céiu duaan.
Kehe é alecehen,
ke é bobe temehi pwohewiin
he e temehiéo wo Padué.
 
13 +Lé mu lépwo naado ce cié:
a céihi,
a piuca,
ke a pipwoééhe.
Kehe ana junihe piubwo
hadenii ninaa,
ke a pipwoééhe.
* 13:1 13.1 Mekapwa na tanahi—Grek: Cymbale na pwo tihin. + 13:2 13.2 Mataio 17.20 13:3 13.3 Beme cini—ai Beme é pipii dong. Time uce pwéélang he pwo grek. + 13:6 13.6 Roma 12.9 + 13:7 13.7 1 Pétéru 4.8 13:12 13.12 É bobe temehi—Grek: Nye bo alieng gaale ne ha a ju bwo weeng. + 13:13 13.13 1 Tésalonik 1.3