La Carta a Los
Hebreos
1
Jaboqui tsi noqui chanihi quiha Dios jahuë Baquë yoí no
1 Siri tsi quiha noba naborëquëbo qui Dios chanipaoniquë. Toatiyá tsi quiha joni bo, naa jahuë Chani yoacanaibo ja raapaoniquë nohiria bo qui. Toca tsi Dios Chani nohiria bá nica-nicapaoni quiha toatiyá no. Huëstima ca jato qui ja yoani quiha toca ca quiniá no.
2 Jama, jaboqui, naa jaroha ca barí tsi quiha jahuë Baquë yoi Diós raaniquë noqui chaniti. Jabi jahuë Baquë yoi Diós bini quiha jatiroha ca ibohuati. Jasca, jahuë Baquë yoí tsi naa mai, naipa, jahuë bo tëquë, tihi cabo Diós nëhohuaniquë.
3 Jahuë Baquë tsi xo toa Dios oquë-oquëria jismahaina ra. Jasca, Dios jabi yoi, jahuë jaria, tihi cabo jaya ca tsi xo naa. Jahuë chaní tsi jatiroha ca otohi quiha. Ja tsi xo toa noba jocha quima noqui bahuënish cato. Noqui bahuëhax tsi quiha jahuë mana ca iti bichi ja caniquë. Jaboqui mana ca Chama-chamaria mënëcayá tsi tsaho xo.
Angel bo oquë xo Dios Baquë
4 Jabi ángel bo oquë-oquëria jahuë Baquë acacaniquë ra. Tsayacahuë. ¿Angel ba janë oquë ma ni jahuë janë ra? “Dios Baquë” ja quënahacani quiha. Toa janë tsi jahuë ángel bo quënahacapistiayamariani quiha.
5 “Noho Baquë yoi xo mia ra:
Jaboqui oquë, chama, tihi cabo mi qui axëquia”
¿i huësti ca ángel qui Dios ni pa? Iyamapistiariajani quiha. Jasca,
“Noho Baquë xo mia ra;
Jaboqui mia oquëhuaxëquia”
¿i huësti ca ángel qui Dios ni pa? Iyamahi quiha.
6 Jama, mai qui jahuë baquë yoi raapama tsi,
“Noho Baquë yoi bësojó tsi mënixëti xo ángel bo tëquë”
i Dios ni quiha.
7 Yonati bo roha ca xo. Jabi ángel bo yoati tsi Dios chanini tsi xo naa:
“Jahuë ángel bo, naa jahuë yonati bo manëmahi quiha Dios, yoshini, chihi, tihi cabo jascaria iti”
ii quiha ángel bo yoati na.
8 Jama, nëca tsi jahuë Baquë chama yoati tsi Dios chanini quiha:
“Naama-naamapaoxëhi quiha mi otohaina, Diós,
Mëstë tsi jatiroha cabo yonaxëqui mia ra.
9 Jia ca ati noiqui mia ra.
Tsohuëcaracá pi yoi ca ano tsi caxa xo mia.
Ja tsi xo toa mia biquia, naa mi Ipa Dios.
Ja tsi xo toa mi rabëti bo tëquë oquë tsi mia shomahuaquia ra”
i jahuë Baquë qui Dios ni quiha.
10 Jasca, “Ibo” jahuë Baquë quënahacani quiha ra, naa,
“Jariapari tsi mai mi nëhohuaniquë, Ibobá”
i ja qui Dios niquë no.
Jasca,
“Naipá ca bari, oxë, huishti bo, tihi cabo mi aniquë mi chamá no.
11 Huësti barí tsi yamatapixëhi quiha mi nëhohuanina.
Jama, chitë-chitëpaohai ca mia xo naa.
Raiti jascaria tsi sirinaxëhi quiha toa mi nëhohuanina.
12 Toa naipá ca jahuë bo biquirihaxëqui mia ra, naa colcha biquirihacacahai jascaria.
Jama, mia ri tsi xo jaharisiria.
Rarinayamaqui mia.
Yama tsi xo mi año rëso ra”
nëa tsi jahuë Baquë qui Dios nëcani quiha.
13 Jasca,
“Noho mënëcayá tsi tsahona”
¿i jëni ca ángel qui Dios ni pa?
“Mi qui caxacanaibo bëboxëquia jato mi yonano”
¿i ángel qui Dios ni pa?
Iyamahi quiha.
14 Jabi Dios ángel bo tsi xo toa jahuë yonati bo roha. Jahuë Chani bocani quiha. Jasca, noqui ja raahacani quiha, naa noqui mana ca qui bocaxëcanaibo mëbiti.