LA CARTA A LOS
HEBREOS
1
YOOZ MAJCH PUNTU
Tuqui timpuqui Yoozqui niiz̈ puntunaca zizkatchic̈ha uc̈hum tuquita atchi ejpnacz̈quiz. Yoozqui niiz̈ cuntiquiztan chiiñi profetanacz̈quiz jaknuz̈quiztanami wiltan wiltan niiz̈ taku zizkatchic̈ha. Nekztan nii profetanacaqui uc̈hum tuquita atchi ejpnacz̈quiz parlichic̈ha. Anziqui tii timpuquiz Yoozqui niiz̈ Majch cjen uc̈humnacaquiz juc'ant zizkatchic̈ha niiz̈ puntunaca. Yooz Majchta tjapa z̈ejlñinacaqui. Yooz Ejpqui niiz̈ Majch cjen tjappacha paachic̈ha. Nekztan niiz̈ Majch mantuquiz tjappacha utchic̈ha. Yooz Majchtan Yooz Ejpz̈tan tsjii kuzzizpanc̈ha, jalla niz̈tiquiztan Yooz Majchkazza Yooz Ejpz̈ juc'ant zuma kuz tjeezñiqui. Niz̈aza Yooz Majch kjarquiz tii muntu z̈ejlc̈ha. Niiz̈ chiitaz̈ cjen tii muntu z̈ejlñipanc̈ha. Walja azzizza niiz̈ chiitaqui. Nii Majchpacha uc̈hum ujnacquiztan ticzic̈ha, uc̈hum pertunta cjisjapa. Jalla nekztan arajpacha ojkchic̈ha. Jalla nicju arajpach Yooz Ejpz̈ z̈ew latuquiz julzic̈ha, mantiñijapa.
Nii Yooz Majchqui tjapa anjilancz̈quiztan tsjan chawc jiliric̈ha. Niz̈aza tjapa anjilanacz̈quiztan tsjan zuma puesto tanzic̈ha. Yooz Ejpqui ana jakzilta anjilz̈quizimi tuz̈ chiichic̈ha:
“Amc̈ha wejt Majchqui. Jaziqui amquin wejt kamañal tjaa-uc̈ha”.
Jalla nuz̈ cjican, ana jakzilta anjilz̈quizimi chiichic̈ha. Antiz niiz̈ zinta Majchquiz alajakaz nuz̈ chiichic̈ha. Niz̈aza Yooz Ejpqui niiz̈ Majch puntuquiztan cjichizakazza:
“Wejrqui niiz̈tajapa niiz̈ Ejp cjeec̈ha. Niiqui wejttajapa wejt Majch cjequic̈ha”.
Wiruñ Yooz Ejpqui niiz̈ zinta Majch tii muntuquiz cuchanz̈quiz pinsiscu tuz̈ chiichic̈ha:
“Tjapa wejt anjilanacaqui wejt Majchquiz rispitla”.
Yoozqui anjilanacz̈ puntuquiztan tuz̈ chiichic̈ha:
“Wejrqui wejt anjilanaca cuchniñc̈ha tsjii apura ojkñi tjamiz̈takaz. Niz̈aza wejrqui wejtquiz sirwiñi anjilanacz̈quiz cjiskatuc̈ha tsjii uj peekstaz̈takaz”.
Pero niiz̈ Majch puntuquiztan Yooz Ejpqui tuz̈ cjichic̈ha:
“Amc̈ha Yoozqui. Am mantiz puestuqui wiñayjapa cjequic̈ha. Am mantizqui lijitumapankazza. Amqui zuma lijituma mantiz pecñampanc̈ha. Yooz kuz quintra paañinaca panz̈ chjaawjñamc̈ha amqui. Wejrtc̈ha am Yoozqui. Amquiz juc'ant honorchiz cjiskatchinc̈ha, c̈hjul z̈ejlñinacz̈quiztanami”.
10 Yooz Ejpqui niiz̈ Majch puntuquiztan cjichizakazza:
“Amqui Jilirimc̈ha, tuqui timpuquiztanpacha amqui anaz̈ c̈hjulquiztanami tii mundo paachamc̈ha. Niz̈aza am kjarz̈tan arajpacha paachamc̈ha. 11 Amqui wiñayjapam z̈elaquic̈ha. Pero nii paata arajpachami yokami tucuzinznaquic̈ha. Tsjel zquitiz̈takaz tucuzinznaquic̈ha. 12 Piiz̈ta zquitiz̈takaz tsjii latu ectaz̈ cjequic̈ha. Liwj campiitaz̈ cjequic̈ha. Amzti ana niz̈ta campiyaquic̈ha. Amqui wiñay wiñayjapa cjequic̈ha”.
13 Yoozqui niiz̈ Majchquiz tuz̈ cjichizakazza:
“Wejt z̈ew latuquiz julzna, am quintranaca kjojchtan tjeczcama”.
Jalla nuz̈ Yooz Ejpqui cjichic̈ha niiz̈ Majchquiz. Ana wira tsjii anjilz̈quiz nuz̈ chiichic̈ha. 14 Tjapa anjilanacac̈ha ana cheraña ojklayñiqui, Yooztajapakaz sirwiñic̈ha. Yoozqui ninaca cuchanc̈ha, liwriita z̈oñinacz̈quiz yanapi.