12
Mariara Jesúsja ehuachiju etseri ijimedaque juracuareque
(Mt 26.6-13; Mr 14.3-9)
1 Shucuta huecaca Pascua chine aniya jariju ecuana Jesús tsehue cuacuare Betaniaju, Lázaro anicuareju, tura Lázaro chacha nityatsuranucachineju.
2 Ecuana junatihuajutu umae Jesúsja eadeba cuanara Betaniaju anicuare cuanara bajejecuare earaqui chineju tuatsehue araara ishu. Martara tuna tsahuacuare earaqui iya. Lazarotu mesaju Jesús tsehue araara anicuare, ecuana, peya cuana jadya.
3 Tumetu Mariara etseri ijimedaque becuare kilo patya jaque dyane, nardo bacani, ijimedaque eaque. Tumequetu tsuje aridaque jucuare. Tumeque nardodyatu Mariara Jesúsja ehuachi ecatseju juracuare. Juratsu tujatu tillacuare etsaru tsehue. Ijimedaquetu etare quini pashutanacuare.
4 Judas Iscariote Jesúsra mepehuaquedyatu dyaque ecahuaiti jucuare María tsehue. Tumequedyatu Jesús ujeu baqui cuana queja inameredadiqui juyaque jucuare.
5 Cahuaititsutu jucuare:
—¿Eje bucha juatsu jatsutu tumeque epunara ijimedaque catyati ahua ama? Umada tujatu chipiru inaquena juhua, quimisha ciento ficha dyaque. Peadya mara mere juatsu etsujequi einau tupu tuque. Jetiamatu nerecada cuanaque etsahuauque chipiru inatsu, —jadyatu Judas jucuare.
6 Jadyatu quisaraticuare, ai nerecada cuanaque tsahuacara aatsu ama, chiri arida juatsudya jutidya. Tuquetu ecuanaja chipiru naruquique jucuare. Tuhuadya tujatu chirichirinicuare tuhua ishatanayaque tuja ishu.
7 —Nereda María aume. Tujatu tumeque ijimedaque eiya juhua ique iyetahuaju papamajudya pepa ishu, —jadya tujatu Judas acuare.
8 —Micuana ducutu jujacaya amadya nerecada cuanaque, ique bacue aijama. Ique micuana tsehue junenisiriya ama, —jadya tura ecuana acuare.
Lázaro tuna iyecara acuareque
9 Umada israelita cuanatu Jesús Betania epuju junatihuaque bahue juatsu cuacuare tuaqueja. Cuacuare tuna ai Jesús jipidya baticara aatsu ama. Tumebaedya tunajatu Lázaro bacara acuare, Jesúsra emajuque nityatsuranucacuareque.
10-11 Jesúsra Lázaro emajuque nityatsurachine tibutu umada israelita cuana Jesús queja catyaticuare. Jesús queja catyatitsu tunajatu pae cuanaja huaraji cuana amena bacacarama acuare, Jesús cuita camadya. Jadya tibudyatu pae cuanaja huaraji cuanara Lázaro dyadi iyecaradya acuare.
Jesús Jerusalénju judirucuareque
(Mt 21.1-11; Mr 11.1-11; Lc 19.28-40)
12 Jesús ehuachiju pepatanahuaque peya huecaca nucatu jetiama Jerusalénju Pascua chine bacara cuaya cuanaque bahue jucuare Jesús amena tuhua junatihuieque, amena tuque edijiju juajeyaque.
13 Bahue juatsu tuna ejaqui cuana rarubaretsu, ejaqui cuana inabaretsu cuinanabarecuare Jesús tsurutsa ishu. Jadyatu ecuanaja bahue jucuare ecuari junayaju ejaqui cuana inatsu tsurutsa. Quiqueajecuare ecana:
—¡Hosana! ¡Jida paju Yusuja ebacaniju jeyaque! ¡Jida paju ecuanaja ecuari, Israel eque ejuracana cuanaque naru ishu jeyaque! —jadya tuna jubarecuare quique eque.
14 Ecuita jetiamaque tsurutsamaquedya patu burruju anitsuratsu Jesús cuacuare. Yusuja quisarati béru cuejatacuare bae cuitadyatu jucuare:
15 “Bajida nejuume, Siónju aniya cuanaque.
Micuanaja ecuaritu micuana queja junaya.
Burro dyaque equetu junaya”, jadyatu ehuene
Yusuja quisarati. (Sion bacanidyatu Jerusalén jucuare.)
16 Dutya tume cuanaque baatsu, bacatsu ecuana Jesúsra mepehua cuanara tuque ecuana adebacuare ama eje buchique jadya juyaque. Ecuanaja ishutu etehuaque jucuare. Jesús emajuque netitsuranucahuaju, tuque Yusuja yacuaju judirunucahuaju ecuana chamacama huecatanacuare Yusuja quisarati jadya ehueneque. “Jesús jadya judadihuaquetu Mesías jadya judadiya jadya ehuene eque cuitadya judadihua”, jadya tuque ecuanaja chamacama inime jucuare.
17 Jesús Jerusalénju cuama jarijudyatu tura Lázaro emajuque nityatsurayaju baqui juchine cuanara cuejacuare peya cuana eje bucha juchineque.
18 Jadique quisarati bacatsachine tibutu ecuita jetieque ama cuinanacuare Jesús tsurutsa ishu. Bacara tunajatu acuare emajuque chacha nityatsuranuca ishu casa aniyaque.
19 Jetiamara Jesús pureama ayaque bacatsutu fariseo cuana tuna cama quisaraticuare:
—¡Nebacacue eje bucha juyaque! ¡Eje bucha jatsu ecuana ejuu! Dutyara taa tuna tuque bacaya, ecuana ebacauque, —jadya tuna jucuare.
Griego cuanara Jesús sarecuareque
20 Tuhuatu umae griego cuana jucuare Jerusalénju, israelita cuana tsehue Pascua chine cuetishara cuacuare cuanaque. Yusu muira tuna cuacuare.
21 Tunaratu jipeticuare Felipe. Felipetu jucuare Betsaida epu juque, Galilea yahua juque. Jipetitsu tunajatu isaraticuare:
—Jesús tsehue ecuana quisaraticara juya, tata, —jadya tunajatu Felipe acuare.
22 Jadya ahuajutu Felipe cuacuare Andrés queja.
—Griego cuana patu Jesús tsehue quisaraticara juya, —jadya tujatu Andrés aticuare.
Tuequedya tatse cuacuare Andrés tsehue Jesús queja.
—Griego cuana patu miatsehue quisaraticara juya, —jadya tatsejatu Jesús aticuare.
23 Jadya bacatsu tatse Jesúsra acuare:
—Masadamatu juetiya huecaca IQUE ECUITA iyetanayaque, emajuque netitsuranucayaque. Jadya ejitaju jue tuque ecue casa, jidaque juya.
24 Pusha amadya metse cuejaya. Ecaca ecuana uhuaya. Uhuahuajutu ecaca uhuahuaque pana cabapeti neri juya. Pana cabapeti juyaque ama juatsu, peadya ecaca camadya aniya. Cabapetiyaque juatsu, buraratsu, danetsutu umada ecaca juya. Tumebaedya ique majutaqui jetiama ecana eaqueja catyati ishu.
25 Tumebaedya riyaque yahuaju eje bucha tsehue ani dyaque bijida cuanara tunajatu majutsu Yusu dyaque japada babuque. Riyaque yahuaju eje bucha tsehue ani bijidamaduraqui cuanaque tuna Yusu queja anidirubuque ni eje tupu jaca ishu ama.
26 Yuneri cuitadya ecue inime eque anicara juya cuanaquetu era cuatsashaya eque juya. Era cuatsashaya eque jujacaya ama cuanaque tuna eatsehue anisiribuque. Tuna tuna ecue Etatara muitsabuque, —jadya tatse Jesúsra acuare dutyaja ijacaju.
Jesús majuyaque cacuejaticuareque
27 Jesústu dutyaja ijacaju quisaratinucacuare:
—Bahuedya ique ejetsunue amatu amena ique iyetana ishuque. Dyaque taa peya inime cabatiya. ¿Eje bucha dyadi tuque era ecue Etata aya: “Tata, peya eje bucha eque micue inime eque jutaquique juatsu taa mique eau, ‘Jadya nerecaturae taa aume’ ”, jadya ni taa eau. Jadya ama bucha maju ishudya riyaque yahuaju junahua tibu, —jadya tujatu ecana acuare.
28 Tumetu Jesúsra tuja Etataque acuare:
—Tata, micue dyaque casa, jidaque jadya aniyaque ique eje bucha juya eque pabamere, —jadya tujatu tuja Etataque acuare dutyaja ijacaju.
Jadya ahuajutu barepa juque quisarati bacataqui jucuare:
—Amenatu era bamerehua ecue dyaque casa, jidaque, ique emui juishu. Bamerenucayadya tuna era, “Dyaque jida, casada jadya taa mi, Yusu”, jadya tuna juishu, —jadyatu Yusu barepa juque quisaraticuare.
29 Tuhua ecuana tsehue jucuare cuanaratu bacacuare etsuri barepa juque. Umaeratu bacacuare tiritiya bucha.
—Tiritiya tuque.
—Aijama, tiritiya ama tuque. Barepa juque Yusu tsahuaquique jutidyatu quisaratiya, —jadyatu umae cuji cuita juatsu jucuare.
30 Tume ecuana Jesúsra isaracuare, tumebaedya peya cuana tuhua jucuare cuanaque:
—Ecue Etatatu barepa juque quisaratihua ique cuejayaque ama. Micuanadya tura micuana cuejahua.
31 Amenatu ejetsunue ama Yusuja tuaqueja catyatima cuanaque “Micuana micuana jucha metse” jadya aishu. Ejetsunue amatu bataqui ama ecue ama cuanaque cuatsashaquique ecue casa seca ishu.
32 Ique curusuju tatatanaya maju ishu. Ique tuhua curusuju etata badeya baatsu tuna jetiama eaqueja catyatiya, —jadya ecuana Jesúsra acuare.
33 Riyaque quisarati tsehue tura ecuana cuejacuare eje bucha majue juyaque.
34 Tuhua jucuare cuanaque tuna jucuare:
—Moisésra huenecuare equetu Mesías patu anisiribuque. ECUITApa curusuju tatatanaya maju ishu. Jutaquiju ni taa tu ¿ECUITA, Yusuja Emepeque ecuanara ihuayaque? —jadya tunajatu Jesús acuare.
35 Tume tuna Jesúsra quemitsacuare:
—Ique hueca buchique, micuana Yusuja quisarati adebamerera jehua tibu. Ejetsunue ama micuana tsehue rehua juneniya jari. Eaqueja micuana catyatitaqui, emajaca aniya jari tupu. Necatyaticue, canerecati ishuju judiru ishu ama. Apuda ducu juneniya cuanaque tuna baecua eju cuayaque; jadidyatu eaqueja catyatiya ama cuanaque baecua canerecati ishuju judiruyaque.
36 Eaqueja necatyaticue ique micuana tsehue jari tupu. Eaqueja ni micuana catyatiya, tume micuana huecadaju juneniya cuana buchique juya, —jadya tuna Jesúsra acuare.
Jadya quisarati aatsutu Jesús ecuita jetiama ducuque cuinanacuare. Baecua tuna jucuare eju tuque diruhuaque.
Israelita cuana Jesús queja catyaticarama jucuareque
37 Arepa Jesúsra tunaja yacuaju Yusuja camadya ataquique acuare ama bucha tuna dutya jujeri cuitadya tuaqueja catyaticarama jucuare.
38 Isaías Yusu equeque quisarati cuejaquira icueneta huene acuare eque cuitadyatu judadicuare:
“Ecuana Cuatsashaquique, ecuanara tuna jetiama cuejaya micue quisarati yunerique.
Jadya ama bucha tuna eje umara piji camadya ejenehua.
Arepa tunara micue casa bahua ama bucha, eje umara piji camadyatu adebaya bahuaque” jadya.
39 Jadya equetu dutya jujeri israelita cuana Jesús queja catyatihua ama, ecuanaja baba cuana béru jucuare bucha. Dutya jujeri ecuanaja baba cuanaratu ejenecuare ama Isaiasra quisarati cuejacuareque.
40 Isaiastu jadya junucacuare beru:
“Yusura tuna adebamerehua ama tunara petahuaque.
Tura tuna adebamerehua ama.
Jadya tibu tuna tuaqueja catyatihua ama, arepa ecana Yusura tuja casa bamerehua ama bucha, arepa tuna tuja quisarati bacahua ama bucha.
Cacuaretihua ama ecana inime Yusu queja junuca ishu,
Tuja tuna inajacamere ishu”,
jadyatu Isaiasra huenecuare béru.
41 Jadya tujatu huenecuare, Yusura tuque Jesús eje bucha judadiyaque bahue amerecuare tibu. Riyaque bahue juatsutu Isaiasra icuenetadya ahua quisarati Jesúsja ishu.
42 Arepa dutyara jujeri israelita cuanara Jesús bijidamadurahua ama bucha, umae camadya tuna tuaqueja catyatihua. Umae dyaque inime metse cuanaque tuna tuaqueja catyatihua. Jadya ama buchatu tume cuanaque ejitaju ama cacuejaticuare Jesús queja catyatihuaque, fariseo cuana mubaya tibu, tuna Jesús queja catyatihuaque cacuejatiyaju fariseo cuanara caradati ishuque etareju ecasitatiquereuque ama adebaya tibu.
43 Tume bajida cuanaratu ecuita cuana pureamaturacara acuare, Yusu ama.
Yusura Jesúsja quisarati bijidamaduraqui cuanaque ecajuchati babuqueque
44 Jesústu quisaraticuare:
—Ejeque eaqueja catyatiyaquetu eaqueja jipidya ama catyatiya, tumebaedya Ique Cuadishaqui queja.
45 Ejera ni ique yuneridya adebaya, tumebaedya tujatu adebaya Ique Cuadishaquique.
46 Ique hueca buchique riyaque yahuaju junahua, eaqueja catyatiya cuanaja Yusuja quisarati adeba ishu. Jehua ique, tuna apuda ducu juneniya cuanaque bucha juishu ama, huecadaju juneniya cuanaque bucha juneni ishu.
47 Micuanaratu ecue quisarati bacaya, era amereya eque juyaque ama, era ama micuana “jucha arida” jadya aya. Micuanaja juchajudya micuana canerecatibuque. Ique junahua riyaque yahuaju micuana “Ecajuchati micuana” jadya aishu ama, eaqueja catyatiya cuanaque inajacamere ishu.
48 Arepa ecue inime ama tuna canerecatibuque ama buchatu aniya ique bijidamaduraqui cuanaque nerecaturaquique, ecue quisarati bacayaque ama juatsu. Tere huecaca juetihuaju Yusura cuitadya micuana abuque: “Micuana micuana ecajuchatique”. Jadya tujatu ecana abuque, tunara era cuejahuaque ejenehua ama tibu.
49 Ecue casa eque ama ique quisaratiya, mere jadya juya. Ecue Etata Ique Cuadishaquira casa tyaya tibu tuque mereya. Eratu cuejaya, bahuityaya tura ique amereya eque.
50 Micuana ni ecue Etatara cuatsashaya eque aniya, tume micuana tuatsehue anisiribuque majunuca ishu ama. Riyaque tura ique bahue amerehuaque micuana era cuejahua, tura ique amerehua baedya, —jadya tuna Jesúsra acuare.