5
Jesucristora quirica epirurique siraracuareque
1 Tume eaniqui cacuatsashati ishuju aniyaja jida eque amaca emetucuju tuque bacuare quirica epirurique, educu eque, dyaque eque jadya ehueneque. Tumeque quiricatu dyaque eque pacarucu sipibare ea jucuare.
2 Bacacuare tuque Yusu tsahuaquira casada jebuda etsuri tsehue bacadurayaju:
—¿Ejequetu quirica esipibareque sirara, isara jadya aishu ecuatsasha? —jadyatu jucuare.
3 Ni barepaju ni riyaque yahuaju ni yahua emaque jadyatu aijama jucuare quirica sirara ishuque; ni tu ejeque anihua tumeque isara bahueque.
4 Ique dyaque pacuare, ejeque tumeque quirica sirara, isara jadya aishuque aijama baatsu.
5 Tume peadya ecuita Yusu mui juyara jadya acuare:
—Paume dyaque cuita. Aniyatu peadya; tura camadyatu esirarau. Tumequetu Judá eque ejuracanaque. Tumequetu ecuari David eque ejuracanaque nucadya. León bucha casae tuque. Tura peadya camadyatu esipibareque sirarabaretsu epirurique ejirau, —jadya acuare Yusu mui juyara.
6 Tume tuque bacuare Dutya Cuatsashaquija yacuaju ecuanaja jucha cuana tsujetyaqui majucuareque, UHUISHA BUCHA IYETAE ATAHUAQUE. Pushi bape bape butsequinie cuana ducu, Yusu mui juya cuanaja etabutu neticuare. Ejitajudya tujatu jucuare ecuita cuanaja jucha tilla ishu iyetahuaque mecuare. Tujatu anicuare pacarucu edana, pacarucu yatuca jadya. Tumeque yatuca cuana tu pacarucu espíritu cuana, Yusuja baeque dutya yahua queja tura cuadishahuaque.
7 Tumeque UHUISHA BUCHA IYETAE ATAHUARAtu inaticuare tumeque quirica epirurique Dutya Cuatsashaquija eaniquiju aniyaja emetucu jida eque amaca equeque.
8 Tura quirica inatihuaju tuna pushi bape bape butsequinie cuanaque, beta tunca pushi earacana Yusu mui juya cuanaque nuyucuare UHUISHA BUCHA IYETAE ATAHUAja yacuaju. Dutya Yusu mui juya cuanajatu anicuare dudu ishuque, arpa bacani. Inacuare tunajatu equiniqui oro eaque, atsaca madi muru huani bucha tsehue ejequeshaque, dyaque ijimedaque. Tumeque muru ijimedaque tu Yusuja cuanaque tuatsehue quisaratiyaju adeba ishuque.
9 Riyaque jeru iyacuaque tunajatu acuare:
“Jesucristo, miquemi jida quirica epirurique ina ishu, tuja esipi cuanaque sirara ishu, mique iyetanahua tibu.
Majutsu micue ami quijehuetitsu, tuquemi dadihua Yusuja ishu ecuita cuana dutya yahuaju, dutya anae cuanaque.
10 Miradyatu iyahua huaraji cuana dyaque arida cuanaque.
Cameremeretihua mique.
Narubuque tunajatu riyaque yahuaju cuanaque”,
jadya tuna jerucuare.
11 Jadya juatsu tuque petanucacuare. Bacacuare Yusu tsahuaqui tumeque eaniqui cacuatsashati ishuque jiruru aniya cuanaque, tumebaedya tuhua pushi bape bape butsequinie cuanaque, Yusu mui juya cuanaque jadya. Anicuare tuna jetiama piye batilla tupu ama.
12 Tunadya tuna etsuri jebuda tsehue jadya juyaju bacacuare:
“Dyaque jida taa mique, UHUISHA BUCHA IYETAE ATAHUAQUE.
Miquemi dyaque casadaque. Micuetu dutya aniya.
Miquemi dutya bahueque. Micuetu dutya ai ataqui.
Muiya mique ecuanara. Dyaque jida, casada jadya taa mique.
Pureama mique ecuana aya”,
jadya tunajatu UHUISHA BUCHA IYETAE ATAHUAQUE acuare.
13 Tumebaedya tuque bacanucacuare Yusura dutya iyacuare cuanaque, barepaju cuanaque, yahua emaque cuanaque, riyaque yahuaju aniya cuanaque, cueri cuanaja ecuaqueju aniya cuanaque, dutya anicuare cuanaque jadya juyaju:
“Pureama metse ecuanara aya.
Muiya metse ecuanara.
Dyaque jida, casada jadya taa metse.
Metsejatu dutya ai ataqui.
Jadya metse ecuanara pureama aya, Dutya Cuatsashaquique, tumebaedya Jesucristo UHUISHA BUCHA IYETAE ATAHUAQUE”,
jadya tunajatu acuare.
14 Pushi bape bape butsequinie cuanara tuna quemitsacuare:
—¡Jadidya paju!
Tumetu beta tunca pushi earacana Yusu mui juya cuanara nuyutsu yusurupai acuare. Tunaratu muicuare maju baecua aniyaque.