2
Yusu pureama aishu caradatitsu eje bucha jutaquique
1 Peya micuana cuejaya. Icuene cuita micuana cuejaya eje bucha bacabacae ecuana Yusu queja jutaquique dutya queja aniya cuanaja ishu. “Tata, tyacue ecana tunaja ai aijamaque”, jadya tuque ecuanaja Yusu ataqui. “Narucue ecana jida”, jadya tuque ecuanaja bacataqui. “Tata, miquemi bahuedya tuna eje bucha juyaque. Miquemi tuna tsehuedya; narucue ecana”, jadya tuque ecuanaja ataqui. “Yusurupai mique tuna tsehue jida juhua tibu” jadya. Jadya tuque ecuanaja ataqui dutya queja aniya cuanaque.
2 “Tata, tsahuacue ecuatsashaqui cuanaque, tumebaedya dutya huaraji cuana”, jadya tuque ecuanaja ataqui. Tunara jida naruhuaju, ecuana peya cuana tsehue ujeu ecabatibareu ama. Tume ecuana jida inime tsapema eaniu. Tunara ecuana jida naruhuaju, tume ecuana Yusuja biji eque eaniu. Tumebaedya ecuana eaniu jida eje bucha tsehue ama peya cuana ecuanaja epuju cuana tsehue.
3 Jidadya tu jadya anie juishu. Jadiquedya tu Yusuja dyaque bijida, Ecuana Cuatsashaquija.
4 Yusuja inime datsetu juhua: “Areque ecana dutya jipe Jesús queja ecatyatiu, ecue ecana eaqueja judirusha ishu. Areque tuna dutyara eadebau jida quisarati yunerique”, jadya datsetu Yusuja inime juya.
5 Aniyatu peadya Yusu camadya. Peadya camadyatu aniya Yusuja ecuita cuana tsehue cahuaiti anihuaque tillaquique. Tumeque tu Jesucristo, ecuita cacuitatihuaque.
6 Tudya cuitadyatu tuja inime taca majuhua, dutyaja jucha cuana tsujetyaqui. Tuquetu majuhua, dutya tuaqueja ecatyati cuanaque Satanás quejaque einajaca juishu. Jadya majuetu Jesús juhua, Yusuja ecuita cuana tuaqueja judirusha ishu. Jadya ejitajuetu Yusuja inime juhua, dutya tuaqueja judirushacaraque.
7 Yusuratu dutya tuja quisarati bacamerecara aya. Jadya tibudya tura ique mepehua israelita ama cuanaque cueja ishu. Ique tura cuadishahua tuna Jesús queja catyati ishuque cueja ishu. Pusha pusha ama juya; yuneridya quisaratiya.
8 Cuejaya micuana Yusu pureama aishu casitatitsu eje bucha jutaquique. Eje queja pajudya jutidya ecuana caradatijacataqui ama Yusu tsehue quisarati ishu. Yusuja biji eque aniya cuanaque camadya jadya paju. Peya tsehue ecahuaiti cuanaque, peya cuana tsehue jidama inime tupuyaque, jadya cuanaque tuna Yusu queja bacabacataqui ama ecasitatiju.
9 Yusu pureama aishu casitati ishutu epuna cuana petataju ejiyu cajututitaqui. Cajututi tunaja paju peya queja capetamereti ishu ama, deca cuana jidamaque inime tupumere ishu ama. Capetameretitsu peya queja cabijiserimereticara ecana paju ama callutiju, oro tsehue cabajejetitsu tiquida cuana tsuje arida cuana tsehue cabajejetiju, una tsuje arida cuanaque jutu tsehue. Cabajejeti tunaja paju caradatihua cuanaque Yusu inime tupuqui aishu, ai tuna queja nimee ama.
10 Epuna cuana Yusuja cuanara jidaque ai paa. Tumetu peya cuanara iyuhueda baya, peya cuana tsahuaqui baatsu, ai tunaja cabajejetiju baatsu ama.
11 Yusuja etareju caradatitsu, epuna cuanara abacata tsehue paijacabaca, cabahuityati ishu. “Ique dyaque bahue Yusuja quisarati cueja juya bucha ama”, jadya tunaja inime paju ama.
12 Epuna ama tuque dutyaja yacuaju bahuityamereya. Deca cuana tuque Yusuja quisarati jadya bahuitya ishu cuatsashaya. Epuna cuanatu abacata jutaqui Yusuja etareju.
13 Epunajatu deca cuana cuatsashataqui ama, deca icuene iyatanahua tibu; ai epuna amatu icuene iyatanahua. Adántu Yusura icuene iyahua; tupuju tujatu Eva iyahua.
14 Evatu Satanásja quisarati bacatsu cajuchatihua. Turadyatu Yusuja yana ahua ama.
15 Jadya tibudyatu epuna cuana deca cuanaja huaraji jutaqui ama. Tunajatu ebacua cuana jida narutaqui. Epuna cuana ni Jesús queja catyatiya, Yusura tuna Ijahua quejaque inajacamereya, deca cuana inajacamereya bucha. Epuna cuanajatu peya cuana jida tsehuedya bataqui. Tuna dyadi tuna tumebaedya Yusuja biji eque anitaqui. Tunajatu jidadya inime tuputaqui. Jadya pureamaturae tunajatu Yusu eau.