10
1 Mi maga hermano, ta reza yo con Dios con todo el di mio corazon, cay ta desea gayot yo para el di mio mismo maga compoblano Judio ay puede experiencia el salvacion.
2 Deverasan puede yo sale testigo para di ila y ta habla yo que el maga Judio bien devoto gayot con Dios, pero hende sila ta sigui el deverasan enseñanza di suyo.
3 Nuay sila nunca entende enbuenamente si paquilaya Dios ay causa con el maga gente queda justo na di suyo vista. Sila mismo ta precura gayot hace el di ila mismo manera para sigui con Dios, cay no quiere sila sigui el plano di suyo para causa le con el maga gente queda como si fuera nuay sila pecado.
4 Pero ahora si Jesucristo ya remplasa con el ley, y con ele lang necesita tene fe para Dios ay considera canaton como si fuera nuay kita pecado.
El Salvacion para de Todo
5 Si Moises ya escribi este maga palabra si paquemodo el maga gente ay queda justo na vista de Dios por medio del ley: “Si un gente ta puede obedece todo el maga mandamiento del ley, ay puede le tene el vida contento aqui y na cielo despues.”
6-7 El enseñanza acerca de quedar como si fuera justo na vista de Dios por medio de fe, este gayot: no pensa que necesita hace el maga cosas imposible, como subi na cielo o abaja na infierno para manda con Cristo salva canila. Pero husto gayot si tiene kita fe con ele para Dios ay considera canaton como si fuera nuay kita pecado.
8 Este amo el cosa ya escribi na Sagrada Escritura de Dios: “El mensaje de Dios bien facil para entende, y ta harta ya ustedes habla acerca de ese, cay talli ya ese na di ustedes maga pensamiento.” Ese mensaje amo el Buen Noticia acerca de fe con Jesucristo que ta predica came.
9 Si ta declara ustedes con el maga gente que si Jesucristo amo el Señor, y na di ustedes corazon ta cree que Dios ya hace con ele levanta na lugar del maga muerto, entonces Dios ay salva con ustedes.
10 Cay Dios ay considera lang canaton como si fuera nuay kita pecado si tiene kita fe na di aton corazon, y Dios ay salva canaton si ta habla kita con otros que tiene kita fe con Jesucristo.
11 Antes pa si Isaias ya escribi este maga palabra: “Si quien ay tene fe con ele, hende ay sale desconsolao.”
12 Ese maga palabra para de todo, cay el maga Judio y el maga hende-Judio de igual manera lang ta queda salvao, y Dios amo el unico Señor de todo el maga gente quien ta tene fe con ele, y ta dale le con abundancia maga bendicion con todo el maga gente quien ta pidi con ele el di suyo ayuda.
13 Este maga palabra escribido na Sagrada Escritura de Dios: “Todo el quien ay pidi ayuda na nombre del Señor ay queda salvao.”
14 Pero no puede sila pidi ayuda con ele si nuay pa sila fe con ele. Y no puede tamen sila cree el mensaje acerca di Cristo si nuay sila nunca oi ese mensaje. Y paquemodo man sila ay oi el mensaje de Dios si nuay ningunos ay anda predica canila?
15 Y paquemodo man ay puede predica el mensaje si nuay ningunos quien ay manda anda con el maga mensajero? Ta habla gane el maga palabra na Sagrada Escritura: “Que bueno gayot si tiene quien ta vene lleva el Buen Noticia.”
16 Pero hende gayot todo el maga gente ta accepta el Buen Noticia na di ila corazon, cay antes pa si Isaias mismo ya habla tamen: “Señor, quien man ya cree canamon cuando ya predica came el mensaje canila?”
17 Entonces puede kita mira que un gente ta puede lang tene fe con Jesucristo si ta oi el mensaje acerca di suyo, y para puede le oi aquel mensaje necesita tiene uno quien ay habla con ele acerca di Cristo.
18 Pero ta pregunta yo si deveras ba nuay sila oi el mensaje? Asegurao yo que ya oi sila, cay escribido este na Sagrada Escritura de Dios:
“El maga palabra del maga mensajero ya man calayat na entero mundo, y ya alcanza gayot na maga oido de todo el maga gente.”
19 Y otra vez ta pregunta yo si nuay ba entende el maga Judio del nacion de Israel? Deporsi ya entende gayot sila, cay Dios ya habla por medio di Moises:
“Ay causa yo con ustedes para man celos por causa de esos hende-Judio que ta considera ustedes nuay valor. Y ay causa yo con ustedes para queda rabiao por causa del maga gente quien nuay entendimiento acerca di mio.”
20 Despues Dios ya usa con Isaias quien ya habla sin miedo:
“El maga gente quien hende ta busca conmigo ya encontra conmigo sin precurar sila busca. Y ya aparece yo con el maga gente quien hende ta pregunta acerca di mio.”
21 Pero acerca del maga gente de Israel, Dios ya habla: “Continualmente ta ofrece yo paz con el maga gente quien bien desobediente y bien duro cabeza, pero no quiere sila siempre accepta.”