15
El Maga Angeles Ta Lleva el Siete Calamidad
1 Despues ya mira yo otro grande aparicion na cielo que maca espantar. Tiene siete angeles ta lleva el siete calamidad y esos el maga ultimo calamidad, cay por medio de esos completo ya el rabia de Dios.
2 Despues ya mira tamen yo un mar bien ancho como cristal mesclao con fuego, y parao na canto del mar amo aquellos quien ya sale victorioso contra el animal y su estatua y el numero que ta representa el di suyo nombre. Todo sila ta agarra el maga arpa que Dios ya dale ya canila.
3 Ta canta sila el cancion del Cordero, y el cancion di Moises el servidor de Dios:
“Grande y milagroso todo el di uste maga trabajo,
Señor Dios todo poderoso!
Todo el que ta hace uste justo,
Rey de todo el maga nacion!
4 O, Señor, nuay ningunos hende ay dale respeto
Y dale honor con el di uste nombre,
Cay uste solo el perfecto de todo manera.
Y todo el maga nacion ay vene adora con uste,
Cay todo el maga gente puede mira que el di uste maga decision justo gayot.”
5 Despues de ese ya mira yo que el Lugar Mas Sagrao del templo de Dios na cielo bien abierto gayot.
6 Y ya sale alli na templo el siete angeles llevando el siete calamidad. El di ila vestido limpio y blanco que ta man silao, y na di ila pecho tiene laso de oro.
7 Despues uno del cuatro criatura vivo ya dale cada uno del angeles siete tason de oro, lleno del rabia de Dios quien vivo hasta para cuando.
8 El templo ya llena de humo que ya sale del resplandor y poder de Dios, y nuay ningunos puede entra na templo hasta ay cumpli el siete calamidad que ta lleva el siete angeles.