7
Ashiriya, na kamanchintspa yuwaa Esdraa wipunashpata Irusarinap zanganirangana anootsi
1 Ashiri zapishsha 58 masach tushiyramachu anush yuwapur Persiyashuch kurak Artarjeri taarangu, anpur Utaáchich tputs, Esdra sura, Babiloniyash tsap taarangiya. Esdar Aaronarinchichimuncha tputsi, Aaron yuw chtakchuri apanllpaneem kurak kinarangu anu.
Esdar wapar Serayamuncha.
Serayassha wapar Asariyasamuncha.
Asariyassha wapar Hilkiyasamuncha.
2 Hilkiyassha wapar Salummuncha.
Salumsha wapar Sadokamuncha.
Sadoksha wapar Ahitubamuncha.
3 Ahitubsha wapar Amariyasamuncha.
Amariyassha wapar Asariyasamuncha.
Asariyassha wapar Merayotamuncha.
4 Merayotsha wapar Serayasamuncha.
Serayassha wapar Usimuncha.
Ussha wapar Bukimuncha.
5 Buksha wapar Abisuwamuncha.
Abisuwsha wapar Finesamuncha.
Finessha wapar Elíyasamuncha.
Elíyassha wapar Aaronamuncha, yuw apanllpaneem urkar ichtaru kinarangu anu.
6 Esdar Apanllee kuk tayapstampani taarangiya. Yuwaa Taarashipan, Israelchich Apanllirini, Móysisarinee kamachtarangu, anoo Esdarsha ichingaru yasarangiya. Ashiri Apanllimun mang' taturangu, Apanllsha uru Esdraa istarangiya. Esdar watsapunip kanapumaam zandku, kurakaa Artarjeree masharangu, uwsha kukoo nda kapeetarangiya. Ashiri waritachparee. Kanapungi tsapunpish, tárangiya,
7 Ashiri Artarjeri 7 masach Persiyashcheem kurak kinaru taachu, anush Esdar Israelchichpa tputs apanllpantam, mishat Leviychichtam, Apanllee yasimpantam, Apanllee pang' ksutamapanitam, apanllpaneem istamapanitam yápandayarandsin, Babiloniyaa tsap kasayarusin, Irusarinap naataranganaya.
8-10 Artarjeri kurakaam kinaru, 7 masachirini, tsup minamarita kaneeschiri yáyaru, anush Esdar Babiloniyaa tsap shitungeerandsin, naarsin, Apanll kapung istarangu, ipunpunar tsup kachingkachu, zameepatarinsha tsup kaneesich yáyaru, anush Irusarinush kusaranganaya.
Esdar, Apanllee kizpur chinaku, Apanllee kuk natstakuri uru payukuri taachima. Sheeri, Israelchichee tputs Apanllee kamachtamarinee payumaam tayapstachima, mangush chinarangu, tárangiya.
11 Ashirucha, Kurak Artarjeri; Watam Esdar kizpur Apanllee mangoonkuwa.
Yuwaa Apanll Taarashipan, sirú Israelchichee kamachtarangu anoo ichingaru yasakiya, kurak mangush chinaku, átu, Esdar ndatuma naaru, kurak kirakaa yandayarangu panarangiya.
12 Ashiri kirakamun átu, kurak Artarjeri yandarangiya.
Nuw Kuraki Artarjeri shiyaam Esdraa yandakina. Shiy apanllpantishcha. Apanll waamari kasiru anoo shiy mangoonaksha. Kukootstam ichinguru payuksha.
13 Ashiri nuw shiyaa atina, Shiyachich tputs, Israelchich, yuw nuwash tsapuni taakana an, wandaya Irusarinap kanapumaam zandkusin, shiyapa kanapchinllinpa. Apanllpantam tputs zandkusin, Leviychichtam tputs waana zandkusin, kanapchinllinpa, átana.
14 Ashiri shiysha kanapkachush, yasangcha. ¿Kamapa Utaáchich tputs Apanllee wamachtash payukanaya? anoo yasangcha. Shiy uru Apanllee kuk payuksha. Ashiri yasangcha. Anoom nuw shiyaa zanganchinllpa. Mishat, yuw tputs nuwaam istakana anu, 7 tputsi yasamaam zandkitamsinaya.
15 Ashiri nuwsha istampanpatatam oroo chumbeepimashee, mishat oroo mburshimasheetstam shiyaam mangutariti panachinipa. Shiysha anoo Irusarinush kuskachush, Apanllish pang' wayangcha. Ashiri naakchush, kurikee yáyarush payutachcha.
16 Mishat, Babiloniyashuchtam tputs waana zandkusin, shiyaam mangutari orootstam panachpasinaya. Ashiri shiysha anoo ichinguru yángcha. Mishat, shiyachich tputs, apanllpantamta, Apanlleem pang' Irusarinush kurikee, mishat maachtaatstam mangutari shiyaam panachinllinaya. Ashiri shiysha anoo yáyarush, Apanllish pang' wayangcha.
17 Ashiri anpa kurik pxanxangcha, wakaraatstam, mishat wakaraatstam wip, mishat opeejaatstam wip, mishat yuw maachta Apanlleem urutari wayakis, tirikoo, vinoo aship paxanxeerush Irusarinush Apanllish pang' muchingcha.
18 Ashiri yuwaa ur chumbeepimash, misha ortam mburshimashi katuchim taaru, anoo shiysha ipunashpatish Apanllpat yasayarus, yuw siyaam wanasiri anumari shingtsa.
19 Itaru, shiysha yuwaa tputs maacheetsi Apanlleem kizpur wanasiri wayarangana, anoo shiysha yáyarush, Apanllish pang' izuuru wanasiritam wayangcha, Apanllee ungirtamaama.
20 Ashiri Apanllireemis pang' maachi pshatakinaariya, ashiriya, nuwaanaatsi kurikiri ksutamapaneem mashangcha. Uwsha shiyaam panachiya.
21 Mishat, nuw kuraki Artarjeri, ichinguroo kurikee ksutamapani tputs yuw kung Eufratis arachich taakana anoo kamachtakina. Apanllpan Esdar mashku, siysa anoo panangtsa. Zapshtarintspa. Mikeerus panangtsa, atina. Esdraa watam Apanllee waamari kasiru anoo kapung mangoonkiya. Apanllee kamachtamarini ichinguru yasakiya. Apanlleetstam kuk tputseem tayapstakiya. Ashiri siysa istangtsa. Xarashish wayarintspa.
22 Ashiri uwsha siyaa maacheetsi mashku siysa
3,300 kilo oroo mburshimashee panamaam waritakiya. Mishat, tirikoo mashku
22 mil litro panamaam waritartamta. Anumunsha vinoo mashku,
2,200 litro panamaam waritartamta. Wayungunoo mashku
2,200 litro panamaam waritartamta. Itaru, arangeem panarintspa. Mishat, yumeetstam mashku pchintintspa. Yuwaa siyaa mashku anoo uru panat panat shingtsa.
23 Ashiri Apanll kanindush taaku anoom waanshu pang' wayamaam kamachtaku, anoo siysa ichinguru yáyarus panangtsa. Mikeerus panangtsa. Ndunnaa ashkus, nuwaa Apanll wanichparee. Ipareetstamti, mishat tputsireetstamti ichingaru wanichtamparee. Ashiri siysa mangiptis taangtsa.
24 Mishat, siysa kurikee yampanis, apanllpanee tputs kurikee yamaam mashintspa. Mishat, Leviychicheetstam, Apanllish pang' yasimpan taakana, anootstam, mishat Apanllish pang' ksutamapaneetstam, Kurikee pananda, tárintspa.
25 Ashiri shiyaatssha Esdra atitamana. Apanll shiyaa mangeemish kapung panarangiya waanaatsee mangoonamaama. Ashiri shiysha tputsee ipusangcha, tputspat tsiyatssee wanasiri yaramaama. Mishat, gobernadoroomtam ipusangcha. Tputsee ichinguru istachu, anoom natstayarush, wayangcha, kung Eufratis arachich taakana anoo ksutamaama. Yuw Apanllee kuk mangoonkana anoo ipusangcha. Itaru, shiysha ichinguru tputsee Apanllee kuk tayapstangcha. Nda mangoonkana anoo, misha yuwaatstam mangoonkana anootstam tayaspatangcha.
26 Ashiri tputssha Apanllee kamachtamarinee payumaam ngatkusin, misha nuwaatstam kuki nda payuksin, shiysha waneengcha. Pachamaam waritariya. Nduniya ashiru arap minup tsap zanganingcha. Nduniya ashiru, Kurik tuwapangi, tángcha. Kurikee tuwapamaam ngatkeesinaya, tumanangtsa.
Ashiri Esdraa, nuw kuki watamaricha shiyaa tsiyatamaam zandarangi anu,
Kurak Artarjeri kirakash yandaku táyaru, Esdraam panarangiya.
Ashiriya, na kamaneena yuwaa Artarjeri Esdraa kapung chinarangu, kirakaa yandayaru panarangu anootsi.
Ashiriya, na kamanchintspa yuwaa Esdar Apanllpa tsiyatarangu anootsi
27 Esdar Apanllpa tsiyatku, Apaa, shiy kizpurtishcha. Shiyaa iycha aparini. Iyaa zitaminarini kapung istarangsha. Na iyaatstam istaktamsha. Kurakaa mangu p'tseerangush, shiyaamtam pangish Irusarinash kizpur wanasir wayamaam iyaa kamachtarangiya.
28 Mishat, shiy nuwaa istarangush, Persiyashuch kurak, istampantam, ichingarusin nuwaa waanasir naparanganaya. Nuwaa chinampa tsiyatarangsin, Shaana Israelchichee tputs yuw kizpur wanasiri anoo tushaneeyarush, washunand ipuneerus, saanpee tsapunis kanapungtsa, nuwaa táranganaya. Ashiri Apaa, shiyamun mangi ksakina, Esdar Apanllpa tsiyatku ántar ashirangiya.
Ashiriya, na kamaneena yuwaa Esdar Apanllpa tsiyatku tárangu anootsi.
[Nuw Esdari siyaam yandarangina. Watamcha nuw koki.]