Isáysarini kuku
Isáysarinee kuku pakich kamanchintspa
¿Chakaja yandarang?
Isáysarini waanaatsi kuk yandarangiya. Apanll kamachtarangu, Utaáchchee tputsi waneerangiya. Irusarinash taarangiya. Kurak Osiyasarin taarangu, anush Apanllee kuk kamanimaam chtarangiya. Kurakawin Jotamarini, Akásarini, Esekiyasarini, ashpari taarangsin, Isáysarini Apanllee kuk kamanimantar ashirangiya. Isáysarini wizanllpat, wipapa tsimbun taarangiya. Isáysarini kurakamand tsipasamunparee, ¿tamarima kurakap pang' naataranga?
¿Chakaam yandarang?
Irusarinshucheem kirakaa yandarangiya. Arapich tputs, Asiriyashuchsha kizpurimuncha tputsee wamari kasikastar ashishtaranaya. Utaáchchee tputs wamari kasimaam zandaranganaya. Ashirucha, Utaáchich tputs punirpat taataranaya. Samariyshuchee tputs izuuru kasirangusin, muchchureem ínarangusin, arap machtaranganaya.
¿Mayaamaja yandarang?
Utaáchich tputs kizpur kiyung kachiyaranganaya. Asiriyshuch tputs ichingaru masach kurikee zapan panangandama, táranganaya. Utaáchchee tputsi ashpatam putayarusin, araptam machtaranganaya. Ashkusin, Utaáchichsha nda waanitaritam taaranganaya. Nllitarit tputs wamari kasitaranaya. Ashirucha, nda kis taaranganaya. Isáysarini zapan waneerangu, Yutaritshishireetsis ksangtsa. Apanlleetsimari chinangtsa. ¿Mayaamsha kis apanllputsingaz chinaksa? tárangiya. Mishat, ayam Apanll waanaa wipaa zanganchima. Ashkachuri, kisshapari taatssa, Apanll átcha, tárangu, tputssha mang' ksarangiya.
¿Mayaatseeja kamanik?
Na yuwaa kamanku anoo kamanchintspa.
Kapitoro 1—39: Apanll wanasirinandari chinakiya. Ashirucha, kizpur tsiyantakiya yuwamand Utaáchich tputs yutarit taakanaya. Utaáchich kurakareew nda wanasir yaspatarangana. Ashirucha, uwshtisin tiptsir yutarit taarangusin, natsashish zapan taarangiya. Tsiyatssee yaramaam izuuru pinasarangiya, watam yasampan nda tputsee tatsamooru naparanguwa. Anumand Apanllsha, Nuw Asiriyashuchee tputsi, misha Babiloniyashcheetstam zanganchima siyaa wanimaama, tárangiya. Itaru, siynaa nuwash itsinsaru tachitkinaareesa, siyaa yusur istachintspa; siyaa tapachindachintspa, tárangiya. Anushsha Dapiyarini nlluranur kurakaam kinachu, urutamari tputsee ksutchiya.
Kapitoro 40—55: Apanll tiptsiree kizpuritaa waneerangu, arapchish tputs tsap machtarangitaatssin, tputssha kizpuritam mang' mantsarangusin, ashiritaa Apanllsha, Siy yusur nuwaa chinakinaareesa, nuwsha siyaa tapachindachintspa. Yusur kisshapari taatssa, tárangiya. ¿Antaati apanllputs wizpur taar? Nda. Nuw maacheetsi ichinguru tinaranguri, ¿tamaree nuw siyaa nda yusur istachee? Siysa nuwaa kuki payukinaareesa, nuw siyaa yusur wanasir ksutchintspa, tárangiya. Apanll waanaatsi wipunashee kamankiya.
Kapitoro 56—66: Apanllsha, Ayamtaati nuw tsapurunasee kaneesich tínayaruri, tputs ichingurusin kisshapari taachinllinaya. Anush tputs ichingurusin, nuwaa kuki payuchinllinaya. Kisshapari taachinllinaya, tárangiya.
Nuw Isáysi yuwaa Apanll kamanirangu anoo kamanchintspa
1
1 Nuw Isáysi Apanllee kuk kamanchintspa. Nuw apari Amoscha. Apanll nuwaa yámandarangiya yuwaa Utaáchchee wanichu anootsi. Yuwapur Osiyas, Jotantam, Ajastam, Esikiyastam kurak taarangana anpur Apanll nuwaa tsiyatarangu, anoo kamanchintspa.
Utaáchchis, siy uru yutaritshishee kis chinaksa, nuw siyaa waneekuri atina
2 Tsapurunasshuchis, kanindshuchtamtis ichingurus,
Apanllee kuk mazinangtsa. Apanll ateeja:
Nuw tputsireetsi ipareepzi ashiru yanungakuri,
siy kis kanungarangsa.
Ashiritaa, tputsirshti nuwaa natsarangusin, nuwaa kasaranganaya.
3 ¿Antaati wakar wamkuree kuk nda mazinak?
¿Antaati burr minush tputs pang' watungasheem nachungak? Nda.
Chinuz mang' ndunaritaa, mangoonkiya.
Itaru, nuw tputsiri mangsharitssincha.
Nuwaa nda pakchiyam chinakana; nda mangoonkana.
4 ¿Nuw siyaa yutaritshishpaneetsis tamaycheezi?
Siy yutaritshisheetsimari uru chinaksa.
¡Siy shuchitampazis wipis ashirus yutaritshisheetsim kis chinaksa!
Nuwaatssha Taarashipaneetsi arap kasarangsa.
Nuw Apanlli siyaam Israelaamis taaritaati,
ashiritaa siy nuwaa wanllitarangsa.
Nuw siyaa kizpur chinarangitaati,
ashiritaa siysa nuwaa natsaksa.
5 ¡Mangishis nuwaa kapeetamaam chinachintar ashiksa!
Nuw siyaa kapungtaa pzkookpaz ashiruri,
siyaa waniwantar ashkitaati,
ashiritaa, nda siy kitsis mazinaksa.
Muchis chuwimpaz ashiksa.
Kapung tanukus, wizpuris ndunnaar taaksa.
6 Nutsis kpumawpaz ashirus ashchiri shuneekiya.
Nda pakchiyam matambish taaksa.
K'tsimandis káyaru, muchipis wásur shuneekiya.
Kpumaris, kuchakpaz ashiru kpuneekiya.
Minamtiyam tputs siyaa nda istaku,
irimiyapat taparat, taparat nda ashkiya,
wásuree mayungamaama.
Ashikpaz ashkitaatis, nda kitsis mazinakus, yutaritshishee kis chinaksa.
7 Nuw siyaa waneektaati, itaru siysa nuwaa kuki nda payukus,
kundararis siyaa kachingeersin, tsapuneetsis itutskachu,
Mzarshitis mangutarisha taakiya.
Ashkus, tatsumaris mangutarit itsankiya.
Siyaa pangis tirooksin, yaktaris mzeeztar ashkiya.
Saanasha anoo ngutis napataranll ashiksa.
Kundararis tatsumareetsis kis shamangayarusin,
katungkusin, kaching, kaching ashkanaya.
Sodomshuch tamarangpari ashiritam tsapunis mangu kuree ashkiya.
8 Kundararis siyaa pacharangusin,
Siyonshuchis minamaritis katuchim taaksa.
Na kundararis siyaam tsangakanaya.
Siyonshuchis yakat tambpaz ashiru mzatsip upusanand xiyaa ashkiya.
Sundarshat kachingamamari iturpipitaraa, iturpipitaraa ashishtangat ashkanaya.
9 Kundararis ashirangtaa, nuw wizpurirpati,
nuwamari kasiyeeruri,
siyaa Utaáchcheetsis nayaniranguri,
nda siy musá tsiparangsa.
Ndunnaari siyaa istaranguri,
Sodomaa, Gomorshuchee tamarangpari sheernapsinaya siyaa izuuru kachingaranganaya.
Apanll áttanda tángcha, tárangiya nuwaatsi.
Ashiriya, yutaritshishirimandis Apanllsha siyaa kapung waneekiya, nuw siyaa atina.
Anoomcha, Apanllee zurumpatari chinangtsa, nuw siyaa atashina
10 Siy kurakis Sodomshuch tamapari ashirus mantsir taakis anis,
Apanllee kuk kaapaniri mazinangtsa.
Siy tputsis Gomorshuch tamapari ashirus yutarit taakis anis,
kitsis zurampatari mazinangtsa.
Apanll siyaa tayaspataku, anoo ngatintspa.
11 Apanll Taarashipan ateeja:
¿Mayaamsa nuwaam maachee zapan wayaksa?
Opeejaa, wakaraatstam karupana, nuwaam wayayarus, muchkis,
anoo nuw kapung tsachiktana.
¿Antaati wayungunoo muchkis, anoo nuw ksaja ishingchee?
¿Maacheetsi ursir ksatamtaja napkee?
12 Siy nuwash pangi kuseerus,
maacheetsi nuwaam yushindaktaateesa,
itaru, ¿chak siyaa, ngutis Apanllish pang' xitangtsa, táranlla?
13 Nuwaam maachee ngutis wayarintspa.
Watam an msas nuwaam nda wanasiriwa.
Tputsee tushaneeyarus,
Tsup kaneeschish shambateeni, atitaateesa,
Zar kanusishush tushiyani, atitaateesa,
itaru wand yutaritshishee kis payuksa.
¿Antaati nuw piy shingtsa, tárangee?
Anoo pamaam zandkeezi.
14 Tsup kaneeschish yakchu anush shaniykis,
anoo nuw ksaja napkee.
¿Wanip ngutis ashiksa?
¡Wappa! Anoo zandkeezi.
15 Siy nuwaa mashamaam kuweetsis íwar itsirkachis,
anoo nuw pamaam zandkeezi.
Zapantaa nuwaa mashkus,
ashiritaa siyaa nda mazinakina.
Watam kuwis tputs ursir paxatasawa.
16 ¡Watsta! Yutaritshishireetsis ksangtsa.
¿Antaati siyaa yutaritshishireetsis nuw kis napkee?
¡Yutaritshishireetsis zurampatari ksangtsa!
17 Wanasiriri taangtsa. Anoori chinangtsa.
Itsinsaru taangtsa. Tputsee chinangtsa.
Saanpatatis istangtsa.
Mxaxzeewaa nayaningtsa.
Mashindoo tayutaritarinllpa,
Apanlli siyaa Utaáchcheetsis tárangiya.
18 Apanll átcha:
Mazinangandama. Na tsiyatssee wanasir yareeni.
Wandaya siy yutaritshishiris kuraspaz ashiru kizpur chumbeep paxataru,
ashiritaa nuw tachingkachuri, kizpur mburash taatssa.
Kachizamash tamapari ashiru mburash taatssa.
Mishat, kamis kizpur kawambanataa, itaru opeej pur tamapari ashirisha mburash taachiya.
Nuw siyaa yutaritshishireetsis tachingkachuri, amb ashikpaz ashtatssa.
19 Wandaya siy nuwaa kuki payukchus,
yusur mzarshis yuwariz kisshaparee kanungchiya.
20 Wandaya kitsis nda mazinakus,
kundararis waani shamangayarusin, siyaa kiyung yachachintsa.
Nuw Apanlli siyaa atina,
Apanll waana nuwaa tárangiya.
Ashirucha, Apanllee zurumpatari chinangtsa, nuw Isáysi siyaa atashina.
Waana Apanll Taarashipan Irusarinshucheetsis izuuru yarchiya
21 Siy Irusarinshuchis, sirú Apanllee chinarangitaatis,
itaru natsha ¿tamaysha kiz mshipan tamaparee ashirus nuwaa kasarangus, kis apanllputsush tachitaksa?
Sirútari siy tputsis ashparitis itsinsaru taarangus,
tputsee zurampatari tatsamooru istarangsa.
Ashirangtaatis, itaru natsha pachampaniri taaksa.
22 Sirú siy ur tamapari ashirus wanasir taarangsa.
Itaru, natsha chkaz tamapari ashirus kinarangsa.
Kapusis kam ashirus taarangtaatis,
itaru na kizpur misingapishpaz ashirus kinarangsa.
23 Siy kurakaris na wits nda mazinaksin,
washchirpat tputsi kis amikurtakanaya.
Kurikingazim chinaksin, tputsee nda itsinsaru chinakanaya.
Maachtangazimari támaraksin, mantsir chinakanaya.
Mxaxzee nda nayaniksin,
Mashindootstam nduntam pakchiyam istakanaya.
24 Yuwamand siy Utaáchchis yutarit taakis anumand, Apanll Taarashipan, yuw wamari kasiru an atiya.
¡Wapparita! Na siyaa kundartaranguri, wanichintspa,
Yuwaa tumashtakis anoo tuwapamaama.
25 Nuw kuwipti wizpurirpati, siyaa wanichima.
Chkazeetspaz ashiru izuuru kapeetchintspa.
Yutaritshishireetsis ashparit kachingchima.
26 Ashkachuri, yusur shiyashuchsha yasampan tputsee tatsamooru chinachinllinaya.
Kuraksha wipunash yusur wanasir kamanchinllinaya.
Amb ashkachuri, tputssha siyaa wanasir ínachinllinaya.
Siyaa Irusarinshucheetsis, Yakat itsinsampancha;
apanllpancha, siyaa táchinllinaya.
27 Nuw siyaa itsinsari yasayaruri, tapachindakchuri,
siysa yusur kis taatssa.
Siy Siyonshuchis, yusur nuwash kis tachitatssa.
28 Itaru, yutaritshishpan tputs nuwaa nda chinaku,
nuwsha anoo tputs toro, toro sheeruri kapeetchima.
Nuwaa kuki kapeetkusin, zurampatari tsipachinllinaya.
29 Ashirucha, nuw siyaa atashina:
Siy apanllputseem zapan kis nashamangamaam chapoom yanungarangsa.
Anush kis apanllputsee ungirtarangsa.
Itaru, anumand kapung pazichpasa.
30 Pazikchus, tatsumimpaz ashirus mawirutssa.
Kung ndunpaz ashirus puzataraa ashitssa.
31 Tputs kizpurimuntaa taarangu,
itaru mashar puz ashiru kurachiya.
An tputs wanasirimshingaz nazandku,
yuw tarawztarangu an, mikeeru kurakchu machingchiya.
¿Tamareeja anoo ztazchich?
¿Chakaja anoo tputs istach?
Apanll átcha tángcha, nuwaa tárangiya.
Ashirucha, waana Apanll Taarashipan Irusarinshucheetsis izuuru yarachshapari, nuw Isáysi siyaa atashina.