40
Arangeem yusur Apanll Jobaa tsiyatarangiya
1-2 Ashiriya, natuwa Jobaa. ¿Shiy nuwaa wand tsiyanispat tsiyatamaam zandkish? Nuw Apanlltana Taarashipani. ¿Shiy ambiri ántarush támaam zandkish nuwaatsi? Na kamaninda, Apanll tárangiya.
3-4 Ashiriya, Jobsha Apanllee, ¿Mayaatsi shiyaa yámeeri tsiyateechi? Nda arangeem tsiyatamaam waritakina.
5 Anuri zapan mantsirimsheetstam tsiyataranguri, na ndusha arangeem tsiyatamaam zandkina, tárangiya.
6 Itaru, yusursha Apanll yuwashsha kambusur kizpur tap shitaru, anush tsiyatarangiya.
7 Natunaa wizpurirish nuwaam yámandangi; pangpani. Nuw shiyaa minum k'kuz mashchinllpa. Shiysha nuwaa kamaningandama.
8 Ashiriya, shiy shaanaatsi wanasirim ínayarush, nuwaatssha yutaritshishpaneetspaz ashirush, mantsir tsiyataksha.
9 ¿Antaati shiy nuwapa wizpuriri tatsamoo? Mishat, ¿shiy tsiyatkush, kariy tamapari ashiru kizpur zunganeekchu, nuwapa tatsameecheezish?
10 Mangishish chinakush, Nuw tsapurunasee ksutamaam waritatana, atinaareesha, na shingi. Panganee. Ashkachush, kurakaam shiyaa nuwaanpata tatsamooru ínchinllpa.
11-12 Shiy yuwaa tputs waanaatstamari kuk payukana anoo natstayarush, yuwaatsiri xiyaru, anootsiri kapchata shingcha.
13 Sheerush, mapshishipsha yap tsiparee mapkana ambitam mapungcha, izuuru mbizamamarita.
14 Ashiramchush, anush nuw shiyaa, Zuraktishcha. Napa shaanpata wizpurirish tputsee natstayarush, pachayanllish, táchinllpa.
15 Na mazinangcha Jobaa, Nuw maachtaa ichingaru tinarangina. Behemotaa kungushcheem tinarangitamana. Shiy tamapari ashiritamta anumun mangish chinangcha. Wakar tamapari ashiritam chirichiree katungkitamta.
16 ¿An wizpur tamara? Napangi, wizpureeru wanuts ashchiri shungeerutaru, tanxipa wirkar washitaniwa.
17 Wanishsha karipan tamatarpari ashiru kizpur mbama. Watssha wayanx mbamaw itintingakaru,
18 wanap maachi ngusamb tamapari ashiru kizpur mbama.
19 Anumari ichingaru kasiru, wizpur misha watar tinarangina. Ashirucha, anoo nuwaantamaritam pachamaam waritarina.
20 An machish taakiya. Wazawash, yuwash manginshuch tumuz shaneerana, anush kuseeru, yuwaa chirichir kxunku anoo katungkiya.
21 Katungtarangu, yasinashsha puch tapishushuwmach ashkiya. Nduniya ashiru, kungumun wing puwarnarush pshtuyaru, tapishkiya.
22 Anshurisha wayanpish chirichirimun tutunlltayaru, kanusku, maamaw ashku, nda chiyzamaam zandkiya.
23 Kung Ortag kizpuritaa kumbiyashinu, yuwaa kuxinxinaw anoo puputanitaa, nda puniku chiyzamaam waninda.
24 ¿Chakaja yuwaa kuxinxinaw anoo putayach? Minumtiyam tputs anoo putayaru, wasappa wachoo yuxeeru, shipaatssha tip sheeru kasamaam wanindaja, Apanll Jobaa tsiyatku tárangiya.