13
Ashiriya, na minootssha kamanchinllpa yuwaatssha Sanson nllurtarangu anootsshita
1 Ashiriya, Israelchich yusursha yutaritshishee payuranganaya. Apanllee kuk kapeetaranganaya. Ashirucha, anumand Apanllsha tsiyantarangu, Israelchichee waani Filistewshuch kiyung yachaksin, 40 masach taachinllinpa, tárangiya.
2 Anpursha zar, minum tputs sur Manowa tsap Surash anush taarangiya. Ansha tputs Danarinchichimuna. Wizanllpa taaranganaya. Itaru, kizsha mipshimuna; nda iparinarangiya.
3 Ashirucha, anoo kiz Apanll wasundurur kuseeru, Nduntaatiya shiy iparinarangush mipshitaa taarangush, itaru taarashitish wanasir taarangsha. Ashirucha, na nimun mirichpasha; kamuzpari iparinachsha, Apanll wasundurur kizaa tárangiya.
4-5 Ashiri iparish yuwari nllurtakachu anuri apanllpaneem taachiya. Itaru, shiysha vinoo waamaam watsta. Mishat, waashee pakchiyam kshaam waamaam watsta. Mishat, katungtseetstam mantsamu katungamaam watsta. Mishat, nlluraatsitam muchoo ktireemaam watsta. Watam in nllur kanungkachu yuwaa Filistewshuch Israelchichee kiyung yachakana anoo tapachindachuwa, Apanll wasundurur kizaa tárangiya.
6 Kizsha anoo mazinarangu, wazaranllee kamaniti átu, iripurangiya. Anushsha wazaranllee kamankamchu, Nuwash minum kamuz Apanll wasundurur ashiru kusarangiya. Yap nda chiynaari amb kusarangu, kapung punirustarangina. Mishat, nda surootsitam masharangina. Mishat, wandatam ambcha káyashini nda tárangiya. Itaru, Napakshiti. Ashchiri wanuts misha tashitam Apanllpaz wani ashiru parangina, wazaranllee kiz kamanku tárangiya.
7 Itaru, yuwaa tsiyatku mazinarangi an nuwaatsimari, Uru shiy mirichpasha. Iparish kamuzpari wanindachsha, An nllur yuwamandari nllurtakachu anumandari apanllpaneempa taachiya. Anpatari wachinayaru, uru tsipachiya. Ashirucha, shiy vinoo na waamaam watsta. Mishat, yuwaa waashish kasha anootsitam waamaam watsta. Mishat, mantsamootstam katungamaam watsta, átcha, kiz kamanku tárangiya.
8 Ashiriya, anootssha kiz wazaranll sur Manowa an mazinarangu, Apanllpa masharangiya, Apaa, ¿shiy tamaru ashiksha? Yusursha yuwaa tputs zanganirangish anoo zanganingcha. Nuw yasamaam zandkina iyaa kamanimaama. In nllur nllurtakachu, ¿tamacheezini anooma? Manow Apanllee mashku tárangiya.
9 Apanllsha anoo mazinarangu, yusursha waanaatsi wasundurur zanganirangiya. Kiz waani mzatsish xiytu anush Apanll wasundurur yusur yakarangiya. Wazaranllsha ambiri pangusip taar ashirangiya.
10 Ashirucha, kizsha Apanllee wasundurur parangu, wazaranllip iripurangiya yamati átu. Anushsha, wazaranllish punirustaru iriptaranllu, Manowaa, yusursha tputsee parangina yuwaatsitam pakchi anootsitamta, tárangiya.
11 Ashiriya, Manowsha chiyzaranllu, yap wizanll Apanllee wasundurur pakeeru amb iripurangiya. Anush kusarangsin, anuritam Apanllee wasundurur paranganaya.
12 Ashiriya, Manowsha Apanllee wasundurur, ¿Tamaycheezini yuw tárangish an zar tatsamkachu? ¿Tamayreezini nlluraa yanungachinee? Mishat, ¿arangeem tamaycheezinee? tárangiya.
13 Apanllsha wasundurur, Manowaa, Izanllish tuminuchpa yuwaa kamachtarangi anootsi, tárangiya.
14 Yuw tárangi an watacha, yuw waashish vinpat tinamaa anoo waamaam watsta. Mishat, katungtsitam vinpat ísima anootstam katungamaam watsta. Mishat, yuw waashish kasha an waamaam watsta. Mishat, katungtseetstam mantsamoo katungamaam watsta. Yuwari áti anuri tuminungtsa, Apanll wasundurur tárangiya.
15-16 Manowsha nda Apanllee wasundurur yasaru, Musápa. Neetsiritamapa. Nuwma minum kaapar pachayaruri, patatchima. Shiyapa katungpani, tárangu, Apanllsha wasundurur, Nuw shiyaam kutaktaateena, ¿tamayreezi nuw yuwaa patatirish anoo katungeechi? pinasaktana. Itaru, wandaya amb ashimaam zandkeesha, patumbchimun wayayarush, muchingi Apanlleema, Apanll wasundurur tárangiya.
17 Ashiriya, Manowsha Apanllee wasundurur, ¿Shiy surish chaksha? Kamaningandama sureetsish. Iyshat anumand yasayaruni, shiyaa wappari táchinipa, yuwash shaana kamachtarangish anush zar tatsamkachu anshu, tárangiya.
18 Ashiriya, Apanllsha wasundurur, ¿Antaatiya nuwaa suri tputs minumtiyam yasamaam wanindaja? Ashiriya shiysha ¿Mayaamsha nuwaa suri mashaksha? tárangiya.
19 Ashiriya, Manowsha anoo mazinarangu, minum kaaparaa pachayaru, patumbchimun yuwamun wayayrusin, Apanllee ungirtatarana anumun uwsha wayayru, Apanlleem muchirangiya. Ashirangu, anush Apanll kizpur wanasirimsheerinee yuwamshee nda patarana anumashee tuyamandarangu paranganaya.
20-21 Anushsha Manow wizanllpa napatarandsin, sumas patumbchish kurakataru, shtungataraa ashirangu, anushsha napkusin, Apanll wasundurur yuwash sumas kurakataru anush apusanand naanataratu, káriritarat ashirangiya kanindpi. Anootssha parangusin mangoonaranganaya. In tputs Apanllcha waniya, tárangusin, tutunlltayarusin, timuchta tsapumun char tuw ashiranganaya.
22 Ashiriya, ashima parangusin, Manowsha wizanllee, Tsipachpachi, watam Apanllee paranginiwa, táranganaya.
23 Itaru, wizanllsha, Nduni. ¿Tamareeja tsipachich? Ashiriya, Apanll waanariya iyaa pachamaam zandku, ashireeja kaaparaa Apanlleem muchirangani anoo kis naparangiya. Mishat, ¿nduntam waanaatsi wanasirimshirini yámandarang? Mishat, ¿nduntam iyaam tsiyatssee amb shingcha nlluraatsi átu kamanirang? Ashirucha, nuw, Iyaa kizpurpari chinakiya, atina, wizanll wazaranllee tárangiya.
24 Anumunsha kiz wip wanindarangiya. Anootssha nllura yásamaranganaya Sansona. Ansha nllur kanungarangu, Apanllsha nlluraa wanasir ksutarangiya.
25 Minushsha zar Danarinshi taarish, yuwash shaniytarana anush tsap sur Suraa anumunsha. Istayarish shaniykusin, Apanllsha wasundurur anush kusarangu ksutarangiya Sansonaatsi.
Ashiriya, na kamaneena yuwaa Apanll Sansonaa nllurtarangu anootsi.