36
Baruk Apanllish pang' Jeremiyasaa yandamarini natstarangiya
1 Ashiriya, Jowakim Josiyasaarini wip, Utaásh yakat kurakaam kínaru, ipunpunar masach taachu, anush Apanll nuwaa Jeremiyasaatsi tárangiya:
2 Jeremiyasaa, nimun kirakamun yandangi. Israelchich taarana, misha Utaáchich taarana, minpicheewaatstam tsap sirú tsiyatarangi, anoo ashpari yandangi. Yuwamandari Josiyasaarini kurakaam kínaru tsiyatarangi, anumandari yandam chtayarush, naturisha tsiyateertamti, anumun tutsípancha.
3 Wandaya Utaáshuch yuwaa waneeshshee zanganimaam zandki, anoo mazinayarusin, puniksin, yutaritshishirineetsi kasakchusin, nuwsha yutaritshishireetsi tachingeeruri, mapiychshitina, Apanll tárangu,
4 nuwsha Barukaa, Neriyasa wip, kuruzeeruri, yuwaa Apanll tsiyatarangu anoo ichingaru kamaniranguri, kirakamun uwsha yandarangiya.
5 Ashirangu anumunsha, nuw Barukaa tárangina: Nuwaa Apanllip pang' naamaam tuxarakanawa.
6 Ashiri shiynaa Apanllip pang' naayarush, napashini. Yuwash Apanlleem mangumaam shaniykana, anush kuseerush, kirakareetsi natstangcha. Anshuch yakat ichingarusin shaneerana, misha Utaáshuch tputs anshutam shaneerana, antamsin Apanllee kuk mazinachinllinaya.
7 Apaz anoo mazinakchusin, yutaritshishirineetsi kasayarusin, Apanllish yusur tachitkatssina. Watam Apanll yutaritshishirimandini tsiyantaku, waneeshshee zanganimaam zandku, an kapung yutaritawa, táranguri,
8 Baruksha, yuwaa nuw kamachtaki, anoo ashpari yandayaranllu, Apanllip pang' naayaru, anushsha Apanllee kuk kirakamun yandarangu, anoo natstarangiya.
9 Jowakim, Josiyasaarini wip Utaásh kurakaam kínaru, zameetpa masach tsupsha 9 taachu, anush ichingarusin Irusarinshuch, misha Utaáshchitam tputs, anush kusatarusin, Apanlleem mangumaam shaniykana anush,
10 Baruksha Apanllinung watimburanll wanasir wayarana, misha shtandashini kaneeschiri wayarana annung, misha annungitam Safanarini wip Guemariyas yuwash kirakaa yandaku anoom tandapunurana, annung Baruk xiyeeru, kirakareetsi ichingaru natstarangiya.
11 Ashiri Mikayassha, Guemariyas wip, Safanarini wachinllinu, yuwaa Baruk Apanllee kuk natstaku, anoo ichingaru mazinarangu,
12 kurakap pang' mikeeru naatarangu, yandampanip Elisamap watandpun kuseeru pshturangu, anush yandampani Elisam suru, kurakatam istampan zapan shaneerana anoo parangiya. Delayas, Semayas wip, misha Elnatan, Akborarini wip, misha Guemariyas, Safanarini wip, misha Sedekiyas, Hananiyas wip, arangeem kurak tsipastam shaneerana,
13 anush Mikayassha yuwaa Baruk Apanllee kuk natstarangu, anoo ichingaru kurakaatssha kamanirangiya.
14 Kurakshitisin anoo mazinayarusin, Jehudí, Netaniyasa wip, Selemiyasa wachinllinu, Kustam wachinllinu, táranganaya: Shiysha Barukaa kamanishini. Yuw tputs wazapanish naatstarangish, an kirak pananda tángcha, tárangusin, Jehudísha Apanllip pang' naatarangu, Barukaatssha kurakaa kuk kamanirangiya. Baruksha, Ayu tárangu, kirakaa yáyaranllu, yuwash kurak istampan shaneerana anush kusarangiya.
15 Ashiri uwshtisin, Naani, k'xinangi. Sheerush, Barukaa, kirak payurish an natstangi, tárangusin, uwsha natstarangiya.
16 Kuraksha istamapan anoo mazinayarusin, kapung punirangusin, waanpatatin tsiyatkusin, Nee k'kuz kurak kapungu kamaninda atiya, táranganaya.
17 Anumunsha Barukaa táranganaya; Kamaninda. ¿Tamayarush nee yandarangsha? táranganaya.
18 Baruksha, Jeremiyas nuwaa kamanirangu, nuwsha anoo kirakamun yandarangina, tárangiya.
19 Kuraksha istampan; Shiy, misha Jeremiyas ashirus piyam naayarus tapishumatssa, nda tputs siyaa pamaama, táranganaya.
Ashiriya, kamaneena yuwaa Baruk Apanllish pang' Jeremiyasaa yandamarini natstarangu anootsi.
Kurak Jowakim, Apanllee kuk sumasush muchirangiya
20 Ashiri kurak tsipasaw Barukaa wirkar Elisamash watandpun kasayarandsin, kurakapsha Jowakimap pang' yuwaa Baruk natstarangu, anoo kamanini atusin, naatarangsin, anush kuseersin, kamaniranganaya.
21 Kuraksha anoo mazinayaru, Jehudí kamachtarangiya. Kirakaa, yuw Elisamash watandpun wayarangana, an yashini, tárangiya. Jehudí kirakaa yáyashinu, anush kurak, mishat kuraktam istamapan ichingarusin, mazinarsin, natstarangiya.
22 Tsup Noviembrish kachizpasash shaniyarangsin, kurak pangush sumasinung kuxinxinaw ashirangiya.
23 Ashiriya, Jehudí yandamaa ipunpunarparee kshurangam natstachu, anootsiri kuraksha kirakaa yáyaru, k'chirpa ktureeru sumasush pshtataa, yusur natstayaru pshtataa ashirangu, izuuru kirakaa ashpiri muchiramchu, kasarangiya.
24 Kurak Jowakim, misha kurakawtam tsipasaw anoo k'kuz mazinarangitaatssin, nda pakchiyam puniranganaya. Mishat, nda mang' mantsaksin wamari izichiranganaya.
25 Ashirucha, Elnatan, Delayas, misha Guemariyas ashirusin, Kurakaa, kirakaa muchinllpa, tárangitaatssin, itaru Jowakimsha nda anoo kuk payumaam zandarangiya.
26 Itaru, wipaatssha Jerahmeela pachampanee urkar, misha Serayasa, Asriyela wip, misha Selemiyasa Abdeela wip, Siysa Jeremiyasaa, misha Barukaa putashinints, tárangu, itaru Apanllsha waatssin pishurangu, nda putaranganaya.
Ashiriya, kamaneena yuwaa kurak Jowakim, Apanllee kuk sumasush muchirangu anootsi.
Jeremiyas yusursha yandamaam kamachtarangu, anoo kamankiya
27 Yuwaa nuw, Barukaa Apanllee kuk kamaneeruri, uwsha kirakamun yandarangu, anoo kuraksha Jowakim tiroorangu, anumun iwaz yusur Apanll nuwaa tsiyatku tárangiya.
28 Yusur kirak turpim yáyarush, anush ichingaru yuwaa tachtaru yandayarush, Utaáshuchsha kurak Jowakim tiroorangu, anutam ashpari yandangi.
29 Sheerush, Jowakimaa táncha: Apanll Taarashipan shiyaa átcha. Shiy kirakaa yandama tirooyarush, Jeremiyasaatssha mantsir tsiyatarangsha, yuwamand kirakaa yandarangu anumanda. Babiloniyashchee kurak shiy tuxaraksha. Itaru, zurampatari nee yakat nuw kapeetkachuri, uru tputs, misha chinuztam nda minumtiyam taachiya.
30 Ashirucha, nuw Apanlli Taarashipani Utaáshchee kurak Jowakimaa atina; Shiyachich nlluranur ayamtaati nda kurakaam kinakintachinllinaya. Mishat, shiy tsipakchush, nda mapkusin, mangu wishchip zareetsiri tamuw ashtachsha. Psaansha kachizaatsiritam tamuw ashtachsha.
31 Yutaritshishirimandis shiyaa, misha maachiritaatsish ashpari, misha shiyaa ksutkana, yandampani, kurak tsipasawtam taarana anpatari ichingaru wanichintsa. Yuwaa waneeshshee kamanirangi an tuzanganeekchuri, siyaa ichingarootsis Utaásh taakis anootsis kiyung yachachiya. Watam siy nuwaa kuki nda mangoonamaam zandaksawa, táncha, Apanll nuwaa tárangiya.
32 Ashiri nuwsha yusur kirakaa yáyaruri, Barukaamsha yandampaneem panarangina, yusur yandap aturi. Ashiranguri, nuw yusur kamanirangina yuwatam tachtaru yandayaru, kuraksha Jowakim tiroorangu anootstamta. Itaru, arangeem nuw yandamaam kamanirangina.
Ashiri yuwaa Apanll Jeremiyasaa yusur yandamaam kamachtarangu anoo kamaneena.