25
Ashiriya, na kamanchintspa yuwaa Irusarinaa minshuchsha kurak tayutaritarangu anootsi
[Zapishsha, kurak Sidikiyas Babiloniyshuchpa kurak yusur pachamaam zandaranganaya.] Zar diesash, tsupsha octubrishu, Sidikiyas 9 masach kurakaam kinaru taachu, anush Nabukodonosorpa tsiyantarangusin, Nabukodonosorsha wasundururpa ichingaru shitungaranganaya. Irusarinash tsap kuseeruni, yaktaa taturpiyaruni, tasaseeruni, tandapunuzimun kárimaam káringashish wayayaruni, izuuru tputsee pachayaruni, kasiyani, táranganaya. Ashiriya, Irusarinash kusarangsin, yaktaa taturpiyarusin, tsimbun masach ksutaranganaya. Ashirangsin, Sidikiyas 11 masachsha tatsamoorangu, yuw kurakaam kinarangu, an tsupsha ipunpunarshini, zar nuevish, yuwariz maringarangiya. Amb ashirangu, ichingarusin tputs watungash pishtarangiya. Ashirucha, tputsshitisin yaktaa watandpunu wach zangamichsha wayaranganaya. Itaru, Nabukodonosorsha wasundurur nda suwamaam ksutarangtaatssin, ashiritaa psaan kurak Sidikiyas wasundururpa ashparitin suwaranganaya. Minnunguchich tandapunuz watandaram shitungaranaya. Yap chap tatsumim kurak nashamangshini taarangu, annungiri shitungarandsin, Ortagup kung ngoots suwasuwaranganaya. Itaru, Kaldewshuchsha, Nabukodonosor wasundur tsiyatssee mazinarangusin, Sidikiyasaa tachitaranganaya. Apus Jericoyush watandsash kamatarangsin, kurakaa Sidikiyasa putaranganaya. Sidikiyas wasundurur Kaldewshuchee parangusin, urkaree kasayarusin, suwasuwarangusin, ashpartin pseertaranganaya. Kaldewshuchsha sundar Sidikiyasaa putayarandsin, Babiloniyashuchipsha kurak Riblap yakat machiranganaya, yap Nabukodonosor Hamatap tsap taarangu ambi. Ashiriya, anush wayayarusin, kuraksha Nabukodonosor, Sidikiyasaa waneengtsa, tárangiya. Sidikiyas waana paru, wipaa ashparit wayarpunoo ktsupeerus pchangints. Sheerus, wapareetssha Sidikiyasaa ashpari wachoo yuxungints, tárangiya. Ashiriya, wasundurursha ambiritam ashiranganaya. Sheersin, uwee kamuriyarandsin, yakat Babiloniyap machtaranganaya.
Ashiriya, na kamaneena yuwaa kurakaa Sidikiyasa putarangana anootsi.
Ashiriya, na kamanchintspa yuwaa yakat Irusarinash Apanllee pang' ashchiri tiroorangana anootsi
Tsupsha zameeturinshini, zarsha 7, yuwash kurak Nabukodonosor masach 19 kurakaam kinaru taachu, anush Nebosaradan sundar urkari ichingaroo sundaroo ksutku, an yaktash Irusarinush kusarangiya. Anush ichingaru Apanllee pang', misha kurakaatsitam pang', misha kurakaw kizpureewatam taarangana anoowa pang' tirooranganaya. 10 Ashirangsin, sundar Kaldewshuchsha anshutam kusarangsin, anpasha sundar ipunarangsi, uwshtisin Irusarinaa yakat watandpunu ashchiri kapeetaranganaya. 11 Anumunsha, sundar urkar Nebosaradan ichingaroo Irusarinshuchee katuchimawaatstaa tputs putarangu, ashparita yakat Babiloniyap machirangiya. Ashpatam maachtaa tínamapan taarangana, misha ashpatam Nabukodonosoraa chinarangana, anootsim ichingaru machtarangiya. 12 Kizpur pukireewaatsinaa tputs kasarangiya. Waani uwnaarsin mzatsee, misha kizarunaatstam tatsumawaa tarawaztaksin taachinllinpa átu kasarangiya. 13 Anumunsha sundar Kaldewshuch Apanllish pang' pshturangusin, maachee yuw ngusambpa tinarangana anoo ashpari pátangaranganaya. Itaru, patuzinazeewaa, misha ngusamb chumbeepimash wanasirimash kungoom kanapumaam tínam taarangu anootsimsha Babiloniyaam yátaranganaya. 14 Mishat, yuwaatstam kapung murits ashiru kayatam puzachee xanatarangana anootstam, mishat mbasshisheetstam tinamaa, ichingaru ngusambpat chumbeepimashpa tinarangana anoo Apanllish pang' ichingaru yaranganaya. 15 Anumunsha, kuraksha sundar urkar ichingaru yuw oroo, misha ortam mburshimashi, mishat yuwatam kapung murits tamapari ashiru anush tazutarana, misha yuwaatstam mangaw kayatam kapungoow zapan taarangu, anoo ichingaru yarangiya. 16 An ngusamb chumbeepimashi washunand táchimaam pinasamuna. An ichingaru Saramunarini tínamarini. 17 Patuzinaz tsimbunu íwarini 8 metoroo kánuru taarangiya. Anumun iwaz tsimbun metor wamanirini únambee wayamaam ngusambpa kayatarangana. Anumunsha yamus tamapari ashiru kuripitaraa, kuripitaraa ashiru, munlliy wanus tamapari ashiru kambeerutaru kizpur wanasir chumbichumbtangatu iripcheew tínaranganaya. Anootssha ashpari Babiloniyap itutseerandsin yátaranganaya.
Ashiriya, na kamaneena yuwaa Apanllee pangus ashchiri kapeetarangana anootsi.
Ashiriya, na kamanchintspa yuwaa Utaáchchee tputs ashpari pacharangana anootsi
18 Nebosaradansha, kurak sundar urkar tputsee putarangitamta, apanllpanee urkar Sofoniyasaatsi, misha Sofoniyasaa wipunashee, misha tuchip tputs yuwaa Apanllee pang' washitungash ksutamapan taarangana, anoo ichingaru putayarusin, machtaranganaya. 19 Anumunsha, Irusarinshuchee sundaru urkari, misha zameetpa kuraka wipunash, misha sundaroom ínampani putarangitamta. Sheersin, 60 tputs kurakaw tsipasawaa putarangitamsinaya. 20-21 Kurak Nebosaradan ashparitaa tputs Babiloniyapsha, Ribla yakat, Hamatap kung machtaranganaya. Anushsha kurakash Nabukodonosorash yámandarangusin, kuraksha tputsee parangu, uwsha ashparita pachamaam kamachtarangiya. Sundarsha anuritam ashpari tputsee pacharanganaya. Ashirangsin, Utaáchchee tputs izuuru kachingeersin kasaranganaya.
Ashiriya, na kamaneena yuwaa undarar Utaáchchee tputs ashpari kachingarangu anootsi.
Ashiriya, na kamanchintspa yuwaa Utaáchich tputs pakchimshitisin Ijiptop suwarangana anootsi
22 Babiloniyshuch kurak Nabukodonosor, Guedaliyasaa Ahikamarinee wip, Safanarinee wachinllin kurakaam ínarangiya. Kurak Nabukodonosor Utaáchchee tputs pakchimsha kasarangu anoom ksutamaama. 23 Ashiriya, Utaáchich sundar urkar tiptsirpa anoo tsiyatsis mazinarangusin, yaktap Misap kurakpa Guedaliyaspa tsiyatamaam naataranganaya. Anshitisin tputs yuw naatarangana an sur Ismael, Netaniyas wipa, misha Johanan Karearin wipa, misha Serayas, Tanhumetarini wipa, yakat Netofashchi, anumunsha Maakashuch tputs Jaasaniyas, ashpisin tputs tiptsirpatatam ipunirandsin naataranganaya. 24 Kuraka Guedaliyas anpa tputs wanasir tsiyatarangiya. Ashiriya, tsiyatku, Nuw siyaa zurampatari táchintspa. Siy Kaldewshuchee sundar urkar punirintspa. Nishurisha yakat taayarus, Babiloniyshuchee kurak kuk payukus, kurakaam istakus, kisshapari taatssa, tárangiya. 25 Tsup arangtach tsimbun matayaru yakayaru, anush Ismael, Netaniyas wip, Elisam wachinllin, Dapiyarinchich tputs, anshitisin tputsee chung yamayaru, anpa ipuneerandsin naataranganaya. Sheerandsin, anush yakat kusarangsin, anshuchee kurakaa Guedaliyasa pacharanganaya, misha Utaáchcheetstam tputsi, misha Kaldewshucheetstam tputsi, misha tputs nllitaritaw taarana anpatari pacharanganaya. 26 Itaru, Mispashuch katuchim tputs ichingarusin Kaldewshuchee kapung punirangusin, nllurtam, misha wachinatam, misha sundaruwatam urkar ichingarusin ashparitin Ijiptopsha suwasuwaranganaya.
Ashiriya, na kamaneena yuwaa Ijiptop tsap suwarangana anootsi.
Ashiriya, na kamanchintspa yuwaa Jowakimaa tumanamash tashitungarangu anootsi
27 Utaáchich urkar Jowakim Babiloniyash tsap tumanimash 37 masach taachu, tsupi 12, fecha 27 zar tushiyramchu, anush minsha tputs Evil-merodak sur Babiloniyshucheem kurak kinarangiya. Ansha Jowakimaa kizpur chinarangu, tumanshishish ishitungarangiya. 28 Ashirangu, Jowakimpa wanasir tsiyatarangsin, kapung chinarangiya. Anush Babiloniyash kurak putamaw zapantaa taarangsin, itaru Jowakimaa kapung chinarangu, wanasir naparangiya.
29 Amb kurak ashirangu, Jowakimsha anush kissha taarangiya. Tumanamash kamartarangu, anoo yusheeru, nllitarisha wanasir kamartarangu, kurakpasha washunand kuxineersin, katungaranganaya. Amb ashirangu kissha anush taarangiya. 30 Anumun arangeem kurak Babiloniyshuch Jowakimaam watungasheemsha ichingaru zar katungamaam wayarangiya. Ashirangu, kissha taaku, wachinayaru, anshurisha Babiloniyash tsiparangiya.
Ashiriya, na kamaneena yuwaa kurak Jowakim Babiloniyash tsap tsiparangu anootsi.
[Wapparee. Watamcha tsiyatsis yuw Utaáchchee urkar kuzizimun taarangana ano.]