130
Apanllimun mangich tatkuch, piy ashtarchi
Tputs Irusarinap naakchusin yaseeranganaya.
Zurampatari mangipti Apaa, shiyaa kuruzkina.
Mangi kapung mantsakina.
Apaa, nuwaa kuki mazinangandama.
Nayaningandama. Yutaritshishireetsi tchingangandama.
 
Apaa, shiy iyaa yutaritshishirineetsini kirakarishish yandaranginaareesha, nda mbizakush,
¿chakaja shiyash pshtuch?*
Itaru, shiyamaricha yutaritshishirineetsini yaramaam waritaksha.
Shiyaatsimari chinakaniya.
 
Ashiri Apaa, shiyangzimari mangiptarti kutakina.
Apaa, yaranganda, watam shiy, Mangeetsish tachingchinllpa, tárangshawa.
Ashirucha, nuwsha shiyaam kutakina.
Yaktashuch ksutamapan psaan kutaksin, uru tarasitan ashkana,
nuwsha ashiritamti shiyaam kutakina, nuw atina.
Ashiri siysa Israelchichis, Apanllimun mangis tatkus k'tangtamtsa, nuw tamakparina shingtamtsa.
Watam Apanllimari iyaa chinaku, izuuru tapachindakuwa.
Ashkachu, izuuru Apanllpatarisha kis taatssa.
 
Iyaa Israelchicheetsini yutaritshishirinee ichinguru yarchiya,* nuw siyaa atina.
* 130:3 Romshucheema 3.23 tsiyatsis nipta tatsamooru taaritamta. * 130:8 Matiwa 1.21; Titooma 2.14 tsiyatsis nipta tatsamooru taaritamta.