19
Ashiriya, na kamanchintspa yuwaa Jowab Dapiyaa izamzarangu anootsi
1-2 Tputsshitisin yuwaa Dapiy wip Absalonarini tsiparangu anungaz mang' mantsaku, tanuku anoo parangusin, Jowabaatsshat kamankatssin naataranganaya. Dapiyshat wasundurur anuritam yuw kapung mang' ksaksin, shambatarangana, anoo kasayashtisin, mang' mantsakshitisin, shanee ashiranganaya. Ashirucha amb ashirangsin, ichingarusin sundar apinll naattusin, pázirpat yaktash pshturanganaya. Tapazeetspaz suwarangusina ashiranganaya. Itaru, kurakshat wchoo chirikpat kámanarangu, kapung tanurangu, Iparinaa Absalonarinaa. Iparinaa, tanuku átar ashirangiya.
Jowabshat kurakash pang' pshtuyaru, kurakaa tsiyatarangiya. Kurakaatssha, ¿Mayaamsha iy shiyaa taarasheetsish, ipareetstamtish, mishat izanlleewaatstamtish, mishat izanllish mashingamawaatstam, tapachindarangitaatani, shiyshat iyaa tputsireetsish ipazamaam zandaksha? Amb ashkush, shiy kundarareetsish kapung chinakpaz ashiksha. Itaru, yuwaatsinashat shiyaa taarashish tapachindarangu, anootsinasha sundarureewaatsish ichingaru tputsireetsish natsakpaz ashiksha. Waanariya Absalon kchitanaariya, iynaariya ashparitani tsiparanguni, anootsinaapa shiy mangish kapung ksachsha, tárangu, Pzaya, watsta. Shtungangi. ¿Mayaamsha amb ashiksha? Shitungeerush, sundarureetsish tsiyateerush, arang tuwizpurtangi. Papcha. Ndunnaa ashkush, uru zurampatari na psaan sundarurish ashparipa suwasuwachinllinaya. Amb ashkatssin, ¿shiyaa chakaja ksutchinllina? Shiyshat kanungasimasish kiyung kachiyarangush, wachinarangush yutaritshish shiyaa tushiyrangu, natsha tputsirish shiyaa kasakchusin, uru aranginashat mangish mantsatsha, tárangiya.
Ashirucha, Dapiy anuritam chiyzayaranllu, yaktanung washitungash naateeru, kuxinarangshita. Tputsshitisin ichingarusin anoo yasarangusin, kurakangaz ashparitssin kusaranganaya.
Ashiriya, na kamaneena yuwaa Jowab Dapiyaa izamzarangu anootsi.
Ashiriya, na kamanchintspa yuwaa Dapiy waptam watsapunip Irusarinap kanapurangu anootsi
Anshat Israelchich yuw Absalonaa istarangana an yusur ichingarusin waptam pangup suwasuwaranganaya. Ashirangsin, ichingarusin Israelchichin waanpatatin tsiyatkusin, Sirútari kurak Dapiy iyaa kundararini Filistewshuchee tpachingarangu, iyaa tapachindarangiya. Ashirangitaa, itaru wipamand Absalonarini kurakaam kinamaam zandarangu, anumand tsiyantayaru, minupshat tsap suwarangiya. 10 Ashirangu, iyshat ¿chakamunshitaja mangini tateechini? Atuni, Absalonaatstshat kurakareemani ínaranginiya. Itaru, na watam tapazishsha tsiparanguwa. Ashiri, ¿ndushat yusur Dapiyaatstam kurakareemich ínanda át? táranganaya.
11 Dapiyshat yuwaa Israelchich waanpatatin tsiyatarangana anoo mazinarangu, uwshat apanllpanee Sadokaa, mishat Abiyataraatstam kuruzeeru, Siysat Utaáchichpa wachinanur tsiyatashinints, Kurak ateeja siyaatsi. ¿Mayaamshat zaptaksa? ¿Nda nuwaa musásiri yusur kurakareemis ínaksa? Sheerus, ¿nuwaa nda pangipi yusur wayaksa? 12 ¿Antaati nuw siyapat tunareezini? Zuwanlltanicha. Kurasirini waannandaritcha. Ashiriya ambitaa ashiruni, ¿mayaamsha siysat nuwaa nda mikeerus kurakareemis ínaksa? átcha kuraka, táyarus, 13 Amasayaa kamaningtamtsa. Kurak shiyaa táranlleeja: Iy shiyapat kapungcha zuwanlliniya; kurasirini waannandaritcha. Ashirucha, nuw shiyaa kizpureem kurak ínamaam zandkashina. Na Jowabaa tashitungayaruri, shiyaatsshat kurakaam ínachinllpa. Zurampataricha atashina. Nguti ngichkachinaareena, uru Apanllshapari nuwaa kapung wanichindanaya, átcha kurak Dapiyaa tángtsa, táyaru, Dapiy tsiyatssee apanllpanish zanganirangiya.
14 Dapiy amb tárangu anoo, Amasayshat mazinarangu, uwshat ichingaru Utaáchchee tsiyatarangiya. Utaáchichshat anuritam chinarangusin, tsiyatssee kurakaam zanganiranganaya. Kurakaa, mapiyrush, sundaruriptish urkar ashpari ningtam kanapeerush kusangcha, táranganaya. 15 Kurakshat anoo mazinarangu, kanapeeshinu, kung Ortagamun kusarangiya. Utaáchichshat chamayangakatssin, Guilgaalash tsap kusaranganaya. Ortagaa kung arachich kitamaam istakatssina. 16 Benjaminarinchichshat, Guerarini wip yuw Bahurimash nllurtarangu, anshat sur Simiy Dapiyangaz chamayangakatam káyaranllu, Utaáchichpat washunand yápandayarandsin naataranganaya. 17 Benjaminarinchich mil tputs washunand yápandayarandsin naataranganaya. Sibaatsshat Saularineetsini maachiri ksutamapan taarangu anshat, anshutam wip ashpari 15, muchchurshat 20 taaru, ashparitssin naatarangsin, ndaturi kurak anush kusaru, uwmasin Ortagash kung kusaranganaya. 18 Ashirucha, Kurakaa arachich itsipungayaruni, kuraksha iyaa kissha napchiya, atusin, anoom kapung istaranganaya. Wipaatstam putayarusin, arachich itsipungayarusin kasaranganaya.
Anshat kurak arachich kitaramchu anush, Simiyshat, yuw Dapiyaam patumbchee kapeetarangu, anshat kurakanung iriptaranllu much tsapush timuchta sheeru, 19 Kurakaa, nuw shiyaa atina. Yuwamand shiyaa Irusarinash shitungeeshinush, nuw mantsir tsiyatarangi, anumand nuwaa tsiyantarishpa; anoo izuuru mbizangcha. Na shiyaatsimarishat kukish payukuni, taachinipa. 20 Nuw Osiyarinchichtana. Ashirucha, yuwaa nuw shiyaa mantsir tsiyatarangi anoo nuwaanaatsi yasaranguri, nuw wasina shiyangaz tsiyatati aturi, nuwma imazayaruri kusarangi, tárangiya.
21 Abisayshat Seroyarini wip, ¿Mayaamsha kurakaa, shiy nee Simiyaa napaksha? Pachayarush ksachishpa, watam shiyaa Apanlleetstaatish ipusamarini mantsir tsiyataranguwa, tárangiya.
22 Kurakshat, Nduni shiy nuwaa tamundarishpa. ¿Antaati shiyaa Seroyaatsish wipish tsiyatak? Watam na nuwaa Israelchich yusur chinarangusin, kurakaam ínaranganawa. Ashiriya, amb ashirangsin, nuwshat ¿mayamandshitaja Israelchichee msangeeri pachachee? tárangiya.
23 Ashirucha, Dapiy amb tárangu, Simiyaa, zurampatari nuw shiyaa pachachinllpa, tárangiya.
24 Saularinshat wachinllin Mefiboset kurakaa chamayangarangitamta. Anshat Mefiboset yuwapur Dapiy Irusarinash tsap shitungarangu, anpuri kapung Dapiyangaz mang' mantsarangu nda chumaku, mishat wamareetstam nda káchaku, mishat wasusootstam nda kumaku anuri pásiru anush Dapiy kanapeeshinu kusarangiya. 25 Ashirucha, ashimari Irusarinamand káyashinu, kurakangaz chamayangakatu kusarangu, kuraksha anoo parangu, Mefibosetaa masharangiya. ¿Mayaamsha shiy yuwapururi nuw naatarangi anpur nda nuwash tachitarangsha? tárangu, 26 Mefibosetshat, Ichee kurakaa, watam nuw kutsi wanguy kuyamchinawa; nda putit naamaam waritakinawa. Ashirucha, m'chachureetsi Sebaa kamachtaranguri, Nuwaam burr putayarush, yarangi kurakaripi pangatama, tárangitaati, itaru m'chachurshiti nuwaa mangu tamapingarangiya. 27 Amb sheeru, nuwaa yutaritaam ínayaru, shiyapshat nuwamun ngichirangiya. Ashiriya shiyshat, watam Apanll wasundurur ashirush taakshawa, nuwaa yuwari shaana zandkish anuritam shingandama, tárangiya. 28 Shiy nuwaa pachirinimandi Saularinimand pachamaam waritartaa, shiyshat mangish wanasireerush aparinimandi Jonatanamand nuwaa kapung chinarangsha. Ashirangush, nuwapat washunand shiyamun misarish katungaranginiya. Ashiri amb ashkuri, ¿mayaatsee shiyaa arang mashchi? tárangiya.
29 Kurakshat, ¿Mayaatsi tsiyateechich? Arang nuw tsiyatssiri wanindaja. Nuw Sibaa sirútari kamachtarangina. Siysat Mefibosetash watsapun tarawaztakchus, waama pakchitam panangtsa, tárangi. Anuri wandari nuw chinakina, tárangiya.
30 Mefibosetshat, Waanipari Sibsha watsapuneem ashchiri yachiya. Nuw tsapungaz mangi mantsakeezi, watam kaapa yuwangaz mangi mantsakuri, kurakari yusur kchit kanapuchpa táranguri, na shiyshat yusur pangishish kusarangush, na mangi kischa, tárangiya.
31 Anpurshat min tputs Barsilay Dapiyangaz napkatu watsapunimand Galaadamand káyashinu, Rokelimash tsap chamayangayaranllu, Ortagaa kung arachich itsipungakatu tachitarangiya. Anush arachich itsipungaramchu, yusur waptam kanapurangiya. 32 Barsilaysha kizpur wachin masachirini 80 taarangiya. Anshat mang yuwapur Dapiy Majanayimap tsap suwarangu anpur kizpur kurikpan taarangiya. Ashirucha, Dapiyaamsha maacheetsi yuwangaz zandku, anuwaa zapan istarangiya.
33 Dapiyshat Barsilayaa tsiyatarangu, Pzaa. Shiyapa nuwap tsapuni Irusarinap naayani. Amb nuw shiyaa ksutchinllpa, tárangiya. 34 Itaru, Barsilayshat, ¿Tamari na wachinayanlluri tsipani tutundeenllshat, shiyap tsapunish Irusarinap naachi? Mutatayanllshacha tsipani. 35 Watam naturi 80 masachiri taaruwa. Katungamaamtam ndushat kis káchayaruri katungkina. Waamaamtam mangutarishti kamasingaruri waakina. Amb ashkuri, katungtsee ksamsheewa, mishat yutaritawaatstam ndushat káchakina. Mishat, ¿antaati yaseesshee yaseekana, kizawtamsin yaseekana anoo mazinacheezi? watam kitsi zamamawshitawa. Ambshapari ashkuri, shiyaatsshat tuxarakuri, shiyshat nuwapat mápeetshasha. Nda ashishtamaam kurakaa, ¿mayaamaja nuw shiyap naachi? 36 Watam na yuwangzina kapung zandarangi anootsina na shiyaam istaranguri, na arachich kiteenshawa. Mishat, ¿mayamandshat shiy nuwaam kapung istamaam zandaksha? watam nuw shiyaam Ortagaatsim kitamaam istaranginawa. 37 Ashirucha, nuw kurakaa, shiyaa atashina. Nuwaa ksangandama. Nuw nuwaanpeetam tsapuni naayaruri, tsipamma. Ambiri tsipakchuri, nuwaatsshat aparninungiritam mapchinllinaya. Itaru, neewa. Nuw ipari sur Kimjama machimaam tsapunpish zandkinaareesha, maachtatcha. Zandkush shaamatari tputsirish izuuru yamangcha, tárangiya.
38 Kurakshat ashiri ipareetsish Kimjama nuwaanpee tsapuni machchima, watam shaana átshawa. Ashiri yuwari shaana átish anuritam ashtachima. Uru nuwaamatari tputsiri yamakchuri, nuwashurisha taachiya, tárangiya.
39 Anshat ichingaru tputs Ortagaa kitarangsin, kurakshat kitarangtam, Barsilaya kasakchu, pachipeeru, ishambeersin kasaranganaya. Ashiriya amb ashirangsin, Barsilay yusur waptam watsapunip kanapurangiya.
40 Kurakshat tiptsir ashpari Utaáchich Kimjampatatam washunandari káyarandsin, Guilgaalap tsap naataranganaya. Israelchich chawpitam anush tachitaranganaya. 41 Israelchichshitisin kurakash kuseersin, ¿Mayaamshat Utaáchich ashparitisin shiyaa pachindkanaya? Káchingayarandsin, shiyangaz Ortagamun kuseersin, uwshtisin shiyaa amuytayarusin, istanda tápani atusin, pachindkanaya, táranganaya.
42 Utaáchichshitisin tsiyatarangsin, ¿Antaati iy mangutaritani ashpini kachingaruni kusaranganee? Watam nee kurakaa yaantari Utaáchchini zuwanlliniwa. Ashiri siysat ¿mayamandsha iyaa tsiyantaksa? Mishat, ¿antaati iy mangutaritani kurakash kuseeruni katungkinee? Machtawaatstam ¿antaati iyaam mangutaritaja panak? Nda, uwshtisin táranganaya.
43 Yusur Israelchichshitisin tsiyatarangsin, Itaru, kaapa yaanacha siyamand arang kurakaa amuytashiniya. Iynaa siyaa Utaáchcheetsis yanuruni, zapantanicha. Ashiriya, ¿mayaamsha siy iyaa niyraksa? Watam iyma chtaru kurakareetsini kanapungi táranguni, na kurakareetsini yanpuranginiwa, táranganaya.
Tárangitaatssin, Utaáchich kapung tsiyantarangusin, Israelchichpat nambaranganaya.
Ashiriya, na kamaneena yuwaa Dapiyarini yusur watsapunishtam kusarangu anootsi.