11
Darwa Na Magpamatuod
Pagtapos ta sugo ki yaken, may gaatag ki yaken ta pangsukol na paryo baston daw gambal kanen an, “Sigi, sukulon no timplo na balay ta Dyos daw alaran an daw bilangen no man daw pila ittaw gasimba dya. 2-3 Piro, dili no sukulon sular an ta timplo tak sular an patagana para ta mga ittaw na ula kakala ta Dyos. Danen magsamad ta syudad ta Dyos na Jerusalem daw lupigen man mga ittaw dya seled ta kwarintay-dos bulan na yon man mil dos sintos sisinta na adlaw. Ipadala ko darwa an na magpamatuod parti ki yaken para naan ta yon man na mga adlaw magsugid danen ta ake na kabebet-en na mga ittaw magnelsel daw dilian iran na mga sala. Danen an na darwa magsuot ta bayo na sanot-sanuton para ipakita na danen an nasebean gid tenged ta mga sala ta mga ittaw.”
Danen na darwa papaanggid ta darwa na kaoy na olibo daw darwa man na tungtungan ta ilaw na may lampraan na naan ta tubangan ta Ginuo na manugdumala ta bilog na kalibutan.* Daw may mga ittaw na magtingwa na sakiten darwa an na magpamatuod, alin ta baba ta darwa ya may apoy na maggwa na magpatay ta iran na mga kuntra. Danen na darwa may gaem na magpegeng ta uran aged dili muran mintras na magsugid danen ta kabebet-en ta Dyos. May gaem man danen an na imuon waig an na lengngessa daw magdala ta maskin ino na klasi na salot naan ta bilog na kalibutan bisan pila bisis na gusto danen.
Daw matapos ta darwa ya iran na pagpamatuod, may makaadlek na ayep na maggwa alin ta lungag na kadalemen an ula katapusan daw magsulong na maggira ki danen na darwa. Pirdien danen an daw patayen ta ayep ya. Pagpatay ki danen, iran na lawa palargaan nang naan ta mayor na karsada ta bantog na syudad na naan dya palansang ate ya na Ginuo Jesu-Cristo naan ta krus. Bantog ya na syudad paanggid ta syudad Sodoma daw lugar na Egipto. Seled ta tallo tenga na adlaw, iran an na lawa tan-awen ta tama na mga ittaw alin ta lain-lain na mga lai, linggwai daw alinan na linai daw lugar. Mga ittaw dili magtugot na ilebbeng darwa ya na patay. 10 Tanan na mga ittaw na ula gapati ta Dyos, danen an magkalipay gid daw magsinadya daw mag-atagay ta rigalo tak napatay darwa ya na tenaan na naagian danen segeng na sakit.
11 Piro, daw maglambay tallo tenga ya na adlaw, darwa ya buien ta Dyos daw magbangon. Madlek gid tanan na mga ittaw na makakita ki danen. 12 May mamatian na mag-ambal na naan ta langit. Ambal din naan ta darwa ya, “Miling kaw di.” Pagmati danen, magpaapaw danen munta ta langit naan ta panganod mintras iran na mga kuntra magtan-aw nang ki danen. 13 Ta yon man na uras, maglinog ta biskeg daw masamad isya ta sampulo na parti ta syudad Jerusalem daw mapatay man pitto libo na mga ittaw tenged ta linog ya. Madlek gid mga ittaw an na mabilin na bui daw magdayaw danen an ta Dyos naan ta langit.
14 Natapos en pangarwa na segeng na kalised. Piro, tandaan nyo! Mabot en pangallo na segeng na kalised.
Pag-eyep Ta Pangpitto Na Trumpita
15 Sunod na nakita ko naan ta ake na panan-awan pangpitto na angil gaeyep ta iya na trumpita daw naan ta langit may mga gambal na bakod iran na kagi,
“Umpisa anduni, tanan na mga ittaw ta kalibutan
dumalaan ta ate na Ginuo Dyos
daw Cristo na iya na Pinili Na Mag-ari.
Mag-ari kanen an asta ta ula katapusan.”
16 Binti-kwattro ya na mga pataa na manugdumala na gamungko ta iran na truno naan ta palibot ta Dyos, gadapa danen daw pasimba danen Dyos an. 17 Ambal danen,
“O Ginuo Dyos Na Makagagaem, kaon yan na bui alin ta una asta anduni,
gapasalamat kay ki kaon tak papakita no en na bakod gid imo na gaem
daw gaumpisa ka en na magdumala ta kalibutan.
18 Sikad gid gilek mga ittaw na ula gakala ki kaon.
Piro, abot en uras na ipakita no imo na kagilek.
Abot en uras na ukuman no mga ittaw na napatay.
Mag-atag ka ta dayad na bales naan ta mga gasirbi ki kaon na yon man mga manugsugid ta imo na kabebet-en, mga ittaw na imo gid daw tanan na mga ittaw na gataod ki kaon, mga kebes man daw mga may datas na katengdanan.
Abot en uras na paagemen no ta segeng gid na silot tanan danen na gadala ta mga ittaw na magbuat ta malain na yon man tenaan na maageman danen segeng na silot na alin ki kaon.”
19 Pag-ambal ta binti-kwattro na pataa na manugdumala, may gabukas ta timplo na balay ta Dyos naan ta langit daw naan ta selled nakita Kaban Ta Kasugtanan. Sigi pangilat daw sigi gadageeb. Galinog daw may dakmel na uran ta yilo.
* 11:4 Pwidi nyo mabasa naan ta Zacarias kapitulo kwattro parti ta darwa na tungtungan ta ilaw na may lampraan daw darwa na kaoy na olibo.