15
Ewe mwichen Soukünö ra mwichfengen lon Jerusalem
15.1-21
1 Iwe, ekoch mwän ra feito seni Jutea o feila Antiokia, ra popuetä le asukula ekewe chon lükülük, “Ämi ousap tongeni küna manau, are ousap sirkomsais usun met a mak lon än Moses kewe Allük.”
2 Iei popun Paulus me Parnapas ra fokun anini o pölüeniir. Iwe, ra filätä Paulus me Parnapas fiti ekoch chon lükü Jesus seni Antiokia pwe repwe feila Jerusalem o churi ekewe soukünö me souakom usun ei osukosuk.
3 Iwe, chon ewe mwichefel ra tiniirela, nge lupwen ar saifetal lon Fönisia me Samaria, ra apworausa ngeni ekewe chon lükü Jesus usun än ekewe chon lükün Israel kul ngeni Kot. Ei pworaus a afisätä watten pwapwa lon leluken ekewe chon lükülük meinisin.
4 Lupwen ra tori Jerusalem, chon ewe mwichefel, ekewe soukünö me ekewe souakom ra etiweer. Iwe, ra apworausa ngeniir meinisin mine Kot a föri rer.
5 Mürin ekoch me lein ekewe chon lükü Jesus, ir chon ewe mwichen Farisi, ra ütä o apasa, “Ekewe chon lükün Israel repwe fokun sirkomsais. Oupwe pwal üreniir, pwe repwe fokun aleasochisi än Moses kewe Allük.”
6 Iwe, ekewe soukünö me ekewe souakom ra chufengen, pwe repwe pwüngüpwüngfengen usun ei osukosuk.
7 Mürin chomongun ar akaninifengen Petrus a ütä o üreniir, “Ämi pwii kana, oua silei pwe ekoch ier ra la Kot a filiei me leimi pwe üpwe afalafala ewe Pworausen Manau ngeni ekewe chon lükün Israel, pwe repwe tongeni rongorong o lükü Jesus.
8 Iwe, Kot a silei ekiekin aramas meinisin, a pwärala an etiweer ren an fang ngeniir ewe Ngünmifel usun chök an fang ngenikich.
9 Esap wor aimwümwü lefilach me ir. A amusala ar tipis, pokiten ra lükü Jesus.
10 Iwe, pwota oua sotuni Kot iei ren ämi anomu won afaren ekewe chon lükü Jesus och chou ach kewe lewo pwal püsin kich mwo nge sisap tongeni uwei?
11 Apwi! Kich sia lükü, pwe sia küna manau ren ümöümöchün ach Samol Jesus usun chök ir.”
12 Iwe, unusen ewe mwich a fanafanala, lupwen ra rongorong usun än Parnapas me Paulus apworausa ekewe asisil me manaman Kot a föri rer lein ekewe chon lükün Israel.
13 Nge lupwen ar wes le kapas, James a apasa, “Ämi pwii kana, oupwe aüseling ngeniei.
14 Simon a awewe ngenikich usun än Kot popuetä le pwäräta an ekiek ren an angei me lein ekewe chon lükün Israel eu mwichen aramas fän itan.
15 Än ekewe soufos kapas ra fokun tipeeufengen won ei, pun a mak,
16 ‘Iei alon ewe Samol: Lon kan fansoun mwach üpwe liwinsefäl
o aüsefälietä ewe mwün Tafit.
Üpwe försefäli mine a tala
o apöchökülasefäli.
17 Pwe ekewe ekoch aramas meinisin repwe feito rei,
ekewe chon lükün Israel meinisin, üa köri ngeniir nei.
18 Iei alon ewe Samol mi asile ngeni aramas
ekei mettoch me lomlom.’ ”
19 Iwe, James a sopwela lon an kapas, “Iei ai ekiek, pwe sisap aweiresi ekewe chon lükün Israel mi kul ngeni Kot.
20 Nge sipwe makkei echö toropwe o asile ngeniir, pwe resap mongö och mongö mi limengau a piin asor ngeni ekewe uluulun anümwäl, resap föri sokun lisowu, resap pwal ochoch fituken man mi ffor me ün cha.
21 Pun än Moses kewe Allük a fen alea fän chomong lon ekewe imwen felikis iteiten ränin sapat, nge an kewe kapas ra afalafala lon ekewe telinimw meinisin.”
Ra tinala ewe toropwe ren ekewe chon lükü Jesus ir chon lükün Israel
15.22-35
22 Mürin ekewe soukünö me ekewe souakom fiti unusen chon ewe mwichefel ra apwüngala pwe repwe filätä ekoch mwän me leir, pwe repwe tiniirela Antiokia fiti Paulus me Parnapas. Iwe, ra filätä Silas me Jutas mi pwal iteni Parsapas, ir ruoman souemwen me lein ekewe chon lükü Jesus.
23 Iei masouen ewe toropwe ra tini ngeniir:
“Äm pwimi kewe soukünö me souakom, aia tinala äm kapong ngeni ämi pwiim kana meinisin chon lükün Israel mi nom lon Antiokia, Siria me Silisia.
24 Äm aia rongorong pwe ekoch mwän seni leim ra torikemi, ra osukosukakemi me orukorukakemi ren mine ra apasa, nge äm aisap tiniirela remi.
25 Iei mine äm aia chufengen meinisin o tipeeufengen, pwe aipwe filätä ekoch mwän pwe aipwe tiniirela remi. Repwe fiti pwiich kewe mi achengicheng Parnapas me Paulus,
26 ir ätekewe ra fangela manauer fän iten ewe angangen ach Samol Jesus Kraist, inamwo ika ra tolong lon riaföü.
27 Iei mine aipwe tinala Jutas me Silas, repwe wisen apworausa ngenikemi met kewe chök kapas aia makkei lon ei toropwe.
28 Ewe Ngünmifel me äm aia tipeeufengen pwe aisap anomu womi och chou, pwe ekei chök allük oupwe apwönüretä:
29 Ousap mongö ekewe mongö ra piin asor ngeni ekewe uluulun anümwäl, ousap ün cha, ousap ochoch fituken man mi ffor, ousap föri sokun lisowu. Are oua tümwünükemi seni ekei mettoch, oupwe feiöch. Äm aia kapong ngenikemi meinisin.”
30 Mürin ra tinala ekewe mwän. Iwe, ra feila Antiokia. Ikenan ra amwichafengeni unusen ewe mwichen chon lükülük o ra ngeniir ewe toropwe.
31 Nge lupwen ekewe aramas ra aleani ewe toropwe, ra uren pwapwa ren ekewe kapas mi apöchöküla leluker.
32 Jutas me Silas, ir pwal soufos, ra achomonga ar kapasen apöchöküla o anüküchara ekewe chon lükülük.
33 Mürin ar nonom ikenan ekoch fansoun, ekewe chon lükülük ra osürela fän kinamwe pwe repwe liwinla ren chokewe mi tiniireto.
34 [Nge Silas a filätä pwe epwe nonometiu ikenan.]
35 Iwe, Paulus me Parnapas ra nonometiu Antiokia. Ikenan ir me pwal ekoch chiechier ra awewei o afalafala kapasen ach Samol.
Paulus me Parnapas ra imwüfesen
15.36-41
36 Iwe, ekoch fansoun mürin Paulus a üreni Parnapas, “Ousipwe liwinsefäl pwe sipwe churi pwiich kewe lon ekewe telinimw meinisin ia sia afalafala ie kapasen ach Samol, sipwe pwal piir ika ifa usur.”
37 Iwe, Parnapas a mochen pwe Johannes mi pwal iteni Markus epwe pwal etiir,
38 nge Paulus esap ekieki pwe epwe öch ar repwe uwei, pun esap likitü le etiir tori sopolan ar we angang, nge a likitiirela lon Pamfilia o liwinsefäliti Jerusalem.
39 Iwe, a fis eu watten aninifengen lefiler, pwe ra imwüfesen. Parnapas a uwei Markus o saila Saipros,
40 nge Paulus a filätä Silas pwe epwe eti i. A feila, nge ekewe chon lükülük ra anomu i fän tümwünün ümöümöchün ewe Samol.
41 A saifeil lon Siria me Silisia o apöchöküla chon ekewe mwichefel.