30
Ewe rongen asoren ötüöt
30.1-10
(Eks 37.25-28)
1 “Iwe, kopwe föri eu rongen asoren ötüöt seni ewe irä akasia, pwe kopwe keni ewe apach mi pwokus won.
2 Langataman me chölapan repwe chök nönöfengen, ükükür engol me walu inis. Iwe, tekian epwe ükükün ilik me wonu inis, nge mächän kewe fofoch kopwe förunuseifengeni me ewe rongen asor.
3 Iwe, kopwe apacha kolt mi mürina ngeni won me lepekin, pwal ngeni mächän kewe, kopwe pwal alinga ngeni kolt mi chipwechip ünükün me won.
4 Kopwe föri ruofoch ring seni kolt o apacheretä fän alingan we me epek, kopwe pwal föri ina usun me epek. Iwe, ekewe ämwär repwe sökulong lon ekewe ring pwe aramas repwe tongeni ämwära.
5 Kopwe falei ämwärin kewe seni ewe irä akasia o apachätä kolt wor.
6 Kopwe anomu ei rongen asoren ötüöt mwen chechen ewe leni ia ewe pworofel a nom ie, pwe epwe nom awenewenen öppüngün, iei ewe lenien ai ümöümöch ia üpwe churuk ie.
7 Iteiten lesosor Aaron epwe keni apach mi pwokus won, lupwen a amolätä ekewe lamp.
8 Nge lekuniol, lupwen Aaron epwe keni ekewe lamp, epwe pwal keni apach mi pwokus won ewe rongen asoren ötüöt. Iei ewe asoren ötüöt mwirimwirimi kana repwe eäni ngeni ewe Samol mi Lapalap fansoun meinisin.
9 Iwe, ousap eäni asor apach esap fich ngeni won ewe rongen asoren ötüöt, ousap pwal eäni asoren kek ika asoren mongö ika asoren ün won.
10 Fän eu lon eu ier Aaron epwe föri ewe angangen elimelima ewe rongen asoren ötüöt ren an tofi ngeni mächän kewe chan ewe mönün asoren amusamusen tipis. Ei epwe fis iteiten ier seni eu täppin aramas tori eu täppin. Ei rongen asoren ötüöt a unusen pin fän itei ngang ewe Samol mi Lapalap.”
Mine chon Israel repwe fesinätiu fän iten ewe imw mangaku ia aramas ra churi Kot ie
30.11-16
11 Iwe, ewe Samol mi Lapalap a kapas ngeni Moses,
12 “Lupwen kopwe angei iteiten chon Israel, eman me eman mi alealong lon ewe iteit epwe mönätiu liwinin manauan ngeniei, pwe esap wor och feiengau epwe küw lon ewe fansoun kopwe aleaniir.
13 Iwe, iei ükükün mine eman mi alealong lon ewe iteit epwe mönätiu: eu lelimu aunus silifer, epwe för won ewe kilo ra aea le aükük lon ewe imw mi pin. Iwe, ewe eu lelimu aunus silifer repwe eäni asor ngeniei.
14 Iteiten eman me eman mi alealong lon ewe iteit seni ier rüe feitä epwe eäni ei asor ngeniei ngang ewe Samol mi Lapalap.
15 Chon pisekisek resap mönätiu lap seni ükükün eu lelimu aunus, nge chon wöüngau resap mönätiu kis seni, lupwen ra eäni asor ngeniei liwinin manauer.
16 Iwe, kopwe angei ei moni seni chon Israel fän iten angangen ewe imw mangaku ia aramas ra churiei ie. Nge ngang ewe Samol mi Lapalap üpwe chechemeni ekewe chon Israel pokiten ra mönätiu liwinin manauer.”
Ewe sepien töttöl
30.17-21
17 Iwe, ewe Samol mi Lapalap a kapas ngeni Moses,
18 “Kopwe föri eu sepi me motongan seni piras fän iten angangen töttöl. Kopwe anomu ewe sepi lefilen ewe imwenfel seni mangaku me ewe rongen asor, kopwe pwal alölöü ngeni koluk.
19 Iwe, Aaron me nöün kewe mwän repwe talü pöür me pecher ngeni.
20 Repwe fokun chiri ngeniir koluk pwe resap mäla, lupwen repwe tolong lon ewe imwenfel seni mangaku ika lupwen repwe kan ngeni ewe rongen asor, pwe repwe föri ar angang o keni ekewe asor ngeniei.
21 Iwe, repwe talü pöür me pecher pwe resap mäla. Ei epwe eu allük ngeni Aaron me mwirimwirin kana repwe apwönüetä seni eu täppin aramas tori eu täppin.”
Ewe löön epit me ewe apach mi pwokus
30.22-38
22 Iwe, ewe Samol mi Lapalap a pwal kapas ngeni Moses,
23 “Kopwe angei ekei mettoch mi fokun pwokus: engol me ruu paun safei mi aüchea itan mör, ewe sokun mi lölö, wonu paun sinamon mi pwoarar me wonu paun kalamus mi pwokus,
24 pwal engol me ruu paun kasia, repwe för won ewe kilo ra aea le aükük lon ewe imw mi pin, me eu kalon noppuk seni föün olif.
25 Seni ekei mettoch kopwe föri eu löön epit mi pin usun chon föri lö ra föri.
26 Mürin kopwe angei ewe löön epit o epiti ngeni ewe imw mangaku, ia aramas ra churiei ie, me ewe pworofel,
27 kopwe pwal epiti ewe chepel me pisekin, ewe lenien atittin me pisekin, ewe rongen asoren ötüöt,
28 ewe rongen asoren kek me pisekin meinisin, pwal ewe sepien töttöl me motongan.
29 Iwe, kopwe apini ekei mettoch pwe repwe unusen pin, nge meinisin mine epwe tooriir epwe pin.
30 Mürin, kopwe epiti Aaron me nöün kewe mwän o apiniir pwe repwe angang ngeniei lon wisen souasor.
31 Iwe, kopwe üreni ekewe chon Israel, ‘Ei lö ai löön epit mi pin, epwe pin ngenikemi seni eu täppin aramas tori eu täppin.
32 Ousap aea ei lö le epiti ngeni aramas, ousap pwal föri sokun lö usun chök ei, pun a pin, nge epwe pwal pin ngenikemi.
33 Eman mi föri ei sokun lö ika epiti ngeni eman lükün Aaron me mwirimwirin kana epwe käriwu seni aramasan.’ ”
34 Mürin, ewe Samol mi Lapalap a kapas ngeni Moses, “Kopwe angei ekei mettoch mi pwokus iter stakte, onika, kalpanum me apach mi pwokus, nge ükükür epwe wewefengen.
35 Kopwe föri seniir eu minen asoren ötüöt, epwe pwokus usun lö förien ewe chon föri lö, epwe pwal nofit ngeni salt, nge epwe limöch o pin.
36 Iwe, ekis seni ewe minen asoren ötüöt kopwe üsi tori epwe moromor o isetiu mwen ewe pworofel lon ewe imwenfel seni mangaku, ewe ia üpwe churuk ie. Ei epwe eu mettoch mi unusen pin ngenikemi.
37 Lupwen oupwe föri püsin ämi minen ötüöt mi pwokus, ousap apirü usun ei minen asoren ötüöt. Ei epwe pin ngenikemi, pun och mi pin fän itei.
38 Nge eman mi apirü ei sokun minen ötüöt mi pwokus pwe a sani pwonnan, epwe käriwu seni aramasan.”