2
Ekewe soukünö ra etiwa Paulus
2.1-10
1 Iwe, mürin engol me rüanü ier üa liwinsefäliti Jerusalem, nge Parnapas a fitiei, üa pwal uwei Titus.
2 Üa liwinsefäl, pun Kot a pwäri ngeniei pwe üpwe liwinla. Lon äm chufengen me ekewe souakom, üa awewe ngeniir ewe Pworausen Manau üa afalafala ngeni ekewe chon lükün Israel. Üsap mochen pwe ai angang lon ekewe fansoun ra la ika pwal lon fansoun ikenai epwe lomotongau.
3 Iwe, chiechiei Titus, inamwo ika i eman re Krik, nge ekewe souakom rese echimwa pwe epwe sirkomsais,
4 usun ekoch ra mochen. Ekei mwän ra pomweni pwe ir chiechiach chon lükülük o ra anifilong lon ach mwich pwe repwe operi ach ngas sia eäni lon Kraist Jesus. Ra mochen ach sipwe wewe ngeni amanau lon ach sipwe apwönüetä mine ekewe allük ra apasa pwe sipwe föri.
5 Nge sisap fokun tipeeu ngeni ar kewe allük, pun sia mochen pwe enletin ewe Pworausen Manau epwe chök nonom remi.
6 Nge ätekewe, aramas ra apasa pwe ir souakom, üa apasa ei pokiten esap lifilifil me rei met sokun aramas ir. Kot esap nenengeni lapalapen aramas me lükün, üpwe apasa, ekei souakom resap apasa pwe üpwe siwili och lon ai afalafal.
7 Nge ra fen mefi pwe Kot a ngeniei ewe wis pwe üpwe afalafala ewe Pworausen Manau ngeni ekewe chon lükün Israel, usun chök a ngeni Petrus ewe wis an epwe afalafala ewe Pworausen Manau ngeni ekewe chon Juta.
8 Pun ren än manaman Kot a awisaei pwe üpwe eman soukünö ngeni ekewe chon lükün Israel, usun chök an awisa Petrus pwe epwe eman soukünö ngeni ekewe chon Juta.
9 Iwe, James, Petrus me Johannes, ir ekewe ürelapen mwichefel, ra mefi pwe Kot a ngeniei ei wis. Iei mine ra kapong won pöür ngenikem me Parnapas, iei ewe asisil pwe sia tipeeufengen lon ach angang. Ra tipeeu ngeni pwe Parnapas me ngang aipwe angang lein ekewe chon lükün Israel, nge ir repwe angang lein ekewe chon Juta.
10 Iwe, ra chök tüngor pwe aipwe chechemeni ekewe mi osupwang lon ar we mwich, iei ewe mettoch üa fen achocho le föri.
Paulus a apwüngü Petrus lon Antiokia
2.11-14
11 Nge lupwen Petrus a tori Antiokia, üa kapas awenewen ngeni me mwen ekewe aramas, pun a mwäl an föför.
12 Pun me mwen ekoch mwän, James a tiniirela, resamwo tori Antiokia, Petrus a momongöfengen me ekewe soulängin chon lükün Israel. Nge lupwen an ekei mwän war, Petrus a ütä seniir o esap chüen etiir le mongö, pun a niuokusiti ätekewe mi apasa pwe ekewe chon lükün Israel repwe sirkomsais.
13 Iwe, pwal ekewe ekoch souläng ir chon Juta ra pwal eti Petrus lon an likatuputup, pwal mwo nge Parnapas a tokola ren ar likatuputup.
14 Lupwen üa küna pwe ra föri och mine esap pwüng ngeni enletin ewe Pworausen Manau, üa üreni Petrus me mwer meinisin, “En eman chon Juta, nge ka föri örünien ekewe chon lükün Israel, nge sap örünien ekewe chon Juta. Pwota ka sotuni le echimwa ekewe chon lükün Israel pwe repwe föri örünien ekewe chon Juta?”
Chon Juta me chon lükün Israel ra küna manau ren ar lükülük
2.15-21
15 Kich pwükütän chon Juta pokiten samach me inach ir chon Juta, nge sisap “chon tipis seni chon lükün Israel”.
16 Nge sia silei pwe eman aramas a küna pwüng me ren Kot ren an lükü Jesus Kraist chök, nge esap ren an apwönüetä ekewe Allük. Iei usun pwal kich sia lükü Jesus Kraist, pwe sipwe küna pwüng me ren Kot ren ach lükü Kraist, nge sap ren ach apwönüetä ekewe Allük. Pun esap fokun wor eman a küna pwüng me ren Kot ren an apwönüetä ekewe Allük.
17 Nge lupwen sia kütta pwe sipwe küna pwüng me ren Kot ren ach eufengen me Kraist, a pwä pwe kich chon tipis usun chök ekewe chon lükün Israel. Iwe, ifa usun, wewen ei pwe Kraist eman mi alisätä tipis? Apwi, esap fokun ina!
18 Are ngang üa aüsefälietä ewe lamalamen Allük üa fen atala, mürin a pwä pwe üa püsin atala ewe Allük.
19 Iei mine ren pwüngün ekewe Allük ngang üa fen mäla, üa mäla ngeni ekewe Allük pwe üpwe manau fän iten Kot. Ngang üa fen iräpenges me Kraist,
20 iei mine sap ngang üa chüen manau, nge Kraist a manau loi. Ei manau üa manaueni iei üa manau ren ai lükü ewe Nöün Kot mi echeniei o fangala manauan fän itei.
21 Üsap fokun mochen pwe üpwe pöütala än Kot ümöümöch. Pun ika eman aramas epwe küna pwüng me ren Kot ren ekewe Allük, wewen pwe än Kraist mäla a lomotongau!