1 Iwe, lupwen aisap chüen tongeni engila ren äm positikemi, aia ekiekifengeni, pwe äm chök aipwe nonom lon Aten, ✡ 2 nge aipwe tinala Timoty, pwiim we mi etikem le angang ngeni Kot lon äm afalafala ewe Pworausen Manau usun Kraist. Äm aia tinala pwe epwe apöchöküla letipemi o alisikemi lon ämi lükülük, 3 pwe esap wor eman me leimi epwe kulsefäl pokiten ekei riaföü mi torikemi. Oua püsin silei pwe iei letipen Kot ngenikich pwe sipwe tolong lon ekei sokun riaföü. 4 Pun lupwen aia chüen nom remi, aia ürenikemi me mwen an esamwo fis, pwe sipwe tolong lon riaföü. Iwe, ei a wesewesen fis usun oua fokun silei. 5 Iei popun üa tinala Timoty, pun üsap chüen tongeni engila ngeni ai üsap silei pworausemi. Iei usun üa tinala i an epwe pii ika ifa usun ämi lükülük. Ewer, üa chök niuokus ika Tefil a sotunikemi o äm angang meinisin epwe lomotongau.

6 Nge iei Timoty a liwinsefälito o uwato rem pworaus mi mürina usun ämi lükülük me tong. A apworausa ngenikem pwe fansoun meinisin oua chechemenikem fän pwapwa o oua fokun mochen churikem, usun pwal äm aia fokun mochen churikemi. ✡ 7 Iei mine ämi pwiim kana, lon ekei weires me riaföü meinisin mi torikem, letipem a pöchökülela fänäsengesimi ren ämi lükülük. 8 Pun iei aia wesewesen manau, pokiten oua nüküchar lon ämi souläng lon ach Samol. 9 Iei aia kilisou ngeni Kot fänäsengesimi. Aia kilisou ngeni fän iten ewe pwapwa aia eäni mwen mesen Kot pokitemi. 10 Lerän me lepwin aia tüngor ngeni Kot ren unusen letipem pwe epwe mwüt ngenikem pwe aipwe churikemi o awora ngenikemi met oua osupwang ren lon ämi lükülük. 11 Amwo Samach Kot me ach Samol Jesus epwe püsin wäsi alem, pwe aipwe tongeni feila remi. 12 Amwo ach Samol epwe alapala ämi chen lefilemi pwal ngeni aramas meinisin, pwe epwe fokun wattela usun watten äm echenikemi. 13 Ach Samol epwe apöchöküla letipemi, pwe oupwe unusöch o pin mwen mesen Samach Kot, lupwen ach Samol Jesus epwe liwinsefälito fiti nöün kewe chon pin meinisin.