12
Kot a amiriti nöün kana
12.1-11
1 Pokiten a fen wor rech eu watten mwichen chon pwärätä ar lükü ra pwelifeilikich, iei mine ousipwe likitätiu mettoch meinisin mi epetikich, pwal sokun tipis mi alikafifikich, nge sipwe tipeppos le sä lon ewe kitir mi nom mwach.
2 Ousipwe chök nenengeni Jesus ewe chon popuetä me chon awesala ach lükülük. Esap fangatä pokiten ewe iräpenges, nge fänäsengesin ewe pwapwa mi nom mwan esap ekieki itengauen an mäla won ewe iräpenges. Iwe, iei a mottiu lepelifichin Kot.
3 Oupwe ekieki usun watten an riaföü pokiten ekewe chon tipis mi oput i! Iei mine ousap apilükingau o fangatä.
4 Pun lon ämi fiu ngeni tipis ousamwo üpöchökül tori ewe aükük pwe oupwe ninnila.
5 Ifa usun, oua manlükala ekewe kapasen apöchökül Kot a ürenikemi pokiten ämi nöün kana?
“Nei, kosap aücheangauei än ewe Samol kapasen fön,
Kosap apilükingau lupwen a amirituk.
6 Pun ewe Samol a fönöü iö a echeni,
a fokun apwüngü meinisin i a etiweer pwe nöün.”
7 Oupwe likitü fän ewe riaföü a torikemi usun än sememi apwüngükemi. Kot a föri ngenikemi usun mine a föri ngeni nöün kana. Ifa usun, mi wor eman nau saman esap apwüngü?
8 Are Kot esap apwüngükemi usun an apwüngü nöün kana meinisin, wewen ämi ousap wesewesen nöün, pwe ämi upun leroch.
9 Ina chök usun samach lon pekin fituk, ra apwüngükich, nge kich sia meninitiir. Epwe ifan me watten ach sipwe aleasochisi Samach we lon pekin ngünüch o manau!
10 Samach kana lon pekin fituk ra apwüngükich lon fansoun mochomoch, usun ra ekieki pwe a pwüng. Nge Kot a ekieki ach feiöch lupwen a apwüngükich, pwe sipwe eäni an pin.
11 Lupwen Kot a apwüngükich usun itä nge sia mefi lon ewe otun pwe och mettoch sia letipeta ren, nge sisap pwapwa. Nge mürin chokewe mi angei ei sokun apwüng repwe manaueni eu manauen kinamwe me pwüng.
Kapasen öüröür me kapasen fön
12.12-29
12 Iei mine oupwe apöchökülätä pöümi me pwäsukumi kana mi apwangapwang.
13 Oupwe awenechara ekewe al oupwe fetal won, pwe ekewe chon pechemä resap apwangapwangala, nge repwe pöchökülela.
14 Oupwe achocho ngeni ämi oupwe kinamwefengen me aramas meinisin, oupwe pwal achocho ngeni ämi oupwe manaueni eu manau mi pin, pun esap wor eman epwe küna ach Samol are esap pin.
15 Oupwe tümwünüfichikemi pwe esap wor eman leimi epwe kul seni än Kot ümöümöch. Esap pwal wor eman epwe usun chök efoch irä maras mi märitä o afisätä chomong fitikoko, pwe chomong repwe limengau ren.
16 Esap pwal wor eman epwe föri föförün lisowu ika sufölingau ngeni Kot usun chök Esau, pun a amömöla wisan wisen mwänichi ren eu chök mongö.
17 Iwe, oua silei pwe a mochen angei feiöchün me ren saman me mürin, nge esap chüen tongeni angei. Esap chüen küna efoch alen an epwe siwilisefäli mine a fen föri, inamwo ika a kütta ewe feiöch fän chönün mesan.
18 Ämi ousap feito ngeni eu chuk oua tongeni atapa, ousap feito ngeni ewe chuk Sinai mi ngetenget ren ekkei, mi rochopwak me toputop me mölümöl,
19 ren tikimongun rappwa me eu möngüngü. Lupwen ekewe aramasen Israel ra rongorong ewe möngüngü, ra tüngor pwe resap chüen rongorong pwal eu kapas,
20 pun resap tongeni etiwa ewe allük a apasa, “Ikamwo eman man epwe tori ewe chuk, epwe fokun momon ngeni fau tori an epwe mäla.”
21 Mine ekewe aramas ra küna a fokun eniweniw, pwe Moses a apasa, “Ngang üa chechech ren ai niuokus.”
22 Nge ämi oua feito ngeni ewe Chuk Sion, pwal ngeni ewe telinimwen ewe Kot mi manau, ewe Jerusalem mi nom läng fiti ngeröün chon läng.
23 Oua feito ren ewe mwichen souläng mi usun chök nöün Kot kewe mwänichi, ra chufengen fän pwapwa, iter a mak lon läng. Oua feito ren Kot ewe soukapwüng fän iten aramas meinisin, pwal ren ngünün ekewe chon pwüng mi unusöch.
24 Oua feito ren Jesus ewe chon afförün eu pwon mi fö, pwal ren ewe cha ra aea le käsup, a eäni kapas mürina seni chaan Epel.
25 Iwe, oupwe tümwünüfichi pwe ousap oput ätewe mi kapas. Chokewe mi oput ätewe mi aronga än Kot kapas won fanüfan, resap tongeni sü seni liwiningauen ar tipis. Are epwe iei usun, epwe ifan me watten ewe liwiningau sipwe küna, are sia kul seni ewe mi kapas seni läng.
26 An möngüngü a achechecha fanüfan lon ena fansoun, nge iei a pwon, “Pwal fän eu üpwe achechecha fanüfan, nge sap fanüfan chök pwe pwal läng.”
27 Ewe kapas “pwal fän eu” a pwärätä pwe ekewe mettoch mi för repwe chechech o morola, pwe ekewe mettoch resap tongeni chechech repwe nonomola.
28 Iei mine ousipwe kilisou, pun sia mwüni eu mwü esap tongeni siwil. Ousipwe kilisou o fel ngeni Kot fän suföl me menin lon eu lapalap i epwe pwapwa ren,
29 pun ach Kot a wesewesen eu ekkei mi fokun afeiengau.