15
Usun än Apia nemenem
15.1-8
(2.Kron 13.1–14.1)
1 Iwe, lon ewe engol me waluen ierin mwün ewe king Jeropoam nöün Nepat we mwän, Apia a tolong lon wisan wisen king o nemeni Juta.
2 A nom lon Jerusalem o nemenem lon ükükün ülüngat ier. Iten inan we Maaka nöün Apsalom we fefin.
3 Apia a föri ekewe tipis meinisin saman we a föri me mwan, lelukan esap pwal unus ngeni ewe Samol mi Lapalap an we Kot usun leluken Tafit an we lewo.
4 Nge fän iten Tafit, ewe Samol mi Lapalap an we Kot a ngeni eman mwirimwirin, eman nöün mwän, pwe epwe nemenem me lon Jerusalem me mürin, a pwal anüküchara Jerusalem.
5 Pun Tafit a föri mine a pwüng me fän mesen ewe Samol mi Lapalap, nge lon unusen ränin manauan a aleasochis ngeni än Kot kewe allük, chilon chök ren ewe föför a fis ngeni Uria ewe re Hit.
6 Iwe, a chök fifis maun lefilen Rehopoam me Jeropoam lon unusen ränin manauer.
7 Nge lusun pworausen än Apia föför meinisin a mak lon puken uruwon ekewe kingen Juta. A pwal fis maun lefilen Apia me Jeropoam.
8 Iwe, Apia a mäla, nge ra peiaseni lon ewe telinimwen Tafit. Nge Asa nöün we mwän a siwili lon wisan wisen king.
Usun än Asa nemenem
15.9-15
(2.Kron 15.16–16.6)
9 Iwe, lon arüen ierin mwün Jeropoam ewe kingen Israel, Asa a tolong lon wisan wisen king lon Juta.
10 A nom lon Jerusalem o nemenem lon ükükün faik me eu ier. Iten inen saman we Maaka nöün Apsalom we fefin.
11 Asa a föri mine a pwüng me fän mesen ewe Samol mi Lapalap, usun Tafit an we lewo a föri.
12 A asüela seni ewe fanü ekewe mwän mi fangala inisir fän iten lisowu lon ekewe lenien fel ngeni anümwäl, a pwal aturala ekewe uluulun anümwäl saman we a föriir.
13 A pwal awesi Maaka inen saman we seni wisan wisen inelapen king, pun a föri eu uluulun ewe anüfefin Asera mi fokun anioput. Asa a pöküetiu ei uluulun anümwäl o kenala me arun ewe öüwö Kitron.
14 Iei mwo än Asa esap ataela ekewe lenien fel won ekewe leni mi tekia, nge lelukan a chök unus ngeni ewe Samol mi Lapalap lon ränin manauan meinisin.
15 Iwe, a uwato lon imwen ewe Samol mi Lapalap ekewe pisek saman we a apini, pwal ekewe pisek seni kolt me silifer püsin i a apini.
Asa a föri eu pwonen atipeeu ngeni Penhatat
15.16-24
16 Iwe, a fis maun lefilen Asa ewe kingen Juta me Paasa ewe kingen Israel lon unusen ränin manauer.
17 Paasa ewe kingen Israel a feila Juta pwe epwe maun ngeni. A apöchökülala tittin ewe telinimw Rama o pineela än ekewe aramas repwe towu me tolong lon fanüen Asa ewe kingen Juta.
18 Mürin, Asa a angei ewe silifer me ewe kolt mi chüen nom lon ewe lenien iseis pisek aüchea me lon imwen ewe Samol mi Lapalap, pwal lon püsin imwan. Iwe, a ngeni nöün kewe nöüwis ekewe pisek o tinirela ren Penhatat nöün Taprimon we mwän, nge Taprimon nöün Hesion mwän ewe kingen Siria mi nom lon Tamaskus. Asa a pwal tinala pworaus o üra,
19 “Kose mochen epwe wor eu pwonen atipeeu lefilach, usun a fen fis lefilen semei me semom. Nengeni, üa tinala reöm silifer me kolt pwe ai lifang ngonuk. Kopwe atai om pwonen atipeeu ngeni Paasa ewe kingen Israel, pwe i me nöün sounfiu repwe towu seni fanüei.”
20 Iwe, ewe king Penhatat a aüselinga än ewe king Asa tüngor o tinala ekewe meilap me nöür mwichen sounfiu pwe repwe maun ngeni ekewe telinimwen Israel. Iwe, ra liapeni Ion, Tan, Apel-petmaka, pwal unusen ewe fanü Kalilea me unusen ewe fanü Naftali.
21 Iwe, lupwen ewe king Paasa a rong usun, a ükütiu le apöchöküla tittin ewe telinimw Rama o liwinsefäliti Tirsa.
22 Mürin, ewe king Asa a asilefeili eu allük ngeni chon Juta meinisin pwe repwe feito, esap wor eman epwe tiwela. Iwe, ra feito o uweela ekewe fau me ekewe ira Paasa a aea le apöchöküla tittin ewe telinimw Rama, nge ewe king Asa a eäniir le apöchöküla ngeni tittin ewe telinimw Kepa lon ewe fanü Peniamin me tittin ewe telinimw Mispa.
23 Iwe, lusun pworausen än Asa föför meinisin, an föförün pwora, pwal ekewe telinimw a aüetä, a mak lon puken uruwon ekewe kingen Juta. Nge lupwen a chinlapala, a samau pechen.
24 Iwe, Asa a mäla, nge ra peiaseni ren semelapan kewe lon ewe telinimwen Tafit. Nge Jehosafat nöün we mwän a siwili lon wisan wisen king.
Usun än Natap nemenem
15.25-32
25 Iwe, lon aruuen ierin mwün Asa ewe kingen Juta, Natap nöün Jeropoam we mwän a tolong lon wisan wisen king o nemeni Israel lon ükükün ruu ier.
26 Nge Natap a föri mine a ngau me fän mesen ewe Samol mi Lapalap, a tipis usun saman we o emweni chon Israel ngeni tipis.
27 Nge Paasa nöün Ahia we mwän seni ewe ainangen Isakar a rawangauei Natap o niela me lon Kipeton mi nom lon fanüen chon Filistia, lupwen Natap me chon Israel meinisin ra pwelifeili Kipeton fän pisekin maun.
28 Paasa a niela Natap o siwili lon wisan wisen king lon aülüngatin ierin än Asa ewe kingen Juta nemenem.
29 Iwe, lon ewe otun Paasa a wiseni ewe wisen king, a niela chon leimwen Jeropoam meinisin, esap fokun likiti mwo eman tori a aroserela meinisin, usun nöün Kot we chon angang Ahia ewe re Silo a fen apasa fän alon ewe Samol mi Lapalap.
30 Ei a fis pokiten än Jeropoam asonga ewe Samol mi Lapalap ewe Koten Israel ren an kewe tipis a föri, pwal ren an emweni chon Israel ngeni tipis.
31 Iwe, lusun pworausen än Natap föför meinisin a mak lon puken uruwon ekewe kingen Israel.
32 Nge a chök fifis maun lefilen Asa ewe kingen Juta me Paasa ewe kingen Israel lon unusen ränin manauer.
Usun än Paasa nemenem
15.33–16.7
33 Iwe, lon aülüngatin ierin mwün Asa ewe kingen Juta, Paasa nöün Ahia we mwän a popuetä le nemeni unusen Israel. A nom lon Tirsa o nemenem lon ükükün rüe me rüanü ier.
34 Nge Paasa a föri mine a ngau me fän mesen ewe Samol mi Lapalap, a tipis usun Jeropoam a tipis o emweni chon Israel ngeni tipis.