2.King
Kapas akom
I. Iten ei puk: Aruuen King, soposopun ekewe pworaus mi mak lon Aeuin King. Lon ewe Paipelin Ipru ekei ruu puk Aeuin me Aruuen King ra chök eu.
II. Chon makei ei puk: Esap fat, nge lon pworausen uruwo Jeremaia.
III. Itelapemongen ei puk: Eu mwü mi iteföüla a tolong lon itengau o oola pokiten a lükümach ngeni Kot.
IV. Kapas aüchean ei puk: Feiengau a tori ekewe aramasen Israel me Juta pokiten ar likitala Kot.
V. Masouen ei puk Aruuen King: Lon ei puk a soposopola pworausen uruwon ewe mwün Juta me ewe mwün Israel. Ei puk a kinikinitiu lon 2 kinikin:
1. Pworausen ekewe ruu mwü seni ewe ier 834 mwen Kraist (B.C.) tori talan Samaria me mwüchülan ewe mwün Israel lon ewe ier 721 mwen Kraist.
2. Pworausen ewe mwün Juta seni talan ewe mwün Israel tori ewe otun king Nepukatnesar a liapeni o ataela Jerusalem lon ewe ier 586 mwen Kraist. Ewe puk a ükütiu won pworausen ewe kepinan Juta itan Ketalia mi nom fän nemenien chon Papilon, pwal won pworausen än ewe kingen Juta itan Jehoiachin musowu seni an fötek lon Papilon. Ewe soufos mi iteföüla me lon 2.King itan Elisa, ätewe mi siwili Elias.
VI. Tettelin masouen ei puk:
Ekewe ruu mwü 1.1–17.41
1. Ewe soufos Elisa 1.1–8.15
2. Pworausen ekewe kingen Juta me Israel 8.16–16.20
3. Ewe telinimw Samaria a tala, chon Israel ra oola 17.1-41
Ewe mwün Juta 18.1–24.20
1. Pworausen Hiskia tori Josia 18.1–21.26
2. Än Josia nemenem 22.1–23.30
3. Ekewe amwüchülan kingen Juta 23.31–24.20
Jerusalem a tala 25.1-30
1
Ahasia a mäla
1.1-18
1 Iwe, mürin än Ahap ewe kingen Israel mäla, chon Moap ra ü ngeni Israel.
2 Ahasia ewe kingen Israel a turuwu seni arongorongun won imwan me lon Samaria o fokun feiengau. Iei mine a tinala chon künö, pwe repwe feila ren Paalsepup ewe koten Ekron o aisini ika epwe chikarsefäl seni an feiengau.
3 Nge nöün ewe Samol mi Lapalap chon läng a üreni Elias ewe soufos seni Tispe, pwe epwe feila o churi ekewe chon künö seni ewe kingen Samaria o üreniir, “Ifa usun, esap wor eman Kot lon Israel, ina oupwe feila o aisini Paalsepup ewe koten Ekron?
4 Iei alon ewe Samol mi Lapalap ren ewe king, ‘Esap pwätä seni an kiekien samau, nge epwe fokun mäla.’ ” Iwe, Elias a feila o föri usun mine ewe Samol mi Lapalap a üreni.
5 Mürin, ekewe chon künö ra liwiniti ewe king, nge ätewe a aisiniir, “Pwota oua liwinsefäl?”
6 Nge ir ra pälüeni ewe king, “Mi wor eman mwän a churikem o ürenikem pwe aipwe liwinto reöm, en äm king, o ürenuk alon ewe Samol mi Lapalap, ‘Ifa usun, esap wor eman Kot lon Israel, ina kopwe titila o aisini Paalsepup ewe koten Ekron? Iei mine kosap pwätä seni om kiekien samau, nge kopwe fokun mäla.’ ”
7 Iwe, ewe king a aisiniir, “Ifa lapalapen ewe mwän mi churikemi o ürenikemi ekei kapas?”
8 Nge ir ra pälüeni, “Ewe mwän a üföüf echö üf seni ülen man o ri ngeni lukalapan efoch riri seni silin man.” Iwe, ewe king a üra, “I Elias seni Tispe.”
9 Mürin, ewe king a tinala eman meilapen sounfiu fiti lime nöün sounfiu, pwe repwe uwato Elias. Iwe, ewe meilap a feito ren Elias mi mot won ungen eu chuk o üreni, “En aramasen Kot, ewe king a allük ngonuk pwe kopwe feitiu.”
10 Nge Elias a üreni, “Are ngang eman aramasen Kot, ekkei epwe feitiu seni läng o kenikemiila me noum kewe lime sounfiu.” Mürin, ekkei a feitiu seni läng o kenala ewe meilap me nöün kewe lime sounfiu.
11 Iwe, ewe king a tinala ren Elias pwal eman meilapen sounfiu fiti lime nöün sounfiu. Ätewe a feila o üreni Elias, “En aramasen Kot, iei än ewe king allük ngonuk pwe kopwe feitiu iei chök.”
12 Nge Elias a üra, “Are ngang eman aramasen Kot, ekkei epwe feitiu seni läng o kenikemiila me noum kewe lime sounfiu.” Mürin, ekkei a feitiu seni läng o kenala ewe meilap me nöün kewe lime sounfiu.
13 Mürin, ewe king a tinala ewe aülümanün meilapen sounfiu fiti lime nöün sounfiu. Nge lupwen ewe aülümanün meilap a tori won ungen ewe chuk, a fotopwäsukitiu mwen Elias o tüngorei, “En aramasen Kot, üa tüngor ngonuk, kose mochen kopwe chüngüw manauei me manauen noum kei lime chon angang.
14 Nengeni, ekkei a feitiu seni läng o kenala ekewe ruoman meilapen sounfiu mi akom mwei fiti nöür kewe akalime sounfiu. Nge iei kose mochen kopwe chüngüw manauei.”
15 Mürin, nöün ewe Samol mi Lapalap we chon läng a kapas ngeni Elias, “Kopwe fitätiu ewe meilap, nge kosap niuokusiti.” Iei mine Elias a ütä o fitätiu ewe meilap ren ewe king.
16 Iwe, Elias a üreni ewe king, “Iei alon ewe Samol mi Lapalap, ‘Pokiten ka tinala chon künö pwe repwe aisini Paalsepup ewe koten Ekron, usun chök nge itä esap wor eman Kot lon Israel pwe kopwe tongeni aisini, iei mine kosap pwätä seni om kiekien samau, nge kopwe fokun mäla.’ ”
17 Iwe, Ahasia a mäla, usun Elias a apasa fän alon ewe Samol mi Lapalap. Nge Joram pwin we a siwili lon wisan wisen king, pun esap wor nöün Ahasia mwän. Iwe, Joram a popuetä le nemenem lon aruuen ierin mwün Jehoram nöün Jehosafat we mwän ewe kingen Juta.
18 Nge lusun pworausen än Ahasia föför meinisin a mak lon puken uruwon ekewe kingen Israel.