4
Satan a sotuni Jesus
4.1-13
(Mat 4.1-11; Mark 1.12-13)
1 Iwe, Jesus a ur ren Ngünmifel lupwen a liwinsefäl seni ewe chanpupu Jortan, iwe, Ngünmifel a emwenala lon fanüapö.
2 Ikenan Satan a sotuni lon ükükün faik rän. Lon ekana rän esap mongö och. Nge wesilan ekei rän a echik.
3 Iwe, Tefil a üreni, “Are en Nöün Kot, kopwe üreni ei fau pwe epwe wiliti pilawa.”
4 Nge Jesus a pölüeni, “A mak lon ekewe Toropwe mi Pin, ‘Aramas resap manau ren mongö chök.’ ”
5 Mürin Tefil a emwenatä Jesus won eu leni mi tekia o aküna ngeni mwün fanüfan meinisin lon ekis chök mochomochen fansoun.
6 Iwe, a üreni, “Ngang üpwe ngonuk ar kewe nemenem meinisin pwal wöür kewe, pun ra nom fän nemeniei, nge ngang üa tongeni ngeni iö üa mochen ngeni.
7 Iei mine are kopwe fel ngeniei, üpwe mwüt ngonuk pwe kopwe eäniir meinisin.”
8 Jesus a pölüeni, “A mak lon ekewe Toropwe mi Pin, ‘Kopwe fel ngeni ewe Samol om Kot o angang ngeni i chök.’ ”
9 Mürin Tefil a emwenala Jesus Jerusalem o aütai won ungen ewe imwenfel. Iwe, a üreni, “Are en Nöün Kot, kopwe aturuketiu me ikei.
10 Pun a mak lon ekewe Toropwe mi Pin, ‘Epwe allük ngeni nöün kewe chon läng pwe repwe tümwünuk.’
11 A pwal mak, ‘Repwe pwisuk lepöür, pwe pecheöm esap chepeti fau.’ ”
12 Iwe, Jesus a pölüeni, “A mak lon ekewe Toropwe mi Pin, ‘Kosap sotuni ewe Samol om Kot.’ ”
13 Iwe, lupwen Tefil a wes me sotuni Jesus ren ekewe sosot meinisin a feila seni lon ekis chök fansoun.
Jesus a popuetä an angang lon Kalilea
4.14-15
(Mat 4.12-17; Mark 1.14-15)
14 Mürin Jesus a liwinsefäliti Kalilea, nge manamanen Ngünmifel a nom ren. Iwe, pworausan a chöfetal lon unusen ewe fanü meinisin.
15 A afalafal lon ekewe imwen felikis o aramas meinisin ra mwareiti i.
Chon Nasaret resap etiwa Jesus
4.16-30
(Mat 13.53-58; Mark 6.1-6)
16 Mürin Jesus a feila Nasaret, ewe ia a mämäritä me ie. Iwe, lon ewe ränin sapat Jesus a feila lon ewe imwen felikis usun an örüni. Iwe, a ütä pwe epwe aleani ekewe Toropwe mi Pin,
17 nge ra ngeni puken ewe soufos Aisea. Iwe, a sukala ewe puk o a küna ewe ia a mak ie ekei kapas,
18 “Ngünün ewe Samol a nonom woi,
pun a afiliei pwe üpwe afalafala
ewe Pworausen Manau ngeni ekewe chon mwelele.
A tiniei, pwe üpwe aronga ngeni ekewe chon fötek pwe repwe ngasala,
ekewe chon chun pwe repwe küna mwer,
üpwe pwal angasala chokewe aramas ra ariaföüür.
19 Üpwe pwal arongafeili pwe a war ewe fansoun,
lupwen ewe Samol epwe amanaua nöün aramas.”
20 Mürin Jesus a öppüngala ewe puk, a aliwini ngeni ewe chon angang o mottiu. Iwe, ekewe aramas meinisin mi nom lon ewe imwen felikis ra afota meser won.
21 Iwe, a popuetä le kapas ngeniir, “Ikenai ekei kapas oua rongorong me lon ei Toropwe mi Pin ra fen pwönüetä.”
22 Aramas meinisin ra kapas öch usun o mwar ren an kapas mi manaman a apasatä. Ra ais, “Ifa usun, sap i nöün Josef?”
23 Nge a üreniir, “Ewer, üa silei pwe oupwe apasa ngeniei ei mwiitun, ‘Sousafei, kopwe püsin apöchökülok!’ Kopwe föri ikei lon püsin telinimwomw met aia rongorong pwe ka föri me lon Kapernaum.”
24 Iwe, a sopwela le kapas ngeniir, “Enlet eman soufos esap wor meninin me lon poputän telinimwan.
25 Oupwe aüselingaei: A wor chomong fefin mi mä pwülüer lon Israel lon fansoun Elias, lupwen a wor mailengita lon unusen ewe fanü pokiten esap püng üt lon ükükün ülüngat esop ier.
26 Iwe, Kot esap tinala Elias ren eman lein ekewe fefin mi mä pwülüer lon Israel, nge a tinala ren eman fefin mi mä pwülüan lon Sarapat lon ewe fanü Siton.
27 A pwal wor chomong aramas mi samaun rupun pwötür lon Israel lon fansoun ewe soufos Elisa. Nge esamwo wor eman a limöch seni rupun pwe Naeman chök ewe re Siria.”
28 Iwe, lupwen ekewe aramas meinisin lon ewe imwen felikis ra rongorong ekei kapas, ra fokun song.
29 Ra ütä o etekinawu Jesus lükün ewe telinimw, ra etekinatä won ewe chukuchukutä ia ar telinimw a köütä ie, pwe repwe aturätiu me lepokun ewe achau.
30 Nge Jesus a fetalelong lein ewe mwichen aramas o feila seniir.
Eman mwän a wor eman ngününgau won
4.31-37
(Mark 1.21-28)
31 Mürin Jesus a feila Kapernaum, eu telinimw lon Kalilea. Ikenan a afalafala ekewe aramas lon ewe ränin sapat.
32 Iwe, ekewe aramas ra mairü ren an afalafal, pun a afalafal usun eman mi wor an manaman.
33 Iwe, me lon ewe imwen felikis a wor eman mwän a wor eman ngününgau won. A leüömong le puchör,
34 “Aha! Met ka mochen föri ngenikem, Jesus seni Nasaret? Ka feito pwe kopwe afeiengauakem? Ngang üa silei en, en Nöün Kot we mi Pin.”
35 Iwe, Jesus a allük ngeni ewe ngününgau, “Kopwe fanafanala o towu seni ei mwän.” Iwe, ewe ngününgau a aturätiu ewe mwän me mwen ekewe aramas, a towu seni, nge esap afeiengaua.
36 Iwe, ekewe aramas meinisin ra mairü o kapasfengen lefiler, “Met sokun kapas kei a eäni? Ren manaman me pöchökül ei mwän a allük ngeni ekewe ngününgau, iwe, ra towu.”
37 Iwe, ewe pworaus usun Jesus a chöfetal lon unusen ewe fanü.
Jesus a apöchöküla chomong aramas
4.38-41
(Mat 8.14-17; Mark 1.29-34)
38 Mürin Jesus a towu seni ewe imwen felikis o feila lon imwen Simon. Iwe, inen pwülüen Simon a eäni eu samaun pwichikar, iei mine ra tüngor ngeni Jesus pwe epwe apöchöküla.
39 Iwe, Jesus a feila ren, a ütä arun än neminewe we peet o üreni ewe pwichikar pwe epwe towu seni. Iwe, ewe pwichikar a towu seni. Lon ewe chök otun neminewe a pwätä o a tümwünüür.
40 Iwe, lupwen akkar a tuputiu, aramas ra uwato ren Jesus aramas meinisin mi eäni sokopaten samau. Jesus a iseis pöün wor o apöchöküleer meinisin.
41 Pwal anün rochopwak ra towu seni chomong aramas, ra puchörütä, “En Nöün Kot!” Nge Jesus a apwüngüür o esap mwüt ngeniir pwe repwe kapas, pun ra silei pwe i ewe Kraist.
Jesus a afalafal lon ekewe imwen felikis
4.42-44
(Mark 1.35-39)
42 Iwe, lupwen a ränila, Jesus a feila lükün ewe telinimw lon eu leni ia esap wor aramas ie. Ekewe aramas ra küttafeili, nge lupwen ra küna, ra sotuni ar repwe amwöchü, pwe esap feila seniir.
43 Nge Jesus a üreniir, “Üpwe fokun afalafala ewe Pworausen Manau usun Mwün Kot lon pwal ekoch telinimw, pun iei popun Kot a tinieito.”
44 Iwe, Jesus a sopwela le afalafal lon ekewe imwen felikis lon Jutea.