8
Ekewe fefin mi eti Jesus
8.1-3
1 Eu fansoun mürin Jesus a saifeil lon ekewe telinimw me sopw o afalafala ewe Pworausen Manau usun Mwün Kot. Iwe, ekewe engol me ruoman chon kaiö ra eti,
2 pwal ekoch fefin mi ngasala seni ekewe ngününgau mi nom wor o ra pöchökül seni ar kewe samau. Ikkei iter: Maria mi pwal iteni Maktalene, iei i neminewe füman ngününgau ra towu seni,
3 Joanna pwülüen Kusa, i eman mi wisen tümwünü imwen Herotes me Susana, pwal chomong fefin mi alisi Jesus me nöün kewe chon kaiö ren mine a wor rer.
Pworausen awewe usun eman chon amworafeili pwükil
8.4-8
(Mat 13.1-9; Mark 4.1-9)
4 Iwe, chomong aramas ra feito seni eu me eu kewe telinimw, nge lupwen eu mwichen aramas mi chomong ra mwichfengen, Jesus a apworausa ngeniir ei pworausen awewe:
5 “Eman mwän a feila pwe epwe amworafeili fotan pwükil. Iwe, lupwen a amworafeili ekewe pwükil, ekoch föün ra mworotiu lepekin al, ia aramas ra puriretiu ie, nge ekewe machang ra äni.
6 Ekoch föün ra mworotiu lon lenien föüföü. Iwe, lupwen ekewe irä ra pwükütä, ra pwasala, pun ewe pwül ese nüküchöchön.
7 Pwal ekoch kewe föün ra mworotiu lein iräfölüföl. Iwe, ekewe iräfölüföl ra märipökütä me ekewe irä o ra amopu ekewe irä.
8 Nge ekoch föün ra mworotiu lon pwül mi mürina. Ekewe irä ra märitä o fokun ua, efoch me efoch a uani ipükü.” Mürin Jesus a sopwela le apasa, “Iö a wor selingan epwe rongorong.”
Popun än Jesus afalafal lon pworausen awewe
8.9-10
(Mat 13.10-17; Mark 4.10-12)
9 Iwe, nöün Jesus kewe chon kaiö ra aisini Jesus met wewen ei pworausen awewe.
10 Jesus a pölüeni, “Kot a fen mwüt ngenikemi pwe oupwe silei ewe pworaus usun ekewe monomonen Mwün Kot, nge ren ekewe ekoch aramas a toriir lon pworausen awewe, pun repwe nenengeni, nge resap küna och, repwe pwal rongorong, nge resap wewe ren.
Jesus a awewei ewe pworausen awewe usun eman chon amworafeili pwükil
8.11-15
(Mat 13.18-23; Mark 4.13-20)
11 “Iei wewen ewe pworausen awewe: Ewe pwükil ina ewe kapasen Kot.
12 Ekewe pwükil mi mworotiu lepekin al ra wewe ngeni chokewe mi rong kapasen Kot, nge Satan a feito o angei ewe kapas seni lon leluker, pwe resap lükü o eäni manau.
13 Ekewe pwükil mi mworotiu lon lenien föüföü ra wewe ngeni chokewe mi rongorong kapasen Kot o etiwa fän pwapwa. Nge pokiten ewe kapas esap tongeni warar lor, ra chök lükü lon fansoun mochomoch. Nge lupwen fansoun sosot a toriir, ra müttir kuf.
14 Ekewe pwükil mi mworotiu lein ekewe iräfölüföl ra wewe ngeni chokewe mi rong kapasen Kot, nge öürek me wöün fanüfan, pwal pwapwan ei manau ra tolong lon leluker o amopu ewe kapas, pwe uar esap tongeni mau.
15 Nge ekewe pwükil mi mworotiu lon pwül mi mürina ra wewe ngeni chokewe mi rongorong kapasen Kot o amwöchü lon eu leluk mi mürina o aleasochis, ra likitü tori ra ua.
Eu lamp fän eu sepi
8.16-18
(Mark 4.21-25)
16 “Esap wor eman a keni eu lamp o anomu fän eu sepi are fän eu peet. Nge epwe isetä won lenian, pwe aramas repwe küna ewe saram lupwen repwe tolong leimw.
17 Mettoch meinisin mi opola epwe chök pwäpwäla, nge mettoch meinisin mi pwölüla epwe fatala o tolong lon saram.
18 Iei mine oupwe föröchü usun ämi aüseling. Pun iö a wor an, Kot epwe achomongala, nge iö esap wor an, Kot epwe mwo nge angei seni ewe ekis a ekieki a nom ren.”
Inen Jesus me pwiin kana
8.19-21
(Mat 12.46-50; Mark 3.31-35)
19 Iwe, inen Jesus me pwiin kewe ra feito ren Jesus, nge resap tongeni tolong ren pokiten chomongun ekewe aramas.
20 Eman a üreni Jesus, “Inom me pwiüm kewe ra nom lükün o mochen churuk.”
21 Nge Jesus a üreniir, “Inei me pwii ir chokewe mi rongorong kapasen Kot o aleasochis ngeni.”
Jesus a aükätiu eu mölümöl
8.22-25
(Mat 8.23-27; Mark 4.35-41)
22 Lon eu rän Jesus me nöün kewe chon kaiö ra tötä won efoch wa. Iwe, a üreniir, “Ousipwe saila epek ewe noom.” Iei mine ra sai.
23 Lupwen ra seres lon ewe noom, Jesus a möürüla. Eu asepwäl mi pöchökül a müttir eniti lon ewe noom o ekewe no ra nulong leföön ewe wa pwe a arapakan ngeni an epwe kokola.
24 Iwe, ra feila ren Jesus, ra föngünätä o üreni, “Sounemenem, sounemenem, arapakan chök sipwele mäla.” Iwe, Jesus a pwätä o a allük ngeni asepwäl me no, iwe, ewe asepwäl a sötiu, a pwal lüala won matau.
25 Mürin Jesus a üreni ekewe chon kaiö, “Ifan ämi lükülük?” Iwe, ra niuokus o weitifengeniir o kapasfengen lefiler, “Iö chök ätei? A chök allük ngeni ewe asepwäl me ekewe no, iwe, ra aleasochisi.”
Jesus a angasa eman mwän mi wor anün rochopwak won
8.26-39
(Mat 8.28-34; Mark 5.1-20)
26 Iwe, Jesus me nöün kewe chon kaiö ra seresila tori ewe fanü Kerasa mi nom epek ewe nomun Kalilea.
27 Lupwen Jesus a tiwelong wilifanü, eman mwän seni ewe telinimw mi wor anün rochopwak won a churi. Fansoun langatam ei mwän esap üföüf och, esap pwal nonom lon imw, nge a chök nonom lein ekewe peias.
28 Iwe, lupwen a küna Jesus, a puchörütä, a aturala le pwül arun pechen Jesus o a leüömong le apasa, “Jesus Nöün Kot, ewe mi Unusen Tekia, met ka mochen föri ngeniei? Üa tüngor ngonuk, pwe kosap ariaföüüei.”
29 A nöünöü ei ititin fos, pun Jesus a fen allük ngeni ewe anün rochopwak, pwe epwe towu seni. Fan chomong ewe anün rochopwak a tötä won. Inamwo ika ra kalapusei o föti pöün me pechen ngeni selimächä, nge a chök mwütifeseni ewe selimächä. Iwe, ewe anün rochopwak a cheela lon ewe fanüapö.
30 Jesus a aisini, “Ifa itom?” Ewe mwän a pölüeni, “Itei mwichemong,” pun chomong anün rochopwak ra nom won.
31 Iwe, ekewe anün rochopwak ra tüngor ngeni Jesus, pwe esap asürela lon ewe leni mi fokun alolol.
32 Iwe, a wor epwi pwiin pik ra mongöfeil won ekewe chukutekison mi arap ngeni ewe leni. Iei mine ekewe anün rochopwak ra tüngor ngeni Jesus pwe epwe mwüt ngeniir pwe repwe tolong lon ekewe pik. Iwe, Jesus a mwüt ngeniir.
33 Mürin ekewe anün rochopwak ra towu seni ewe mwän o tolong lon ekewe pik. Iwe, ekewe pwiin pik ra sätiu lepokun ewe achau o turulong lon ewe noom, pwe ra mop meinisin.
34 Iwe, lupwen ekewe chon foleni ekewe pik ra küna met a fis, ra säfeil o apworausa ewe pworaus lon ekewe telinimw me ekewe sopw.
35 Mürin ekewe aramas ra feila, pwe repwe küna mine a fis. Nge lupwen ar feito ren Jesus, ra küna ewe mwän ekewe anün rochopwak ra towu seni, a mot arun pechen Jesus, a üföüf o miritila. Iwe, ir meinisin ra niuokus.
36 Iwe, chokewe mi küna ei manaman ra apworausa ngeni ekewe aramas usun än Jesus angasa ewe mwän.
37 Mürin aramasen ewe fanü meinisin ra tüngor ngeni Jesus pwe epwe feila seniir, pun ra fokun niuokus. Iei mine Jesus a tötä won ewe wa o feila.
38 Iwe, ewe mwän ekewe anün rochopwak ra towu seni a tüngor ngeni Jesus, “Kose mochen üpwe etuk.” Nge Jesus a tinala o üreni,
39 “Kopwe liwinla lon imwom o apworausa met Kot a föri ngonuk.” Iwe, ewe mwän a feila lon ewe telinimw o apworausa met Jesus a föri ngeni.
Jesus a apöchöküla eman fefin o amanauasefäli eman nengin
8.40-56
(Mat 9.18-26; Mark 5.21-43)
40 Iwe, lupwen Jesus a liwinsefäliti epek ewe noom, ekewe aramas ra etiwa i, pun ra fen witiwiti an epwe feito.
41 Mürin eman mwän itan Jairus a feito, ätei i eman nöüwis lon imwen felikis lon ewe leni. A chapetiu arun pechen Jesus o tüngormau ngeni an epwe eti le feila lon imwan,
42 pun nöün we eman chök nengin engol me ruu ierin a arap ngeni mäla.
Lupwen Jesus a etala Jairus, chomong aramas ra chök etiepach ngeni.
43 Iwe, a wor eman fefin a nom leir, a fokun riaföü ren an samaun fefin lon ükükün engol me ruu ier. Neminei a fangala meinisin mine a wor ren ngeni ekewe sousafei, nge esap wor eman a tongeni apöchöküla.
44 Ei fefin a tap mürin Jesus lein ewe mwichen aramas, a atapa lepwülün üfan, iwe, an we samau a müttir köüla.
45 Jesus a ais, “Iö a atapaei?” Ir meinisin ra apasa pwe sap ir. Iwe, Petrus a üra, “Sounemenem, ekewe aramas meinisin ra nom ünükum o etiepach ngonuk.”
46 Nge Jesus a üra, “Eman a atapaei, pun üa mefi pwe och manaman a towu seniei.”
47 Iwe, lupwen ewe fefin a mefi pwe esap tongeni opola, a feito fän chechech o chapetiu arun pechen Jesus. Lon ewe leni me mwen ekewe aramas meinisin neminei a apworausa ngeni Jesus pwota a atapa i, pwal usun an pöchökületä lon ewe chök otun.
48 Iwe, Jesus a üreni neminei, “Nei, om lükülük a apöchökülokotä. Kopwe feila fan kinamwe.”
49 Lupwen Jesus a chüen kakapas, eman chon künö a feito seni imwen Jairus o üreni Jairus, “Noumw nengin a fen mäla. Kosap chüen aweiresi ewe sense.”
50 Nge lupwen Jesus a rong ekei kapas, a üreni Jairus, “Kosap niuokus. Kopwe chök lükülük, noumw we nengin epwe manau.”
51 Lupwen Jesus a tori ewe imw, esap mwüt ngeni eman epwe eti le tolong, pwe Petrus chök me Johannes me James, pwal semen me inen ewe nengin.
52 Aramas meinisin mi nom lon ewe imw ra kechü o ngüngüres won ewe nengin, nge Jesus a üra, “Ousap kechü. Ewe nengin esap mäla, pwe a chök möür.”
53 Iwe, ir meinisin ra takiri, pun ra silei pwe ewe nengin a mäla.
54 Nge Jesus a amwöchü pöün ewe nengin o apasa fan leüömong, “Nengin, kopwe pwätä!”
55 Iwe, a manauatä o pwätä lon ewe chök otun, nge Jesus a üreniir pwe repwe amongöni ewe nengin.
56 Iwe, semen me inen ewe nengin ra mairü, nge Jesus a allük ngeniir, pwe resap üreni eman mine a fis.