21
Ekewe souasor ra pin
21.1-24
1 Iwe, ewe Samol mi Lapalap a kapas ngeni Moses, “Kopwe üreni ekewe souasor nöün Aaron kewe mwän, pwe esap wor eman me leir epwe püsin alimengaua ren somän märärin,
2 chilon chök ren somän fitukan: inan, saman, nöün mwän, nöün fefin, pwin
3 ika ren fefinan esamwo wor pwülüan mi nom lon imwan.
4 Esap fokun püsin alimengaua ren somän aramasen pwülüan, pwe esap apiningaua wisan.
5 Iwe, ekewe souasor resap tongeni reipöpöla ulungen mökürer ika amwocha alüser, resap pwal tongeni nekelekei inisir, lupwen ra letipeta.
6 Iwe, repwe pin fän itei, nge resap aitengaua itei. Pun ir ra eäni ewe asoren mongö ngeniei ngang ewe Samol mi Lapalap. Iei mine ekewe souasor repwe pin.
7 Resap pwüpwülü ngeni fin lisowu ika fefin ra piin tori mwän, resap pwal pwüpwülü ngeni fefin mi mwü seni pwülüer. Pun ekewe souasor ra pin fän itei.
8 Iei mine ekewe aramas repwe föri met ewe souasor epwe pin me rer, pun a eäni ewe asoren mongö ngeniei. Ngang ewe Samol mi Lapalap üa pin, üa pwal apinikemi.
9 Iwe, are eman fefin nöün eman souasor a püsin alimengaua ren an amömö inisin fän iten lisowu, a aitengaua saman. Iwe, neminewe epwe kek.
10 Iwe, ewe souasor mi lap me lein pwin kana, a kepit möküran ren lö o apinipin pwe epwe üföüf ekewe üf mi pin, esap atorongaua möküran ika kamwei üfan, lupwen a letipeta.
11 Ewe souasor mi lap esap fokun kaneto ren eman somä, sap mwo nge ren somän saman ika inan, pwe esap limengau ren.
12 Esap fokun towu seni ewe imw mi pin, esap pwal apiningaua imwei mi pin, pun a apinipin ren ai we löön epit: Ngang ewe Samol mi Lapalap.
13 Iwe, epwe chök pwüpwülü ngeni eman fefin esamwo tori mwän.
14 Esap pwüpwülü ngeni eman fefin mi mä pwülüan ika eman mi mwü seni pwülüan, esap pwal pwüpwülü ngeni eman fefin a piin tori mwän ika eman fefin mi amömö inisin fän iten lisowu. Nge epwe chök angei eman pwülüan, eman fefin esap mwo tori mwän seni me lein aramasan,
15 pwe esap atolonga nöün kewe lon tettelin chon limengau me lein aramasan. Pun ngang ewe Samol mi Lapalap üa apini pwe epwe souasor mi lap.”
16 Iwe, ewe Samol mi Lapalap a pwal kapas ngeni Moses,
17 “Kopwe üreni Aaron: Esap wor eman me lein mwirimwirum kana mi wor terin epwe kaneto pwe epwe eäni asoren mongö ngeniei. Ei epwe fis seni eu täppin aramas tori eu täppin.
18 Pun esap wor eman mi mesechun ika mwen, are eman a ter won mesan ika a timwo, epwe föri ewe angangen asor,
19 sap pwal eman a ter efoch pechen ika efoch pöün,
20 are a chuk sökürün ika ningenge, are a ülen ik lon mesan ika kilingau mi pwerik ika fas, are fokun.
21 Esap fokun wor eman mwirimwirin ewe souasor Aaron epwe eäni ekewe asor ngeniei, are a wor terin. Pokiten a wor terin, esap tongeni eäni asoren mongö ngeniei.
22 A tongeni mongö seni ewe asoren mongö aramas ra uwato fän itei, ewe asoren mongö mi unusen pin pwal ewe mi pin.
23 Nge esap tongeni kan ngeni ewe chechen lefil ika ewe rongen asor, pokiten a wor terin, pwe esap apiningaua imwei mi pin. Pun ngang ewe Samol mi Lapalap üa apini ekewe mettoch.”
24 Mürin, Moses a asile ngeni Aaron me nöün kewe mwän pwal ngeni aramasen Israel meinisin ekei kapas meinisin.