10
Jesus a afalafal usun mwüfesenin pwüpwülü
10.1-12
(Mat 19.1-12; Luk 16.18)
1 Mürin Jesus a feila seni ewe leni o a feila lon ewe fanü Jutea me pekilan ewe chanpupu Jortan. Iwe, chomong aramas ra mwicheto ren, nge i a afalafaleer usun a piin föri.
2 Iwe, ekoch Farisi ra feito ren pwe ra mochen särei. Ra aisini, “Ifa usun, a pwüng me lon allükün ach lamalam pwe eman epwe tongeni mwü seni pwülüan?”
3 Jesus a pölüeniir, “Met sokun allük Moses a ngenikemi?”
4 Nge ir ra pölüeni, “Moses a mwüt ngeni eman mwän pwe epwe makkei echö toropwen mwüfesen, mürin epwe tinala pwülüan.”
5 Nge Jesus a üreniir, “Moses a makkei ei allük pokiten ämi tipeförea.
6 Nge seni lepoputän, lupwen Kot a föri fanüfan, a föri mwän me fefin.
7 Iei mine eman aramas epwe likitala saman me inan o pache ngeni pwülüan.
8 Iwe, ekewe ruoman repwe wiliti eu chök inis. Iei mine resap chüen ruoman, pwe eman chök.
9 Iwe, mine Kot a rifengeni, esap wor eman aramas epwe mwütifeseni.”
10 Lupwen ra tosefälilong lon ewe imw, ekewe chon kaiö ra aisini Jesus usun ekei kapas.
11 Iwe, a üreniir, “Eman mwän mi tinala pwülüan, nge a pwülüeni pwal eman fefin, ätewe a tipisin lisowu ngeni pwülüan we.
12 Nge are eman fefin a tinala pwülüan o a pwülüeni pwal eman mwän, neminewe a tipisin lisowu.”
Jesus a afeiöchü kükün semirit
10.13-16
(Mat 19.13-15; Luk 18.15-17)
13 Iwe, ekoch aramas ra uwato nöür semirit ren Jesus, pwe epwe iseis pöün wor, nge ekewe chon kaiö ra apwüngüür.
14 Nge lupwen Jesus a küna mine ra föri, a letipechou o a üreni nöün kewe chon kaiö, “Oupwe mwüt ngeni ekewe semirit pwe repwe feito rei, nge ousap epetiir, pun iö a wewe ngeni ekei semirit epwe mwüni mwün Kot.
15 Enlet, üpwe ürenikemi, ‘Are eman esap etiwa Mwün Kot usun eman semirit, esap tongeni tolong lon.’ ”
16 Mürin Jesus a romi ekewe semirit, a iseis pöün won eman me eman leir o a afeiöchüür.
Ewe mwän mi pisekisek
10.17-31
(Mat 19.16-30; Luk 18.18-30)
17 Iwe, lupwen a popuetasefäli an sai, eman mwän a säto ren, a fotopwäsuk mwan o tüngor ngeni, “Sense mi mürina, met ngang üpwe föri pwe üpwe manaueni manau esemüch?”
18 Jesus a üreni, “Pwota ka aita ngeniei mürina? Esap wor eman a mürina pwe Kot echök.
19 Ka silei ekewe allük: ‘Kosap niela aramas, kosap lisowu, kosap solä, kosap eäni kapas chofona usun eman, kosap eäni föförün atuputup, kopwe asamolu semom me inom.’ ”
20 Iwe, ewe mwän a üreni Jesus, “Sense, ekei allük meinisin üa apwönüretä seni lealüali.”
21 Iwe, Jesus a newenewen ngeni pokiten an tongei o a üreni, “Eu chök ka mang ngeni. Kopwe feila o amömöla meinisin mine ka eäni. Nge ewe moni kopwe fang ngeni chon wöüngau, pwe epwe wor woumw lon läng. Mürin kopwe feito o tapweto müri.”
22 Lupwen ewe mwän a rongorong ekei kapas, a wowongau, iwe, a feila fän letipeta, pun wöün a fokun chomong.
23 Iwe, Jesus a kulu ngeni nöün kewe chon kaiö o a üreniir, “A men fokun weires ngeni ekewe aramas mi pisekisek ar repwe tolong lon Mwün Kot.”
24 Iwe, ekewe chon kaiö ra mairü ren ekei kapas. Nge Jesus a kapassefäl ngeniir, “Ämi nei kana, a men fokun weires an eman epwe tolong lon Mwün Kot.
25 A men fokun weires ngeni eman aramas mi pisekisek an epwe tolong lon Mwün Kot, lap seni än eman kamel epwe tolong lon pwangen efoch tikek.”
26 Iwe, ekewe chon kaiö ra fokun mairü ren ekei kapas o ra aisfengen lefiler, “Iö chök a tongeni küna manau?”
27 Nge Jesus a newenewen ngeniir o a üreniir, “Ei sokun esap tufich ngeni aramas, nge sap ina usun me ren Kot. Pun mettoch meinisin ra tufich ngeni Kot.”
28 Mürin Petrus a üreni Jesus, “Nengeni, äm aia likitala meinisin o tapwela mürum.”
29 Nge Jesus a üreniir, “Enlet, üpwe ürenikemi, pwe iö a likitala imwan, ika pwiin, ika fefinan, ika inan, ika saman, ika nöün kana, ika fanüan fän itei pwal fän iten ewe Pworausen Manau,
30 ewe aramas epwe angei liwinin mi fokun watte lon ei fansoun. Epwe angei fan ipükü imwan, pwiin, fefinan, inan, nöün me fanüan, pwal riaföü pokiten ewe kapasen Kot. Iwe, lon ewe fansoun epwe feito epwe pwal angei ewe manau esemüch.
31 Iwe, chomong mi akom repwe kükümwir, nge chomong mi kükümwir repwe akom.”
Aülüngatin än Jesus kapas usun an mäla
10.32-34
(Mat 20.17-19; Luk 18.31-34)
32 Lon ei fansoun Jesus me nöün kewe chon kaiö ra fetal won ewe al ngeni Jerusalem. Iwe, Jesus a akomwola mwen ekewe chon kaiö, nge ir ra fokun rükö, nge ekewe aramas mi tapwela mürin ra niuokus. Mürin Jesus a aimwüela nöün kewe chon kaiö o a kapassefäl ngeniir usun mine epwe fis ngeni.
33 Iwe, a üreniir, “Oupwe rongorong. Sipwele feita Jerusalem. Ikenan Nöün Aramas epwe tolong le pöün ekewe souasor mi lap me ekewe Sensen Allük. Repwe atipisi pwe epwe mäla, nge repwe atolonga lepöün ekewe chon lükün Israel.
34 Ir repwe urumwotei o atufa, repwe wichi o niela. Nge mürin ülüngat rän epwe manausefälitä.”
Än James me Johannes tüngor
10.35-45
(Mat 20.20-28)
35 Mürin nöün Sepeti kewe James me Johannes ra feito ren Jesus o ra üreni, “Sense, mi wor och aia mochen kopwe föri fän item.”
36 Jesus a aisiniir, “Met oua mochen ai üpwe föri fän itemi?”
37 Iwe, ra pölüeni, “Lupwen kopwe mot lon om lenien motun king lon mwum mi ling, kopwe mwüt ngenikem pwe aipwe mot ünükum, eman lepelifichum, nge eman lepelimöngum.”
38 Nge Jesus a üreniir, “Ämi ousap silei mine oua tüngor. Ifa usun, oua tongeni ün seni ewe kapen riaföü ngang üpwe ünümi? Ifa usun, oua tongeni papatais ngeni ewe papatais ngang üpwe papatais ngeni?”
39 Iwe, ra pölüeni, “Ewer, aia tongeni.” Nge Jesus a üreniir, “Mi pwüng, oupwe fokun ünümi seni ewe kap ngang üpwe ünümi, oupwe pwal fokun papatais ngeni ewe papatais ngang üpwe papatais ngeni.
40 Nge esap wor ai pwüüng ai üpwe filätä iö epwe mot pelifichi ika pelimöngi. Nge Kot epwe ngeni chokewe a filiiretä, pwe repwe mot lon ekei leni.”
41 Iwe, lupwen ekewe engol chon kaiö ra rong usun ei kapas, ra song ngeni James me Johannes.
42 Iei mine Jesus a körifengeniir o üreniir, “Oua silei, pwe ätekewe ra nemeni chon lükün Israel ra nemeniir fän pwora, nge ekewe mi lap ra nemeniir fän pöchökül.
43 Nge esap iei usun lefilemi. Pun iö a mochen lap leimi, epwe chon angang ngenikemi,
44 nge iö a mochen pwe epwe chon akom leimi, epwe nöümi amanau fän itemi meinisin.
45 Pun ewe mwo nge Nöün Aramas esap feito pwe aramas repwe angang ngeni, nge a feito pwe epwe angang ngeniir o fangala manauan fänäsengesiir pwe möön manauer.”
Jesus a aneloi mesen Partimeus
10.46-52
(Mat 20.29-34; Luk 18.35-43)
46 Mürin Jesus me nöün kewe chon kaiö ra tori Jeriko. Nge lupwen ar towu seni fiti eu mwichen aramas mi chomong, Partimeus nöün Timäus, eman chon chun mi tütüngor lifangan, a momot lepekin al.
47 Iwe, lupwen a rongorong pwe Jesus ewe re Nasaret a feito, a popuetä le kökkö, “Jesus, Nöün Tafit, kopwe tongeei!”
48 Iwe, chomong aramas ra song ngeni o üreni pwe epwe fanafanala. Nge i a chök alapala an kökkö, “Nöün Tafit, kopwe tongeei!”
49 Nge Jesus a üla o apasa, “Oupwe körato.” Iwe, ra köri ewe mwän mi chun o üreni, “Kopwe chipila, kopwe ütä, Jesus a köruk.”
50 Iwe, Partimeus a pwilitatiu üfan sekit, a mwetetä o feila ren Jesus.
51 Iwe, Jesus a üreni, “Met ka mochen üpwe föri ngonuk?” Ewe mwän mi chun a pölüeni, “Sense, ngang üa mochen pwe üpwe küna mwei.”
52 Jesus a üreni, “Kopwe feila, om lükülük a alisuk.” Lon ewe chök otun ewe mwän a küna mwan o tapwela mürin Jesus won ewe al.