19
Än Kot föför me an kewe allük
19.1-14
Ngeni ewe mi emweni chon köl: Echö än Tafit köl.
1 Ekewe läng ra pwärätä lingen Kot,
nge fän läng a arongafeili usun angangen pöün.
2 Rän a kapas ngeni pwal eu rän usun,
nge pwin a asile ngeni pwal eu pwin usun.
3 Esap wor ar fos, esap pwal wor ar kapas,
esap wor eman a tongeni rong mwelier.
4 Nge mwelier a chöfetal lemenen unusen fanüfan,
ar kapas a tori lesopun fanüfan.
Kot a föri eu imw fän läng fän iten akkar.
5 Akkar a tötä usun eman mwän apwüpwülü söfö a towu seni lon rumwan,
a pwal sä won alan usun eman mwän mi pöchökül
a pwapwa lon an kitir.
6 Akkar a tötä seni epek läng
o fetal ngeni ewe epek,
nge esap wor och mettoch a tongeni op seni pwichikaran.
7 Än ewe Samol mi Lapalap allük a fokun mürina, a apöchökülasefäli letipach.
Än ewe Samol mi Lapalap kait a let,
a atipachema ir mi wewemang.
8 Än ewe Samol mi Lapalap öüröür ra pwüng,
ra apwapwai lelukach.
Än ewe Samol mi Lapalap kewe allük ra fat,
ra awora mirit.
9 Ach niuokusiti ewe Samol mi Lapalap a mürina,
epwe nonom tori feilfeilachök.
Än ewe Samol mi Lapalap pwüüng ra let,
ir meinisin ra pwüng.
10 Ra aüchea lap seni kolt, ewer, lap seni chomong kolt mi mürina.
Ra pwal arar seni chönün chunen, pwal seni sürün ewe fasen chunen.
11 Ren ekei allük ngang noum chon angang üa angei ai fön seniir.
Eman mi apwönüetä epwe angei liwinin mi lapalap.
12 Nge iö a tongeni mefi iteiten an föför mi mwäl?
Kopwe amusa seniei ekewe tipis mi monomon.
13 Kopwe pwal tümwünüei pwe ngang noum chon angang üsap föri tipis ren mochenin letipei.
Kosap mwüt ngeniir pwe repwe nemeniei.
Mürin üpwe unusöch lon manauei o ngas seni pupungau mi watte.
14 Amwo kapasen awei me ekiekin lelukei epwe mürina me fän mesom,
ai Samol mi Lapalap, ai achau me ai chon amanau.