3
Iotekin lesosor pwe Kot epwe alilis
3.1-8
Echö än Tafit köl lupwen an sü seni Apsalom nöün we.
1 Ai Samol mi Lapalap, ekewe mi oputaei ra kon chomong!
Chomong ra ü ngeniei.
2 Chomong ra kapas usi,
“Esap wor an alilis me ren Kot.”
3 Nge en, ai Samol mi Lapalap, ka epeti seniei feiengau,
en ai ling,
ka achimwäeitä.
4 Üa leüömong le siö ngeni ewe Samol mi Lapalap,
nge i a pälüeniei seni chukun mi pin.
5 Üa konola o möür. Üa pwal nenela,
pun ewe Samol mi Lapalap a tümwünüei.
6 Üsap niuokusiti engol ngeröün aramas
mi pwelifeiliei o ü ngeniei.
7 Kopwe feito, ai Samol mi Lapalap. Kopwe angasaei, ai Kot.
Pun ka apwüngü ekewe chon oputaei meinisin,
ka angei seniir ar pöchökül pwe resap tongeni afeiengauaei.
8 Ewe Samol mi Lapalap a angasala aramas mi nom lon weires.
Om feiöch epwe nom won noum aramas.