8
Manau ren ewe Ngünün Kot
8.1-17
1 Iwe, iei esap wor liwinin tipisin chokewe mi nonom lon Kraist Jesus.
2 Pun ewe allükün Ngün mi ngenikich manau lon Kraist Jesus a angasaei seni ewe allük mi afisätä tipis me mäla.
3 Iwe, mine ewe Allük esap tongeni föri pokiten fitukach a apwangapwang, Kot a föri: A ngeni tipis liwinin lon fituken Nöün we, ren an tinato püsin Nöün lon lapalapen aramas usun eman aramas tipis, pwe epwe eu asoren tipis.
4 Kot a föri ei, pwe pwüngün ewe allük epwe pwönüetä rech, kich mi manau fän nemenien Ngünmifel, nge sap fän nemenien fituk.
5 Chokewe mi manau lon pekin fituk ra nonom fän nemenien fituk. Nge chokewe mi manau lon pekin Ngün ra nonom fän nemenien Ngünmifel.
6 Are sia nonom fän nemenien fituk, sopolan mäla, nge are sia nonom fän nemenien Ngünmifel, sopolan manau me kinamwe.
7 Iei mine eman aramas a ü ngeni Kot lupwen a nonom fän nemenien tipis, pun esap aleasochisi än Kot allük, pwüngün esap tongeni aleasochis ngeni.
8 Chokewe mi aleasochis ngeni mochenin fituker resap tongeni apwapwai Kot.
9 Nge ämi ousap nonom fän nemenien fituk, pwe oua nonom fän nemenien Ngünmifel are Ngünün Kot a nom lomi. Nge iö esap eäni Ngünün Kraist, esap i nöün Kraist.
10 Nge are Kraist a nonom lomi, ewe Ngünmifel a ngenikemi manau pokiten oua pwüng me ren Kot, inamwo ika inisimi repwe mäla pokiten tipis.
11 Are ewe Ngünün Kot mi amanauasefäli Jesus seni mäla a nom lomi, mürin ewe mi amanauasefäli Kraist seni mäla, epwe uwalong manau lon inisimi inisin mäla ren Ngünün we mi nom lomi.
12 Iwe, ämi pwii kana a wor wisach, nge esap lon ach sipwe nonom fän nemenien fituk.
13 Pun are oua nonom fän nemenien fituk, oupwe mäla. Nge are oupwe amäloi ekewe föförün tipis ren Ngünmifel, iwe, oupwe manau.
14 Iwe, chokewe mi nonom fän emwenien ewe Ngünün Kot, ir nöün Kot.
15 Pun ewe Ngün Kot a ngenikemi esap nöünikemi chon angang pwe oupwe niuokus, nge ewe Ngün a atolongakemi lon tettelin nöün Kot. Iwe, ren atufichien ewe Ngün sia kökkö ngeni Kot, “Sam! Semei!”
16 Iwe, ewe Ngünün Kot a pwäri ngeni ngünüch pwe kich sia nöün Kot kana.
17 Nge pokiten sia nöün Kot, sipwe feiöchüni ekewe feiöch i a amolätä fän iten nöün kana, sipwe pwal eti Kraist le wöüni ekewe wöün Kot a amolätä fän itan. Pun are sia eti Kraist lon an riaföü, sipwe pwal eti i lon an ling.
Ewe ling epwe torikich me mürin
8.18-30
18 Ngang üa lükü, pwe ekewe riaföü mi torikich lon fansoun ikenai resap löllö ngeni ewe ling epwe pwä ngenikich.
19 Förien Kot kewe meinisin ra fokun ösüküsükü pwe Kot epwe pwärala nöün kana.
20 Pun Kot a föri pwe förian kana repwe lomotongauala, sap ren püsin letiper, nge pokiten letipen Kot pwe epwe iei usun. Nge mi wor ei apilükülüköch,
21 pwe lon eu rän förien Kot kana repwe ngasala seni ar ngauala me tala o eti nöün Kot kewe lon ar ngasala me ling.
22 Pun sia silei pwe tori ikenai förien Kot kewe meinisin ra ngüngü fän cheuch usun cheuchen fam.
23 Nge sap chök förien Kot kana ra ngüngü, pwe pwal kich mi eäni Ngünmifel, iei aeuin än Kot lifang, sia pwal ngüngü loch lupwen sia witiwiti pwe Kot epwe angeekich pwe sipwe nöün o epwe angasala unusen inisich.
24 Pun ren ei apilükülük sia küna manau. Nge are sia küna mine sia eäni apilükülük, ei esap wesewesen apilükülüköch. Pun iö epwe apilükülükü mine a fen küna?
25 Nge are sia apilükülükü mine sisap küna mwo, sia witiwit ngeni fän likitü.
26 Ina chök usun ewe Ngünmifel epwe alisikich lon ach apwangapwang. Pun sisap silei mine sipwe eäni iotek, nge püsin Ngünmifel a tüngor ngeni Kot fän itach ren sokun ngüngü esap wor eman a tongeni apasatä lon kapas.
27 Nge Kot, ewe mi küna lon letipach, a silei ekiekin ewe Ngünmifel. Pun ewe Ngünmifel a tüngor ngeni Kot fän iten ekewe chon pin lon met mi fich ngeni letipan.
28 Sia silei pwe lon mettoch meinisin Kot a afisätä feiöchün chokewe mi echeni i, chokewe i a köriir pwe repwe föri letipan.
29 Iwe, chokewe Kot a fen filiiretä me lom a pwal aimwürela pwe repwe wewe ngeni Nöün we lon lapalapan, pwe i ewe epwe mwänichi lein pwiin kewe mi chomong.
30 Iwe, chokewe Kot a aimwürela a pwal köriir, nge chokewe a köriir a föri pwe repwe küna pwüng me ren, nge chokewe mi küna pwüng me ren a pwal ngeniir lingan.
Än Kot chen lon Kraist Jesus
8.31-39
31 Iwe, met sipwe tongeni apasa ren ekei mettoch? Are Kot a penikich, iö epwe tongeni pölüenikich?
32 Ewer, esap Kot, pun i esap mwo nge amwöchü püsin Nöün, pwe a fangala fänäsengesich meinisin. Ifa usun, esap pwal fang ngenikich mettoch meinisin me Nöün we?
33 Iö epwe atipisi afilien Kot kewe? Püsin Kot a pwärätä pwe resap tipis!
34 Iö epwe ngeniir liwinin ar tipis? Kraist Jesus ewe mi mäla, nge a pwal fokun manausefälitä, i a nonom lepelifichin Kot, a iotek fänäsengesich o penikich.
35 Meta epwe tongeni aimwükich seni än Kraist we chen? Ifa usun osukosuk, are weires, are riaföü, are echik, are mwelele, are feiengau, are mäla ra tongeni aimwükich?
36 Pun iei usun a mak lon ewe Toropwe mi Pin,
“Fansoun meinisin aia nonom
lon feiengauen mäla fänäsengesum.
Ra ekieki pwe äm aia wewe ngeni sip
mi amol ngeni ar repwe ninnila.”
37 Apwi, nge lon ekei mettoch meinisin sia fokun pwora ren ewe mi echenikich!
38 Pun üa fokun lükü pwe esap fokun wor och mi tongeni aimwükich seni an we chen: sap mäla are manau, sap chon läng are ekewe anün rochopwak, sap mettochun ikenai are mettochun mürin are och manaman,
39 esap pwal ekewe mettochun pekitä are ekewe mettochun pekitiu, esap fokun wor och lein förian kewe meinisin epwe tongeni aimwüfesenikich seni än Kot we chen mi torikich lon Kraist Jesus ach Samol.