9
Än Tafit kirikiröch ngeni Mefiposet
9.1-13
1 Iwe, lon eu rän Tafit a ais, “Ifa usun, a wor eman seni än Saul famili mi chüen manau, pwe üpwe kirikiröch ngeni fän iten Jonatan?”
2 Nge a wor eman chon angang seni lon än Saul famili itan Sipa, ra titi pwe epwe feito ren Tafit. Iwe, Tafit a aisini, “En Sipa?” A palüeni, “Ewer, ngang noum chon angang.”
3 Mürin, ewe king a aisini, “Ifa usun, esap wor eman seni än Saul famili mi chüen manau, pwe üpwe eäni kirikiröch ngeni, usun üa fen pwon ngeni Kot.” Sipa a üreni ewe king, “Mi wor eman nöün Jonatan mwän a chüen manau, nge a ter pechen.”
4 Iwe, ewe king a aisini, “Ia a nom ie?” Sipa a üreni, “A nom lon imwen Makir nöün Amiel we mwän lon Lotepar.”
5 Mürin, ewe king Tafit a tinala chon künö pwe repwe emwenato Mefiposet seni lon imwen Makir.
6 Iwe, lupwen Mefiposet nöün Jonatan we mwän, nge Jonatan nöün Saul, a feito ren Tafit, a chapetiu lepwül o asamolu. Tafit a apasa, “Mefiposet.” Nge i a üreni, “Ngang noum chon angang.”
7 Mürin, Tafit a üreni, “Kosap niuokus, pun ngang üpwe kirikiröch ngonuk fän iten Jonatan semom we. Ngang üpwe aliwini ngonuk ekewe fanü meinisin fanüen Saul semelapom we, nge en kopwe mongö seni ai chepel fansoun meinisin.”
8 Iwe, Mefiposet a chapetiusefäl ngeni Tafit o üra, “Met aücheai ngang noum chon angang, pwe kopwe kirikiröch ngeniei, nge ngang üa usun chök eman kolak mi mäla.”
9 Mürin, ewe king a titi Sipa nöün Saul we chon angang o üreni, “Meinisin mine än Saul pwal meinisin mine än chon an famili üa ngeni Mefiposet nöün om we samol.
10 Nge ämi me noum kewe mwän pwal noum kewe chon angang oupwe fotuki ewe fanü fän iten Mefiposet o uwato uan, pwe epwe wor enen än om we samol famili. Nge Mefiposet epwe mongö seni ai chepel fansoun meinisin.” Iwe, a wor engol me limman nöün Sipa mwän, pwal rüe chon angang.
11 Mürin, Sipa a üreni ewe king, “Ngang noum chon angang üpwe föri meinisin mine en ai samol me ai king ka allük ngeniei.” Iei mine Mefiposet a mongö seni än Tafit chepel usun chök eman lein nöün ewe king mwän.
12 A wor eman nöün Mefiposet kükün ät itan Mika. Iwe, chon än Sipa famili meinisin ra wiliti nöün Mefiposet chon angang.
13 Nge Mefiposet mi mä pechen me ruofoch a imweimw lon Jerusalem o mongö seni än ewe king chepel fansoun meinisin.