5
1 Läꜙjë̱ë̱ꜙ jmiˉdsaˉ ka̱a̱hˊ maˊ la̱a̱ˈ dsaˉ jmɨˉgyʉʉꜙ baˊ. Maˊ naˉhña̱a̱yˊ gaꜙka̱yꜗ nëˊ kihˈ dsaꜙ mahꜗ gaꜙjmeeyꜘ taˊheꜗ kihꜗ Dio llaꜚ dsaˉ heꜘ. Hiꜙ maˊ he̱e̱yhˉ läꜙjëꜙ heˉ maˊ kwëëh˜ dsaˉ Dio hiꜙ maˊ jë̱ë̱y˜ jahꜘ nëˊ naˊhyooꜘ kwa̱a̱t˜ kihꜗ dsoˊkyeˉ kihꜗ dsaꜙ.
2 Kyʉʉh˜ bihꜗ jmeeyꜗ jø̱hˉ dsëyꜗ kya̱a̱hˊ hi̱ˉ saꜙ kyʉʉh˜ hiꜙ kya̱a̱hˊ hi̱ˉ gaꜙnääˊ naˉhë̱ë̱ˈ, jëëhꜘ ñeˉ bihꜗ, ja̱ꜙ heˉ ko̱o̱ˉ nëëˈ heˉ jmeeꜙ jwɨɨhˋ kihˈ hñiiyꜘ.
3 Kihꜗ heˉ saꜙ maˊ chaˉ beꜘ kiyhꜗ, maˊ laˈ biiꜗ jë̱ë̱yꜗ jahꜘ kwa̱a̱t˜ kihꜗ dsoˊkyeˉ kiyhꜗ hiꜙ läꜙja̱ˉ kihꜗ dsoˊkyeˉ kihꜗ dsaꜙ.
4 Niꜙ ja̱a̱ˉ saꜙ maˊ leꜘ maˊ hñaaˈ hñiiꜘ kihꜗ taˊ lluˈ ja̱ˉ. Maꜙlaꜙ hi̱ˉ maˊ naˉteehˊ kya̱a̱ˈ Dio baˊ hi̱ˉ maˊ jmeeꜙ taˊ ja̱ˉ, läꜙko̱o̱ˉ maˊ naˉteehˊ Aarón.
5 Läꜙja̱ˉ kaˉlähꜘ Cristo, saꜙ gaꜙhña̱a̱yꜗ hñiiyꜘ jmiˉdsaˉ jø̱ø̱hˈ. Dio baˊ heꜘ hi̱ˉ gaꜙkwëëyhꜗ taˊ lluˈ, läꜙ maˊ gaꜙjäyhꜘ:
Hneˉ la̱a̱hꜗ gyʉ̱ʉ̱ˉ kya̱a̱nꜙ.
Naꜗ maˉla̱a̱nꜗ Tääˋ kya̱a̱hˈ.
6 Läꜙja̱ˉ kaˉlähꜘ naˉsɨɨˉ jeeˊ jyohꜘ:
Hneˉ la̱a̱hꜗ jmiˉdsaˉ gaꜙläꜙjëꜙ johꜘ jmɨɨˊ chaˉ,
läꜙko̱o̱ˉ la̱a̱ꜗ Melquisedec.
7 Läꜙko̱o̱ˉ maˊ gyaˈ Cristo jmɨˉgyʉʉꜙ laˉ, gaꜙngɨɨyꜘ kiyhꜗ kihꜗ Dio kya̱a̱hˊ beꜘ, läꜙji̱i̱hˈ gaꜙtu̱u̱ˉ jmɨɨˉ mɨˈnëyˊ, gaꜙchu̱u̱yꜘ kya̱a̱hˊ hi̱ˉ naˊkë̱hˊ jmɨɨˊ maˊ lä̱ä̱yˈ kihꜗ heˉ maˊ ju̱u̱yꜘ. Hiꜙ gaꜙnuuꜘ baˊ Tääˋ kiyhˈ, jëëhꜘ gaꜙhe̱e̱hˉ bihꜗ leꜘ kiyhꜗ läꜙko̱o̱ˉ hyohˉ dsëꜗ Tääˋ.
8 Maꜙkeꜙ la̱a̱yꜗ Jo̱o̱ꜘ Dio, kya̱a̱hˊ heˉ wɨɨꜘ heˉ gaꜙngëëyꜘ ja̱ˉ, gaꜙläꜙkyʉʉyh˜ heˉ jmeeyꜗ nʉʉyhˊ kihˈ Dio.
9 Heˉ läꜙja̱ˉ, gaꜙla̱a̱yꜗ llu̱u̱ꜗ gaˊ, gaꜙjä̱yꜘ la̱a̱yꜗ jʉʉˊ hi̱ˉ lä̱ä̱˜ goˉteˈ läꜙjë̱ë̱ꜙ dsaˉ hi̱ˉ nʉʉhˊ kiyhˈ.
10 Hiꜙ naˉhña̱a̱yˊ kihˈ Dio heˉ la̱a̱yꜗ jmiˉdsaˉ jø̱ø̱hˈ läꜙko̱o̱ˉ gaꜙla̱a̱ꜗ Melquisedec.
Gooˉ laꜗ kihꜗ hi̱ˉ maˉhe̱e̱hˉ mahꜗ be̱e̱yꜗ Dio
11 Chaˉ chaˉgaˊmiihˉ heˉ hnoonꜗ jwë̱ë̱hnꜚ hnähꜘ kihꜗ juuˈ laˉ, pero jwë̱ë̱hˋ kinꜙ jmeenˋ läꜙngëëhꜘ hnähꜘ, jëëhꜘ taˊ hwaˊ goˉte˜ dsaˉläˉngëëꜘ hnähꜘ.
12 Ngooꜗ gaꜙläꜙhɨɨˋ chaˉmiihˉ jmɨɨˊ heˉ tä̱ä̱hˊ hnähꜘ miˉtë̱ë̱hˈ hnähꜘ. Maˉtëꜘ jeeˊ le̱e̱hꜘ hnähꜘ taˉjwohꜗ. Pero hnøøꜗ gaˊ läꜙtë̱ë̱hˉ hnähꜘ kweeˉ haˉ läꜙ laꜗ juuˈ kihꜗ Dio heˉ gaꜙmiꜙtë̱ë̱ˈ jneˊ toˉnëˊ. Läꜙ maˉla̱a̱hꜗ baˊ hnähꜘ läꜙko̱o̱ˉ ja̱a̱ˉ gyʉ̱ʉ̱ˉ hi̱ˉ hɨ̱h˜ waˊjʉhꜙ, hi̱ˉ saꜙ maˉlihꜙ kuhˉ maꜗ heˉ kuhˉ dsaˉ maˉka̱a̱hˊ.
13 Läꜙjë̱ë̱ꜙ hi̱ˉ saꜙ hii˜ läꜙngëëꜘ, saꜙ liyhꜙ ka̱yꜗ kwa̱a̱t˜ heeˉ ja̱ˉ heˉ lluꜗ, jëëhꜘ la̱a̱yꜗ läꜙko̱o̱ˉ ja̱a̱ˉ gyʉ̱ʉ̱ˉ hi̱ˉ hɨ̱h˜ waˊjʉhꜙ.
14 Pero juuˈ heˉ laꜗ läꜙko̱o̱ˉ maꜗ, laꜗ kihꜗ dsaˉ maˉka̱a̱hˊ baˊ ja̱ˉ. Laꜗ kihꜗ dsaˉ hi̱ˉ maˉkyʉʉh˜ ka̱˜ kwa̱a̱t˜ heeˉ naˉ heˉ lluꜗ hiꜙ heeˉ naˉ heˉ hlɨɨhˈ. Jëëhꜘ, läꜙja̱ˉ maˉläˉtë̱ë̱y˜ jmeeyꜙ.