Chru HEBRƠ 5

1 Biă yơu nư̆n, mơnih gơnuăr prŏng apăn-akŏ pơyă phơ̆n duh-dơlbăt lơi kŭng la mơnih hũ pơlih-rơwah mư̆ng tơkrah jơi anà mơnih, sơ̆ng hũ pồ-jào gơnuăr-bruă tô ala mơta jơi anà mơnih bloh duh bruă Yàng Pô Lơngì, tô pơyă phơ̆n c̆ĕ-pơyơ̆r duh-dơlbăt sơ̆ng phơ̆n sì c̆ĕ-pơyơ̆r duh-dơlbăt kơyoa glài-sơnoh. 2 Kơyoa rùp-phŭn mơnih gơnuăr prŏng apăn-akŏ pơyă phơ̆n duh-dơlbăt nư̆n kŭng kơđòng gơrwàng-c̆ơkhă lăm pơnuaĭ 'buh khăng-pràn, nư̆n hũ rơgơi sơnư̆ng-anĭt tơ du mơnih bơrngư̆l-gơla sŭng asŭ. 3 Kơyoa nư̆n, tŭ ñu pơyă phơ̆n c̆ĕ-pơyơ̆r duh-dơlbăt tơrbuh glài tơ buơl làng hơyơu lơi, nư̆n ñu kŭng păl pơyă phơ̆n c̆ĕ-pơyơ̆r duh-dơlbăt tơrbuh glài tơ rùp-phŭn drơi yơu nư̆n rơi.

4 'Buh aràng sơi rơwah mă tơ drơi gơnuăr-bruă prŏng-màng nư̆n, bloh păl hũ Yàng Pô Lơngì iơu-rơwah, mơhiơ̆ yơu Arôn mư̆ng yau rơi. 5 Kŭng yơu nư̆n rơi, Pô Krist 'buh mư̆ng rùp-phŭn drơi rơwah-pồ rùp-phŭn drơi ngă mơnih gơnuăr prŏng apăn-akŏ pơyă phơ̆n duh-dơlbăt, bloh la kơyoa Pơtau hũ đờm sơ̆ng Pô lài:

“Anà la Anà Kơu,

Hơrơi ni Kơu hũ pơjiơ̆ng tơbiă Anà.” *

6 Lăm sa anih pơkơ̆n, Pô kŭng đờm:

“Anà la mơnih gơnuăr apăn-akŏ pơyă phơ̆n duh-dơlbăt rài pơdò rài,

Mơhiơ̆ yơu Melc̆isedek.” †

7 Tŭ Pô Krist dò lăm rùp-phàp drah-rơlo, Pô Krist hũ prŏng săp hia-c̆ŏ bloh pơyă du pơnuaĭ iơu-lài sơ̆ng pơnuaĭ iơu-lơkơu đì tơ Pô hũ gơnuăr dŏng drơi klàh mơtai, sơ̆ng kơyoa abih hơtai-hơtiàn păng-duh, nư̆n pơnuaĭ Pô iơu-lơkơu hũ Yàng Pô Lơngì păng. 8 Yah Pô la Anà Yàng Pô Lơngì, Pô kŭng hũ kŏng pơnuaĭ pơđì-pơđoa gleh-glăr tô mơgru-thơu păng-bơbah ngă tui; 9 sơ̆ng hơdơi tŭ hũ wĭl-tơ̆l bơjơ, Pô tơbiă jiơ̆ng phŭn-ơkha pơnuaĭ anĭt dŏng-pơklàh rài pơdò rài tơ abih tơgrơ̆ mơnih lơi păng-bơbah Pô. 10 Pô hũ Yàng Pô Lơngì ngă-nìn rơwah-pồ ngă mơnih gơnuăr prŏng apăn-akŏ pơyă phơ̆n duh-dơlbăt, mơhiơ̆ yơu Melc̆isedek.

Pơto-Pơhuơĭ Du Mơnih 'Buh Prŏng Lăm Yàng

11 Buơl dơlhă hũ lô pơnuaĭ păl đờm mư̆ng pơnuaĭ ni, bloh kăn-dơmăn mơblàng-tơbiă biă, kơyoa buơl adơi-ai hũ tơbiă jiơ̆ng suơi wờng. 12 Kơyoa iơŭ biă, yah tui tŭ-hơrơi, buơl adơi-ai păl la du mơnih pôgru bơjơ, nư̆n bloh buơl adơi-ai sơđaŭ c̆àng mơnih pơkơ̆n pơto tơ buơl adơi-ai du pơnuaĭ pơrpa c̆ơmrừp mơgru thơu mư̆ng pơnuaĭ Yàng Pô Lơngì. Buơl adơi-ai sơđaŭ dò păl mơñŭm ia tơsơu ala phơ̆n 'bơ̆ng khăng pioh tơ mơnih prŏng. 13 Aràng sơi mĭn mơñŭm ia tơsơu soh, nư̆n ka wờng hơgĕ mư̆ng jơlàn pơnuaĭ rĭng-tơpă. Kơyoa mơnih nư̆n sơđaŭ dò la lơ-ơneh tìt. 14 Bloh phơ̆n 'bơ̆ng khăng la pioh tơ du mơnih prŏng, du mơnih gơnừm tơ bruă pơsrăm-mơgru mĭt bloh hũ pơnuaĭ khờh-rơgơi thơu kơnăl pơklah krơi pơnuaĭ siàm sơ̆ng pơnuaĭ mơsak-jơhà.

* 5:5 5:5 Pơđik Adoh Mơyòm 2:7. † 5:6 5:6 Pơđik Adoh Mơyòm 110:4.