Chru MATHIƠ 19

GƠNUĂR-BRUĂ YÀNG JÊSU TƠ JUĐE SƠ̆NG JERUSALEM

(Mư̆ng tăl 19:1 truh tăl 25:46)

Bruă Pơkloh Gơŭ

(Mak 10:1-12)

1 Hơdơi tŭ đờm pơto du pơnuaĭ nư̆n, Yàng Jêsu tơbiă mư̆ng c̆àr Galile nau truh tơ c̆àr Juđe, gah dih ia sơdờng Jôđăn. 2 Tơrpuơl buơl làng lô biă nau tui Pô; tơ anih nư̆n Pô pơsồ-pơsaih lơ-ơ̆n lơngoh rơwă-sơkì tơ buơl guñu.

3 Du mơnih Pharisi truh tô lòng Pô sơ̆ng tơnia lài: “Sa aràng mơnih lơkơi hũ gơnuăr pơkloh sơdiŭ drơi kơyoa mư̆ng abih tơgrơ̆ pơnuaĭ lơi ơu?” 4 Pô đờm: “Buơl guhã 'buh pơrpoh-c̆ơ 'Bồn Bơ-àr Sơc̆ih-Sri ơu? 'Bồn Bơ-àr Sơc̆ih-Sri wă: ‘Mư̆ng c̆ơmrừp, Yàng Pô Lơngì hũ c̆rơ̆ng-pơjiơ̆ng sa aràng mơnih lơkơi sơ̆ng sa aràng mơnih kơmơi,’ 5 sơ̆ng đờm: ‘Kơyoa nư̆n, mơnih lơkơi rơŭ luơi ame ama bloh pơc̆uăl-pơtòm sơ̆ng sơdiŭ drơi; dua aràng rơŭ tơbiă jiơ̆ng sa rùp rơlo.’ * 6 Kơyoa nư̆n sơdiŭ pơsàng 'buh iơŭ la dua tra, bloh mĭn la sa rùp rơlo. Yơu nư̆n, jơi anà mơnih 'buh hũ pơklah-krơi du mơnih bloh Yàng Pô Lơngì hũ pơc̆uăl-pơtòm!”

7 Buơl guñu tơnia Pô wơ̆: “Yah yơu nư̆n, kơđa hơgĕ Môise hũ pơto lài brơi bĕ tơ sơdiŭ sa blah bơ-àr pơkloh, bloh nư̆n luơi ñu nau?” 8 Pô đờm: “Kơyoa hơtai-hơtiàn buơl guhã kră-khăng, nư̆n Môise brơi gơnuăr pơkloh sơdiŭ; bloh, mư̆ng tŭ c̆ơmrừp 'buh hũ yơu nư̆n ơu. 9 Kơu đờm tơ buơl guhã thơu: mơnih lơi pơkloh sơdiŭ, bloh 'buh iơŭ kơyoa sơdiŭ klĕ sơdiŭ-aràng pơsàng-gơŭ, bloh nau khiăng sơ̆ng sa aràng mơnih pơkơ̆n, la sŭng glài klĕ sơdiŭ-aràng pơsàng-gơŭ.” †

10 Du mơnih tui-mơgru đờm lài: “Yah yơu nư̆n, 'buh khiăng sơdiŭ la siàm drơi.” 11 Bloh Pô đờm: “'Buh iơŭ aràng sơi kŭng đồ-mă hũ pơnuaĭ ni, bloh mĭn du mơnih hũ Yàng Pô Lơngì anĭt brơi. 12 Kơyoa hũ mơnih kơdời mư̆ng tŭ tơbiă mư̆ng tŭng ame; hũ mơnih kơdời kơyoa tơngàn aràng, sơ̆ng kŭng hũ mơnih mư̆ng rùp-phŭn drơi ngă tơ drơi jiơ̆ng kơdời kơyoa Lơgăr Lơngì. Aràng sơi hũ rơgơi đồ-mă jiơ̆ng pơnuaĭ ni, nư̆n đồ-mă bĕ.”

Yàng Sơ̆ng Du Lơ-ơneh Tìt

13 Tŭ nư̆n aràng ba du lơ-ơneh tìt truh sơ̆ng Yàng Jêsu, tô Pô daŭ tơngàn tơ ngŏ buơl guñu sơ̆ng iơu-lài tơ buơl guñu, bloh du mơnih tui-mơgru đờm puaĭ du mơnih nư̆n. 14 Bloh Yàng Jêsu đờm: “Kừ luơi du lơ-ơneh tìt truh sơ̆ng Kơu, juơi c̆ơkhă-pơkơŭ buơl guñu; kơyoa Lơgăr Lơngì la găm sơ̆ng du mơnih lơi mơhiơ̆ yơu du lơ-ơneh tìt nư̆n.” 15 Dơlhơu tŭ nau anih pơkơ̆n, Pô daŭ tơngàn brơi lơngai-pơtuah tơ buơl guñu.

Mơnih Dăm Mơda Gơn-hư̆p

(Mak 10:17-31; Luka 18:18-30)

16 Tŭ nư̆n, hũ sa aràng mơnih truh tơnia Pô: “Ơ Pô-Pơto, dơlhă păl ngă pơnuaĭ siàm lơi tô hũ pơnuaĭ hơdiŭ rài pơdò rài?” 17 Yàng Jêsu đờm: “Kơđa hơgĕ hã tơnia Kơu mư̆ng bruă siàm? Mĭn hũ sa Pô siàm soh. Pô nư̆n la rùp-phŭn Yàng Pô Lơngì. Bloh yah hã khiăng hũ pơnuaĭ hơdiŭ rài pơdò rài, nư̆n păl păng-rơmiă tơgrơ̆ pơnuaĭ adăt-pơđăr.” 18 Mơnih nư̆n tơnia: “Du pơnuaĭ adăt-pơđăr lơi?” Yàng Jêsu đờm: “Hã juơi pơmơtai mơnih; juơi ngă glài klĕ sơdiŭ-aràng pơsàng-gơŭ; juơi klĕ blơ̆; juơi ngă grơh lơ̆r. 19 Hã păl thơu-adăt tơ ame ama, sơ̆ng hã păl rơnăm tơ mơnih gơŭ sa plơi adơi sa 'băng yơu rơnăm rùp-phŭn drơi.” ‡ 20 Mơnih dăm nư̆n đờm: “Dơlhă hũ păng-rơmiă tơ̆l abih tơgrơ̆ pơnuaĭ ni, dơlhă dò siơŭ pơnuaĭ hơgĕ wơ̆ ơu?” 21 Yàng Jêsu đờm: “Yah hã khiăng hũ wĭl-tơ̆l, nư̆n nau bĕ, pơblơi abih phơ̆n-bơna drơi hũ, mă priă apăn pơrpha brơi-soh tơ mơnih rơ'bah, nư̆n hã rơŭ hũ phơ̆n-bơna c̆ơk-màng tơ ngŏ lơngì, bloh nư̆n truh bĕ tui Kơu.” 22 Hơdơi tŭ mơhư̆ du pơnuaĭ ni, mơnih dăm nư̆n jruh-jrui tơbiă nau, kơyoa ñu hũ lô phơ̆n-bơna biă.

23 Yàng Jêsu đờm sơ̆ng du mơnih tui-mơgru: “Iơŭ biă Kơu đờm sơ̆ng buơl guhã, mơnih mơda tơma lăm Lơgăr Lơngì la kăn-dơmăn biă. 24 Kơu đờm tơ buơl guhã thơu: lakđa rŏ găn lơbàng jrŭm dò 'buơ̆n rơlau mơnih mơda tơma lăm lơgăr Yàng Pô Lơngì.” 25 Tŭ du mơnih tui-mơgru mơhư̆ yơu nư̆n, buơl guñu mă ngă c̆rih-takơtuă biă sơ̆ng đờm lài: “Yah yơu nư̆n aràng sơi rơŭ hũ dŏng pơklàh?” 26 Yàng Jêsu c̆ơ tơpă tơ buơl guñu sơ̆ng đờm: “Jơi anà mơnih 'buh rơgơi ngă jiơ̆ng pơnuaĭ ni, bloh Yàng Pô Lơngì ngă jiơ̆ng abih tơgrơ̆ bruă.” 27 Pier đờm lài: “Ơ Pô-Pơto, buơl dơlhă hũ luơi abih tơgrơ̆ mơta bloh tui Pô-Pơto. Yơu nư̆n buơl dơlhă rơŭ hũ hơgĕ?” 28 Yàng Jêsu đờm: “Iơŭ biă, Kơu đờm sơ̆ng buơl guhã, truh tŭ-hơrơi abih tơgrơ̆ jơi-phơ̆n hũ pơsơlih bơrhơu, la tŭ Anà Mơnih rơŭ dò guh tơ ngŏ sơbàn màng-kơc̆rà Pô, nư̆n buơl guhã la du mơnih hũ tui Kơu, kŭng rơŭ dò guh tơ ngŏ sa-pluh dua sơbàn, tô c̆ahrơña sa-pluh dua jơi-pơtiàn Israel. 29 Yah aràng sơi kơyoa mư̆ng angăn Kơu bloh klà luơi sàng-dơnò, adơi-ai, gơŭ kơmơi, ame ama, anà tơc̆o, hơma apùh, mơnih nư̆n rơŭ đồ-mă hũ sa rơtùh amăng rơlau wơ̆, sơ̆ng hũ đồ-lĕng pơnuaĭ hơdiŭ rài pơdò rài. 30 Bloh hũ lô mơnih dơlhơu rơŭ jiơ̆ng hơdơi luĭ, sơ̆ng lô mơnih hơdơi luĭ rơŭ jiơ̆ng dơlhơu.”

* 19:5 19:5 Bơ-àr C̆ơmrừp 2:24. † 19:9 19:9 Lăm du bơ-àr klă hũ găm jơlàn ni: Sơ̆ng yah aràng sơi khiăng sơ̆ng mơnih kŏng aràng pơkloh, kŭng sŭng glài klĕ sơdiŭ-aràng pơsàng-gơŭ. ‡ 19:19 19:19 Tơbiă Mư̆ng Ejiptơ 20:12-16.